ۇكىمەت ءسىزدىڭ دە كرەديتىڭىزدى كەشىرگەنىن قالايسىز با؟

1071

ءۇش كۇن بولدى، كوپ بالالى انالار حالىققا قىزمەت كورسەتۋ ورتالىعىنىڭ تابالدىرىعىن توزدىرىپ ءجۇر. قر پرەزيدەنتى قاسىم-جومارت توقاەۆتىڭ نەسيەنى كەشىرۋ تۋرالى تۋرالى جارلىعىنا سايكەس، بانكتەر كرەديتتەردى كەشىرىپ جاتىر. كەشىرىلەتىندەردىڭ ءتىزىمىن قر ەڭبەك جانە الەۋمەتتىك قورعاۋ مينيسترلىگى بەردى. ونى ەلەكتروندى ۇكىمەت بازاسىنان تەكسەرىپ بىلۋگە بولادى. دەگەنمەن، ول تىزىمدە كەيبىر كوپ بالالىلار مەن اتاۋلى كومەك الاتىندار جوق.

بۇگىن مينيسترلىك سايتىنا ءتىزىمدى تەكسەرەتىن فۋنكتسيانى ىسكە قوستى. كرەديتى كەشىرىلەتىن تىزىمگە كىرگەن، كىرمەگەنىڭىزدى مىنا تومەندەگى سىلتەمەگە كىرىپ تەكسەرە الاسىز. ەگەر ءسىز باعدارلاما قاتىساسىز دەپ جازىلسا، كرەديتىڭىزدىڭ 300 مىڭى كەشىرىلەدى. وتباسىنداعى ەرلى-زايىپتىنىڭ دا نەسيەلەرى جەكە جەكە 300 مىڭنان كەشىرىلەدى. كەشىرۋگە جاتاتىندار: كوپ بالالىلار، 29 جاسقا تولماعان جەتىم بالالار، مۇگەدەك بالا تاربيەلەپ وتىرعاندار، بالا كەزىنەن مۇگەدەك بولعاندار، اسىراۋشىسىنان ايرىلعاندار، اتاۋلى كومەك الاتىندار.

2019 جىلدىڭ 1 ماۋسىمىنا دەيىنگى بانكتە تۇرعان كرەديتتەر عانا كەشىرىلەدى. ودان كەيىن الىنعان كرەديتتەر كەشىرىلمەيدى. سونداي اق، كوللەكتورلارعا ءوتىپ كەتكەن
جانە 3 ملننان اسىپ كەتكەن كرەديتتەر دە كەشىرىلمەيدى.

ءسىز كرەديتى كەشىرىلەتىن مارتەبەگە جاتاسىز، بىراق مينيسترلىكتىڭ تىزىمىنە ەنبەگەن جاعدايدا نە ىستەۋ كەرەك؟ ەگەر تىزىمدە بولماي قالساڭىزدار 111 نومىرىنە حابارلاسىپ، ءوزىڭىزدىڭ قاي مارتەبەگە جاتاتىندارىڭىزدى ايتىپ، قوستىراسىز دەپ حابارلايدى قۇزىرلى ورگان. الايدا، كەشە مينيسترلىكتىڭ 1411 مەن 111 دەگەن نومىرلەرىنە ءبىزدىڭ انالار تاڭنان كەشكە دەيىن حابارلاسىپ، سويلەسە المادى. بۇگىن دە 111-گە زۆونداپ كورىڭىز، كوتەرە مە ەكەن؟

قازاقستاننان ميلليون ادام زۆونداپ اۋىزشا ايتىپ، تىزىمگە ەنىپ كەتە الا ما؟ حالىققا قىزمەت كورسەتۋ ورتالىعى بار، سوعان بارىپ، ءوزىنىڭ سول مارتەبەگە جاتاتىنىن دالەلدەيتىن قۇجاتتارىن تاپسىرىپ، قوستىرعان ءجون مەنىڭشە. مينيسترلىك سونى بۇگىن-ەرتەڭ قولعا الماسا، انالار ۆيتسە مينيستر سۆەتلانا جاكۋپوۆا حانىمنىڭ ۆاتساپ نومىرىنە قۇجاتتارىمىزدى جىبەرەمىز، مينيسترلىككە حابارلاسۋدىڭ باسقا مۇمكىندىگى جوق دەپ وتىر.

تىزىمگە كىمدەر ەنبەدى؟ حالىققا قىزمەت كورسەتۋ ورتالىقتارىنىڭ بازاسىنا 2008 جىلعا دەيىن نەكەلەسكەندەردىڭ نەكە تۋرالى كۋالىكتەرى ەنبەگەن. ودان كەيىن ۇيلەنگەندەر عانا بازادا بار. ياعني، كوپ بالالى انا تىزىمدە بار، ونىڭ كۇيەۋى تىزىمدە جوق. ونى ەنگىزۋ ءۇشىن نەكە تۋرالى كۋالىكتى سكانەرلەپ بازاعا قوسۋ كەرەك. ءبىزدىڭ انالار قوستىردى. ەندى سونى مينيسترلىككە حابارلاپ جەتكىزە الماي ءجۇر. سونداي اق قاراعاندى قالاسىندا 8 بالاسى بار انا تىزىمدە جوق. اتاۋلى كومەك تە المايدى، ءار بالام ءار ۇيدە تىركەۋدە، سوندىقتان تىزىمگە دە ەنبەي وتىرمىن دەيدى. مۇگەدەك بالا تاربيەلەپ وتىرعان وتباسىلار دا تىزىمەن تىس قالعان.

كرەديت 8 قىركۇيەككە دەيىن كەشىرىلەدى. ۋاقىت از.

 

ءلاززات قوجاحمەت

"ادىرنا" ۇلتتىق پورتالى

پىكىرلەر