اۋليەاتادا پرەزيدەنت جولداۋىن ىسكە اسىرۋ جونىندە جيىن ءوتتى

958

جامبىلدا وبلىسىندا مەملەكەت باسشىسى قسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ىسكە اسىرۋعا ارنال­­عان اكتيۆ جيىنى ءوتتى.

جيىندى ايماق باسشىسى اسقار مىرزاحمەتوۆ اشىپ، پرەزيدەنت جۇكتەگەن تاپسىرمالارعا توقتالدى. اسقار يسابەكۇلىنان كەيىن وبلىس اكىمىنىڭ ورىنباسارى سۇلۋشاش قۇرمانبەكوۆا بايانداما جاساپ، جولداۋ جۇكتەگەن مىندەتتەر مەن تالاپتار بويىنشا وڭىردە اتقارىلاتىن جۇمىستارعا توقتالدى

سۇلۋشاش ساتبەكقىزىنىڭ ايتۋىنشا،  حالىقپەن ءتيىمدى كەرى بايلانىس ورناتۋ – ەڭ باستى تالاپ بولىپ وتىر. سوندىقتان دا ول الداعى ۋاقىتتا مەملەكەتتىك ورگانداردىڭ جۇمىسى ازاماتتاردىڭ بارلىق سىندارلى ءوتىنىش-تىلەكتەرىنە زاڭناما شەڭبەرىندە جەدەل ءارى قايتا قايىرىلمايتىنداي جاۋاپ بەرۋىنە بايلانىستى باعالاناتىندىعىن ايتتى.

«مەملەكەت باسشىسى يندۋستريالىق-يننوۆاتسيالىق دامۋ باعدارلاماسى اياسىندا ونىمدىلىگى جوعارى ورتا بيزنەسكە قولداۋ كورسەتۋدىڭ كەشەندى شارالارىن ازىرلەۋدى تاپسىرعان دەسەك، بۇل باعىتتاعى ەڭ ءتيىمدى شارالاردىڭ ءبىرى – يندۋستريالىق ايماقتار قۇرۋ ەكەندىگى ءسوزسىز. وسى ورايدا وبلىستىڭ شۋ اۋدانىنداعى «تاراز حيميالىق پاركى» ارنايى ەكونوميكالىق ايماعىنىڭ ينفراقۇرىلىم قۇرىلىسى اياقتالۋعا تاياۋ. تاراز قالاسىنىڭ اۋماعىندا رەسپۋبليكالىق ماڭىزى بار يندۋستريالىق ايماق قۇرۋ جۇمىستارى دا قارقىندى.

بۇگىندە وڭىردە 84 مىڭنان اسا شاعىن جانە ورتا كاسىپكەرلىك سۋبەكتىلەرى تىركەلگەن دەسەك، ونىڭ ىشىندەگى جۇمىس جاسايتىندارىنىڭ ۇلەسى 80,3 پايىزعا جەتكەن. ول، وتكەن جىلدىڭ وسى كەزەڭىمەن سالىستىرعاندا 11,4 پايىزعا ارتىپ وتىر. سونداي-اق، «بيزنەستىڭ جول كارتاسى - 2020» باعدارلاماسى اياسىندا اعىمداعى جىلدىڭ 8 ايىندا 4,5 ميلليارد تەڭگەگە 290 جاڭا جوبا ىسكە اسىرىلۋدا – دەدى ول.

وسى جىلدىڭ ءبىرىنشى جارتىجىلدىعىندا وبلىستاعى 32 مىڭنان استام وتباسى ياعني 162 مىڭنان استام ادام اتاۋلى الەۋمەتتىك كومەك العان. وسى ورايدا ەل پرەزيدەنتى الەۋمەتتىك باعىتتارعا – وتباسى بيزنەسىن قۇرۋعا، ەڭ الدىمەن، كوپبالالى جانە جاعدايى تومەن وتباسىلارعا باسا ءمان بەرە وتىرىپ، بيزنەسكە قولداۋ كورسەتۋدىڭ جاڭا تاسىلدەرىن ەنگىزۋ كەرەكتىگىن تاپسىرعان ەدى. بۇل تۇرعىدا وبلىستا ناقتى جوسپار قۇرىلىپ، جۇرگىزىلگەن جۇمىستاردىڭ العاشقى ناتيجەسى دە بايقالۋدا.

«وبلىستاعى 376 ەلدى مەكەندەگى 138 347 اۋلا زەردەلەنىپ، انكەتالار تولتىرىلدى. زەردەلەۋ ناتيجەسى مەن تۇرعىنداردىڭ ۇسىنىستارىن ەسكەرە وتىرىپ، ءوڭىر تۇرعىندارىنىڭ ءال-اۋقاتىن ارتتىرۋ جوباسىنىڭ تۇجىرىمداماسى ازىرلەندى. وسى جوبا اياسىندا حالىقتىڭ ءومىر ساپاسىن جاقسارتۋعا باعىتتالعان 5 باعىت تاڭدالىپ وتىر. ول بويىنشا جالپى قۇنى 46,4 ميلليارد تەڭگە كولەمىندە 31 مىڭنان استام جوبانى ىسكە اسىرۋ كوزدەلىپ وتىر. الدىن-الا ەسەپتەۋلەرگە سايكەس، وسى جوبالاردىڭ ىسكە اسىرىلۋىمەن 90 مىڭنان استام جۇمىس ورىندارىنىڭ قۇرىلۋى، ءوز بەتىنشە جۇمىسپەن قامتىلعان جانە جۇمىسسىز 68 مىڭنان استام ادامدى كاسىپكەرلىكپەن اينالىسۋعا بەيىمدەۋ، اتاۋلى الەۋمەتتىك كومەك الۋشىلاردىڭ سانىن قىسقارتۋ، اۋىل شارۋاشىلىعى ءونىمىن 33 پايىزعا دەيىن ۇلعايتۋ، وڭدەۋشى كاسىپورىنداردىڭ جۇكتەمەسىن ارتتىرۋ كوزدەلۋدە. ەندىگى كەزەكتە اۋدان، اۋىل اكىمدەرى ءتيىستى باسقارمالارمەن بىرلەسىپ وسى قارجىلاردىڭ اۋىل حالقىنا ءتيىمدى جۇمىس ىستەۋىن ۇيىمداستىرۋلارى ءتيىس»،- دەدى سۇلۋشاش ساتبەكقىزى.

ەلباسىنىڭ «اۋىل – ەل بەسىگى» ارنايى جوباسى اياسىندا 3 اۋداننىڭ ورتالىقتارىندا 2 ميلليارد 77 ميلليون تەڭگەگە 108 جوبا ىسكە اسىرىلۋدا. ال، كەلەر جىلى 2 ميلليارد تەڭگەگە 53 جوبانى جۇزەگە اسىرۋ جوسپارلانۋدا.

باسقوسۋ بارىسىندا جارىسسوزگە جازىلعان بىرقاتار ازاماتتار جولداۋ مىندەتتەرى مەن باسىم باعىتتارىنا توقتالىپ، ماسەلەلەر مازمۇنىن تالقىلانىپ، الداعى جۇمىستار جوسپارى سارالاندى.

 "ادىرنا"

ۇلتتىق پورتالى

 

پىكىرلەر
رەداكتسيا تاڭداۋى