جامبىلدا ونوماستيكا سالاسىندا اۋقىمدى جۇمىس اتقارىلدى

469

تاۋەلسىزدىك جىلدارىنان باستاپ ەلىمىزدە كوشە اتتارىنان باستاپ، اۋىل مەن قالالار كەڭەستىك اتاۋلاردان ارىلا باستادى. ءبىر كەزدە جەر سۋ اتاۋلارى جاپپاي كەڭەستەندىرىلگەن اتاۋلار بىرتىندەپ قازاقي اتاۋ الدى.

مىسالى ەلىمىز تاۋەلسىزدىگى جاريالانعالى بەرى جامبىل وبلىسى اۋماعىندا 146 ەلدى مەكەننىڭ، 1924 كوشەنىڭ، 172 نىسانىڭ اتاۋى اۋىستىرىلعان.

ەلىمىزدە 2013 جىلى «ونوماستيكا تۋرالى» زاڭ قابىلدانىپ، وندا توپونوميكالىق اتاۋلاردى بەرۋدىڭ بارلىق زاڭدىلىقتارى انىق جازىلدى. سونداي-اق، ەلدى مەكەندەردى، كوشەلەردى تاريحي تۇلعالاردىڭ اتىمەن اتاۋ، تاريحي اتاۋىن قايتارۋدىڭ دا تالاپتارى كورسەتىلگەن بولاتىن. سوعان وراي وتكەن جىلدىڭ وزىندە جامبىل وبلىسى اكىمدىگى جانىنداعى ونوماستيكالىق كوميسسياسىندا ەلدىمەكەندەر مەن ولاردىڭ قۇرامداس بولىكتەرىنىڭ اتاۋىن وزگەرتۋ تۋرالى 291 ۇسىنىس قارالعان ەكەن. ونىڭ ىشىندە 1 ۇسىنىس اۋىلدىق وكرۋگتىڭ اتاۋىن قايتا اتاۋعا قاتىستى بولسا، 4 ۇسىنىستا ەلدى مەكەن اتاۋىن وزگەرتۋ جايى ايتىلعان. ناتيجەسىندە وبلىس اكىمدىگىنىڭ قاۋلىسى جانە وبلىستىق ءماسليحات شەشىمىمەن 1 شاعىن اۋدان، 25 كوشە مەن قايتا اتاۋدى قاجەت ەتكەن 200 كوشەنىڭ اتاۋى وزگەرتىلگەن.

فيلولوگ-عالىم زيبا قۇلامانوۆانىڭ ايتۋىنشا، جامبىل وبلىسىنىڭ ونوماستيكا سالاسىندا اۋقىمدى جۇمىستار اتقارىلعان.

«تاۋەلسىزدىكتىڭ العاشقى جىلدارىنان-اق وبلىس، جالپى رەسپۋبليكانىڭ ومىرىندەگى ءتۇرلى سالالارعا تىڭنان تۇرەن سالعان ءتۇرلى جاڭالىقتار ورىن الدى. اسىرەسە ەلدىڭ رۋحاني ءومىرى كەمەلدەنە ءتۇستى. بۇرىن قىلىشىنان قان تامعان كەڭەستىك جۇيەنىڭ تۇلعالارىنا، پارتيا بەلسەندىلەرىنە بەرىلىپ كەلگەن ەلدى مەكەندەردىڭ، كوشەلەردىڭ، مەكەمەلەردىڭ اتاۋلارى قازاقشالاندى. قۇر قازاقشالانىپ قانا قويماي، قازاق حالقىنىڭ وتارلاۋشى يمپەريا باسىپ-جانشىپ، وشىرمەك بولعان تاريحي اتاۋلار، تاريحي تۇلعالاردىڭ اتى قايتا ورالدى. ءبىر عانا جامبىل وبلىسىندا بۇل باعىتتا كوپ شارۋا اتقارىلعانى ءمالىم. ماسەلەن وبلىس ورتالىعى تاراز دەگەن تاريحي اتاۋىنا قول جەتكىزدى. قالاداعى كوشە اتاۋلارىنا تولە، قازىبەك، ايتەكە بيلەردىڭ ەسىمى بەرىلدى. اۋىلدار مەن ەلدى مەكەندەرگە، كوشەلەرگە توپونيميكالىق اتاۋلارى قايتا ورالىپ، تۇتاس حالىقتىڭ رۋحاني يگىلىگىنە اينالدى. ءارى بۇل جۇمىستار ەلباسى-تۇڭعىش پرەزيدەنتتىڭ «رۋحاني جاڭعىرۋ» باعدارلاماسىمەن دە ۇندەسەدى» ، – دەيدى فيلولوگ-عالىم ز.قۇلامانوۆا.

وتكەن جىلى رەسپۋبليكالىق ونوماستيكالىق كوميسسيانىڭ شەشىمى بويىنشا جامبىل وبلىستىق فيلارمونياسىنا كەنەن ازىرباەۆتىڭ، تاراز قالالىق مادەنيەت ۇيىنە ىقىلاس دۇكەنۇلىنىڭ، تاراز قالاسىنداعى №10 مەكتەپكە ساعادات نۇرماعانبەتوۆتىڭ ەسىمىن بەرۋ تۋرالى قازاقستان رەسپۋبليكاسى ۇكىمەتىنىڭ قاۋلىسى شىقتى.

«ادىرنا»

ۇلتتىق پورتالى

پىكىرلەر