اقىننىڭ جىرى جاڭبىرشا جاۋعان كۇن

221

تەاتر ونەرىنىڭ وركەندەگەن ورداسى سانالاتىن اكەم تەاترىندا فاريزا قويىلىمى كورەرمەن نازارىنا ۇسىنىلدى. «تەاتر حاس سۇلۋدىڭ كوز جاسىنداي ءمولدىر ونەر» دەپ جازعان مۇحتار اۋەزوۆتىڭ اتىن يەمدەنگەن قازاق مەملەكەتتىك اكادەميالىق دراما تەاترىندا كوپشىلىككە ۇسىنىلعان تۋىندىنى «ا+ا Idea Fabric» پروديۋسەرلىك ورتالىعى دايىنداعان. جاڭا قويىلىم جازعى دەمالىس كەزىندە تەاتردى ساعىنعان الماتىلىقتار ءۇشىن ايتۋلى جاڭالىققا تولى بولدى. ويتكەن، ساحنانىڭ بەزەندىرىلۋى، دەكوراتسياسى بۇرىنعىدان وزگەرەك ارلەنگەن. ماسەلەن، سارقىراپ اققان سارقىرامانىڭ سۋىنىڭ ءوزى اۋەنمەن استاسىپ، قويىلىمعا تابيعي رەڭ بەرىپ تۇرعانداي.

پرەمەرا ەرەكشە دارىن يەسى، جانى مەن ءتانى جىر بوپ ورىلگەن قازاقتىڭ دارا قىزى، قايتالانباس اقىنى فاريزا وڭعارسىنوۆانىڭ 80 جىلدىق مەرەيتويىمەن تۇسپا-تۇس كەلدى. العاشقى قويىلىمنىڭ تۇساۋكەسەرىنە كورەرمەن كوپ جينالعان. سوندىقتان تەاتردا ينە شانىشار ورىن بولعان جوق. ءتىپتى، وسى جاڭالىقتى بارشا حالىققا جەتكىزەتىن تىلشىلەر قاۋىمىنا دا ورىن تابىلمادى. اقىن رۋحىنا باعىشتالعان قويىلىم فاريزانىڭ جان تازالىعى مەن قايسار مىنەزىن، ولەڭگە دەگەن ماحابباتىن، ومىرگە كوزقاراسىن بىلدىرەدى. تىڭ باستامالارعا تولى تۋىندىنى كورۋگە اكتەر تۇڭعىشباي جامانقۇلوۆ، حالىق ءارتىسى ماقپال ءجۇنىسوۆا، جازۋشى اكىم تارازي سىندى قوعام قايراتكەرلەرى ارنايى شاقىرتىلعان. «فاريزا» قويىلىمىنىڭ اۆتورى حالىققا بەلگىلى اكتريسا، فاريزانىڭ كوزىن كورگەن ءسىڭىلىسى روزا مۇقانوۆا. ال، تۋىندىنى جارىققا شىعارىپ، نازىك سەزىم ءيىرىمىن كوپشىلىككە كوركەم ونەر رەتىندە جەتكىزە بىلگەن اينۇر كوپباساروۆا.

تىلسىم كۇشتەردى بايلانىستىرعان توسىن كورىنىستەر مەن تاڭسىق شەشىمدەردەن قويۋشى رەجيسسەر فارحات مولداعاليدىڭ قولتاڭباسى ايقىن كورىنەدى. تاعدىردىڭ تەزىندەگى ونەگەلى ءومىردى ولەڭمەن ارلەپ، فاريزانىڭ جان تەبىرەنىسىن، ىشكى الەمىن قويىلىممەن بايلانىستىرا بىلگەن كومپوزيتور رەنات گايسين ەڭبەگىنىڭ ناتيجەسى اسەرلى اۋەننەن اڭعارىلادى. جاڭا فورماتتاعى تۋىندى فاريزانىڭ ءومىر كەزەڭىنەن حابار بەرەدى. ونەر ادامىنىڭ باسىنداعى اتاق-داڭق، ساتقىندىق، ماحاببات، جالعىزدىق سەكىلدى ماسەلەلەر بۇل قويىلىمدى اينالىپ وتپەدى. اقىن قىزدىڭ ومىرىنەن سىر شەرتەتىن تۋىندى كورەرمەندەردى دە بەيجاي قالدىرمادى. فاريزانىڭ ءرولىن سومداعان جاس اكتريسا نازگۇل قارابالينا اقىننىڭ بولمىسىن ەرەكشە ىقىلاسپەن سومداعان دەپ ايتۋعا بولادى.

قويىلىم بارىسىندا فاريزانىڭ ولەڭدەرى جاتقا وقىلىپ، اقيىق اقىن مۇقاعالي ماقاتاەۆپەن رۋحاني ۇندەستىگى دە كورسەتىلدى. ءومىر مەن ءولىمنىڭ اراسىندا ساندالعان فاريزانىڭ جان تىنىشىعى تەك ولەڭدەرى ارقىلى عانا بەرىلدى. تۋىندى سوڭىندا اقىننىڭ ولەڭدەرى باسىلعان اق پاراقتار جوعارىدان جاۋعان جاڭبىرداي سەبەلەپ، فاريزا ولەڭىنىڭ ارقاشان حالىق جادىندا ەكەنىن بايقاتتى. سوندىقتان، ءالى دە بولسا كوپشىلىك كورىپ ۇلگەرمەگەن قويىلىمنىڭ ءساتتى شىققانى تالعامپاز كورەرمەننىڭ قوشەمەتى ارقىلى بەلگىلى بولدى. حالىق ىقىلاسىنىڭ تولاستاماي ۇزاعىنان بولۋى تۋىندىنىڭ اسەرلى شىعىپ، فاريزانىڭ شىنايى بولمىسى حالىقپەن جاقىن ەكەنىن اڭعارتادى. الداعى ۋاقىتتا تەاتر ماۋسىمى اشىلعاندا كورەرمەننىڭ بۇل قويىلىمعا سۇرانىسى ۇلعايا بەرەتىنىنە سەنىمىم مول.

 

جاينا شىنبولاتقىزى،
ءال-فارابي اتىنداعى قازاق ۇلتتىق
ۋنيۆەرسيتەتىنىڭ ماگيسترانتى

پىكىرلەر