قالاممەن شەر تارقاتىپ، شىڭعا ۇمتىلعان شالقاردىڭ تاعىلىمعا تولى عۇمىرى

1167

تاعدىر تالكەگى اسا قادىرلى ادام بالاسىن تالاي سىناقتارعا، راحات پەن لاززاتتارعا باتىرادى. ونداعى ماقسات ادام ءومىرىن كورىنگەنگە كەرگىلەتىپ، ويىن قويۋ قاراڭعىلىققا باتىرۋ ەمەس... بالكىم سىناقتار ارقىلى جاراتۋشىنىڭ ادامزاتتى سول كەلتە عۇمىرىندا ەلدەن ەرەك ۇشپاققا جەتەلەۋى شىعار. سونداي ەرەكشە عۇمىرلى جاننىڭ ءبىرى بۇگىنگى سۇقباتىمىزدىڭ نەگىزگى كەيىپكەرى بولماق. ول سياقتى تاعدىرىنا مويىنسۇنعاندار نەكەن-ساياق.

شالقار قۋانىشباەۆ – شىمكەنت قالاسىنىڭ تۋماسى. ون سەگىز جاسىنا تاياعان شاعىندا باسسەيندە وقىس جاراقات الىپ، ارباعا تاڭىلدى. جالىنداپ تۇرعان جاستىق شاعىندا وقۋعا تاپسىرىپ، بەيقام جۇرگەن بالا شالقار - ارماندارىن الىسقا سىلتەپ، شۇعىلالى شىڭعا تابان تىرەمەك ماقساتتارى بار ەدى. ادامنىڭ ەمەس، اللانىڭ قالاۋى بولادى دەگەن راس قوي...

قايسار جان سىناقتارمەن سىنالماي قويمادى. ەرەكشە كەيىپكەرىمىز سوندا دا بەرىلمەي، اعىسقا كەسە-كولدەنەڭ قاسقايا قارسى ءجۇزىپ، تاعدىرعا مويىنسىنۋدى ۇيرەندى. الايدا كەيىپكەرىمىزگە شىتىرمان ويدىڭ شىرعالاڭىنان ارىلۋعا بىرنەشە جىل ۋاقىت كەتتى.

وسى كەزدە «ۋاقىت - ەمشى» دەگەن حالىق ءسوزى ەرىكسىز ويعا ورالادى ەكەن. ول ءتىپتى ءوزىنىڭ سۇيىكتى ىسىمەن اينالىسىپ، ادامدارعا پايدالى بولۋدىڭ توتە جولىن تاپتى.

ءومىردىڭ تاماشاسىن تامساندىرا جازۋ ارقىلى انىق نۇرلى تالانت يەسى ەكەندىگىن دالەلدەپ قانا قويماي، پايدالى بولۋدىڭ تىڭ جولدارى مەن ءتۇرلى تورابى بار ەكەندىگىن دالەلدەدى.

ەندەشە ەرەكشە جانمەن جۇرگەن سىرلى سۇقباتتى ءار جۇمىر باستى پەندە ىقىلاس قويىپ، وقۋى ءتيىس دەگەن تۇجىرىمعا كەلدىك.

- شالقار اعا، جەكە ءومىرىڭىز جايىندا ءبىرى بىلسە، ءبىرى بىلە بەرمەيدى. مۇنداي حالگە قالاي ءتۇستىڭىز؟ كەڭىرەك بايان ەتسەڭىز.

- ادام كەلەشەگى مەن كەلەر كۇنىن بولجاي المايدى عوي. بالالىقپەن قوشتاسا قويماعان بالعىن شاعىم ەدى. 2010 جىلى وقۋدى قىزىلعا ءتامامداپ، گرانت يەگەرى اتانىپ، جوو-نا تاپسىرعان كەز. تامىز ايىندا تاراز قالاسىندا اكۆاپاركە شومىلۋعا باردىم.

ارتىق وي ويلاپ ۇلگەرمەگەن مەن سۋدى بارلاماستان ساياز جەرگە باسپەن سۇڭگىدىم. سول بويدا مويىن ومىرتقام سىنىپ، اياق-قولىم ىستەمەي قالدى. ءبىراز تۇنشىعىپ، سۋدان شىعا المادىم. تەك اينالاداعى ادامدار بايقاپ قالىپ، جاعاعا شىعارىپ، جەدەل جاردەممەن دەرەۋ الىپ كەتتى. وپەراتسيا جاسالدى. كەيىننەن جازىلمايتىن سىرقاتقا شالدىققانىمدى ۇقتىم.

ارينە كەشە عانا ساۋ جۇرگەن مەن ءۇشىن مۇنداي كۇيدى قابىلداۋ قيىن بولدى. الايدا قىلىشتىڭ قىرىنداي تىك مىنەزىم مەن تاباندىلىعىم بۇگىنگى كۇنىمنىڭ جارىعىن جاعۋعا ۇلكەن سەپتىگىن تيگىزدى.

- قازىرگى زاماندا شۇكىرلىگىنەن كۇپىرلىگى كوبەيگەن قاۋىمنىڭ قاراسى قالىڭدادى. ءسىزدىڭ پوستىڭىزدىڭ وتىمدىلىگى سول، وقىرماندارىڭىزدىڭ سانى كۇن ساناپ ءوسىپ كەلەدى. مۇنداي جازبالاردى جازۋ، جاريالاۋعا نە تۇرتكى بولدى؟

- العاشقىدا مەن ءۇشىن تىرشىلىك اعىنى توقتاپ قالعانداي كورىندى. ءوزىمدى الەمدەگى ەڭ قاجەتسىز ادام سەزىنگەنىم راس.

سونىڭ كەسىرىنەن ون جىلدان استام ۋاقىت بويى كۇنىمدى كۇڭىرەنۋمەن، ءتۇنىمدى جابىرقاۋمەن وتكىزدىم.

ءوزىمدى دامىتۋعا مۇلدەم تىرىسپادىم. جاقىن دوستارىم تىم بولماسا تەلەگرام اشىپ، ءوز ويلارىممەن ءبولىسۋدى كەڭەس ەتەتىن. وزگەلەر ءۇشىن ءوزىمدى قاجەتسىز سەزىنگەن مەن، ەل اعالارى مەن ءتۇرلى بيزنەسمەندەر باردا حالىق مەنىڭ ويىمدى قاي قاجەتىنە جاراتادى دەگەن كۇمان سەيىلمەيتىن. بىراق ىشىمدەگى الاساپىران ويلار ساناما تىنىم بەرمەدى. سونىڭ بارلىعىن قاعازعا ءتۇسىرىپ، دوستارىممەن بولىسەتىنمىن. سولاي شەر تارقاتىپ، ءتۇرلى كەزدەسۋلەر ۇيىمداستىراتىنبىز. ۋاقىت وتە كەلە ماعان اقشا تابۋ قاجەتتىلىگى تۋىندادى. كوپيرايتينگ سالاسىن يگەردىم.

اۋەلگى ۋاقىتتاردا ساتىلىم اكەلەتىن جازبالاردى عانا جازدىم. كەيىن ءوزىم بلوگ جۇرگىزۋ ارقىلى ادامداردىڭ قىزىعۋشىلىعىن تۋدىرتىپ، شابىت بەرەتىنىمدى تۇسىنە باستادىم.

مەنىڭ جازبالارىم جاريالانعان سايىن جازىلۋشىلارىما جالىندى ويدىڭ جۇرناعىن قالدىراتىنىمدى ۇقتىم. كەمشىلىك دەپ ساناپ كەلگەن بولمىسىمدى كەڭشىلىككە قالاي اينالعانىن ءوزىم اڭعارماي دا قالدىم.

وسىلايشا تۇپكى ماقساتىم پايدا بولىپ، شۇكىرشىلىك پەن ادام قولىنان كەلەتىن شەكسىز مۇمكىندىكتىڭ، دەنساۋلىقتىڭ قادىرى جونىندە ايتۋ ارقىلى، وقىرمان سۇرانىسى بارىن ءتۇسىندىم.

- پوستتارىڭىزدى وقۋ ارقىلى شۇكىرشىلىكتى ارتتىرىپ قانا قويماي، قالامى قارىمدى، ويى ورامدى جان ەكەنىڭىزدى اڭعارۋ قيىن ەمەس. سەبەبى، پوستتارىڭىزدىڭ ءسوزى مەن قاتار ويعا سالار سالماعى دا باسىم. جازبالارىڭىزدىڭ مۇنداي وتىمدىلىگىنىڭ سىرى نەدە؟

- جازبالارىمدى سونشالىقتى ءوتىمدى دەپ ەسەپتەمەيمىن. ەگەر ءسىز ءوتىمدى دەپ تاپساڭىز، وعان بىردەن-ءبىر سەبەپ شىنايلىق ءھام شىن جۇرەكتەن شىعۋى دەپ پايىمدار ەدىم. كوبىنە اۋرۋىم جانىما باتقان كەزدە جازامىن. قاي تۇسىم اۋىرىپ جاتقانىن بىلمەيمىن، سەزبەيمىن، بىراق سەندەر بىلە الاسىڭدار عوي دەگەن سوزدەر سول ءۇشىن دە ءوتىمدى بولدى دەپ ويلايمىن.

سەبەبى، جۇرەكتەن شىققان دۇنيە قاشان دا جۇرەككە جەتەدى دەپ سەنەم. وقىرمان سەنەن ەڭ اۋەلى شىنايىلىقتى كۇتەدى. سەبەبى، وزگە بلوگەرلەردىڭ قىزىلدى جاسىلدى ءومىرى مەن قۋانىشتارى حالىقتى ابدەن قاجىتقان.

قازىر ينستاگرامعا جاقسى تۇسىن عانا سالاتىندار بەلەڭ الدى عوي. ويىمشا، ولاي اۋليە بولىپ كورىنۋدىڭ قاجەتى شامالى.

وزىندىك بولمىسىڭدى اينىتپاي كورسەتسەڭ، كورگەن وقىرماننىڭ دا سەن تۋرالى تىم بيىك باعالاۋ ويى الىسقا سەرمەمەيتىنى انىق.

- ەرەكشە جانداردىڭ شەكتەۋلى ۋاقىت اعىنىندا، شەكسىز مۇمكىندىكتەردىڭ ەسىگىن ايقارا اشىپ جاتقانىنا ءوزىڭىز ارقىلى كۋا بولىپ كەلەمىز. بىرنەشە جۇمىس جاساپ قانا قويماي، الەۋمەتتىك جەلىدەگى بەلسەندىلىگىڭىز دە قالىس قالعان ەمەس. ءبىر سۇقباتىڭىزدا كىتاپ جازۋ تۋرالى تىلىڭىزگە تيەك ەتكەن ەدىڭىز. الدا تاعى قانداي جوسپارلارىڭىز بار؟

- سەرىكتەسىممەن جاڭا بيزنەس باستاپ جاتىرمىن. مەرەكەلىك كەشتەردەگى قالىڭ كورەرمەنگە كەرەمەت كوڭىل كۇيدەن تارتۋ ەتەمىز. تولىعىراق الەۋمەتتىك جەلىلەرلە جاريالايتىن بولامىن. كىتاپ جايىنا كەلەتىن بولساق، ونى جازۋدى قولعا الىپ جاتىرمىن. جەڭىل تىلدە پوست سەكىلدى شىعارامىن دەپ ويلاعام.

الايدا ەل اعالارىمەن كەڭەس قۇرۋدى ءجون ساناپ، قايرات جولدىبايۇلى اعامەن اقىلداستىم. ول بۇل ويىمدى قۇپتامادى. حالىق ونداي موتيۆاتسيالىق كىتاپتان شارشاعانىن ايتتى. وداندا جەكە ءومىرىمدى موتيۆاتسيالىق رومان قىلىپ شىعارۋعا كەڭەس ەتتى.

وعان ارنايى كومەكشىلەر الدىرىپ، كىتاپ باسپالارىنىڭ باسشىلارىمەن كەڭەسۋ ۇستىندەمىن. ماعان جەكە جازۋشى تاعايىندالدى. ول شىمكەنت قالاسىنا كەلگەن بويدا بىردەن جۇمىسىمىزدى باستاماق نيەتتەمىز.

كىتاپ ساتىلىمعا شىققان بويدا، شىنايى تاعدىرعا نەگىزدەلگەن ۇزدىك باسىلىم بولارىنا سەنەم. كىتاپتان جاقسى قارجى جينالىپ جاتسا، الماتىعا كوشكىم كەلەدى.

الماتى - مۇمكىندىكتەر قالاسى. وعان بارعان سايىن كوزىم انىق جەتىپ كەلەدى. ءتىپتى تاقتايداي تەگىس قارا جولدارىنىڭ ءوزى ادامعا ەرەكشە لەپ پەن شىنايى سەرپىن سىيلايدى. ونىڭ ۇستىنە بۇل قالادا اعالارىم، دوستارىم، ارىپتەس بلوگەرلەر بار. بۇل دەر كەزىندە اقىلداسىپ، وي بولىسۋگە وتە ءتيىمدى.

دەنساۋلىعىم مەن ماتەريالدىق جاعدايىم دۇرىستالىپ جاتسا، ۇيلەنۋ دە ويىمدا بار. مەنى بار بولمىسىممەن قابىلداپ، ءومىر بويىنا وكىنبەي، مەنەن ەشتەڭە كۇتپەي، تەك اللا رازىلىعىن كۇتەتىن جان تابىلسا مەنىڭ دە ىقىلاسىم ويانار ەدى. سول ساتكە ءوزىم دە دايىندىق ۇستىندەمىن.

- ءوزىڭىزدى بەس جىلدان كەيىن قالاي ەلەستەتەسىز؟

- 5 جىلدان كەيىن جانۇيام بار، 1 پەرزەنتپەن الماتىدا جەكە پاتەر مەن 1-2 كومەكشىلەرىممەن ەلەستەتەمىن. وتباسىممەن باقىتتى عۇمىر كەشىپ جاتقان، بىرنەشە جوبالارى مەن جەكە كاسىبى بار شالقار. قازىردىڭ وزىندە الەۋمەتتىك جوبا جاساۋعا نيەتتىمىن.

ۇسىنىستار بولىپ جاتسا، يدەيانى ارى قاراي دامىتۋعا، جۇمىس جاساۋعا كومەكتەسە الامىن. ەرەكشە جاندارعا قولداۋ بولاتىن قايىرىمدىلىق نە وڭالتۋ ورتالىعىن جاسار ەدىم.

ول جاتتىعۋ جاساۋعا ارنالعان جەر عانا ەمەس، پىكىر الماسىپ، ورتا تاباتىن ورتالىق بولعانىن قالايمىن.

- @Shalqarmyn ينستا. پاراقشاڭىزدا وقىرماندارىڭىزدىڭ كوپشىلىگى كىمدەر؟ "فاناتكالارىڭىز" موتيۆاتسيادان بولەك سىزدەن تاعى نە كۇتەدى دەپ ويلايسىز؟

- كوپشىلىگى باستامالارىمدى قولداپ جۇرەتىن جاناشىرلارىم. ونىڭ ىشىندە ميلليونەر، بيزنەسمەن، بلوگەر، ەل اعالارى، قوعام قايراتكەرلەرى، ءانشى بارلىعى بار. ۇيدە وتىرعان دەكرەتتەگى انالار دا بولۋى مۇمكىن.

كوپشىلىگى موتيۆاتسيالىق جازبادان گورى، ەموتسيا الۋ ءۇشىن وتىرادى دەپ ويلايمىن. مەن جەتىستىككە جەتسەم، شىنايى ريزا بولعاندىقتان قۋانىشقا بولەنىپ قاناتتانادى. ماعان ريزا بولا الادى، قۋانىشىما شىنايى ورتاقتاسا الادى.

بالكىم مەن جاساپ جاتقان نارسەدەن ءوزى ەشتەڭە جاساماعانعا ۇيالادى. الايدا ودان ۇيالماۋ كەرەك. ەشتەڭەگە زاۋقىڭ سوقپايتىن كەز بارىندە ورىن الادى ەمەس پە؟.

- الداعى ۋاقىتتا مەملەكەت تاراپىنان قارجىلاي كومەك الىپ، مەگا جوبالاردى قولعا الۋ ويدا بار ما؟

- ناقتى ويدا جوق. وڭالتۋ ورتالىعى بولعانىن قالايمىن. وعان قاراجات بولىنبەگەننىڭ وزىندە ارتىمدا الاتاۋداي ەل اعالارى باردا سولاردىڭ كومەگىمەن قولعا الۋعا بولادى دەپ ويلايمىن. مەملەكەت كومەگى اسا قاجەت تە ەمەس.

- "قالاۋىن تاپسا قار جانادى" دەگەن ءسوز بار. تىسپەن تەرەتىن كوپيرايتەر اتانۋ ويىڭىزعا قالاي كەلدى؟

- تىسپەن تەرەتىن كوپيرايتەر اتانۋىم قاجەتتىلىكتەن تۋىندادى. ءالى ەسىمدە 2020 جىلى اكەم مەنى كوتەرىپ ماشيناعا وتىرعىزعان كەزدە شارشاپ، دەمى قىسىلىپ كەتتى. وسىلاي ءومىرىم جالعاسىن تابا بەرسە، وتباسىما اۋىرتپالىق سالاتىنىمدى ءبىلدىم.

ونىڭ ۇستىنە ولار قارتايىپ بارادى. 50-ءدى ەڭسەرگەن اتا-انام بولماسا ماعان كىم قارايدى دەگەن وي كەلدى. وتباسىمدا تاعى ءبىر ءىنىم بار. بىراق ىنىمە ماسىل بولعىم كەلمەدى. ۋاقىت وتە ونىڭ دا وتباسىن قۇرىپ، بولەك وتاۋعا كوشەتىنى بەلگىلى.

سول تۇستا ءوز ومىرىمە ءوزىم جاۋاپكەرشىلىك الۋىم كەرەك ەكەنىن ۇقتىم. سوسىن «مەن نە ىستەي الام؟» دەگەن سۇراق تۋىندادى. تىسپەن تەرە الاتىن قابىلەتىم بار. وسىلايشا تاپسىرىسقا ماتىندەر جازىپ، كومەكشىمنىڭ اقشاسىن تاۋىپ بەرسەم، اتا-اناما، باۋىرلارىما سالماق سالمايمىن دەگەن ويدان كەلدى. بۇل ماقساتىم قازىرگى تاڭدا تولىعىمەن جۇزەگە استى. شۇكىر.

- ءسىزدى مىقتى كوپيرايتەر، موتيۆاتور رەتىندە تانىپ كەلەمىز. ءبىز بىلمەيتىن شالقار مىرزانىڭ تاعى قانداي قىرلارى بار؟

- مەن ادامداردىڭ ەموتسياسىن جاقسى بىلەمىن. ەمپاتيام جوعارى. ءتىپتى حات جولداعان ادامنىڭ ەموتسياسىن بايقاي الامىن. جاي سالەمدەسۋىنەن اڭعارا الامىن. جەكە سويلەسىپ تۇرعاننىڭ وزىنەن ويىن الدىن الا وقۋعا تىرىسىپ جاتامىن. مەنىمەن سويلەسكىسى كەلە مە، جوق پا سەزەمىن. ول ويلارىم كوبىنە ءدال كەلىپ جاتادى. ارينە جاڭىلىسىپ قالاتىن كەزدەرىم دە بولادى. تاعى اقكوڭىلمىن دەپ ويلايمىن.

وزىمە جاسالعان قياناتتى كەشىرە الام، وكپە ۇستاماۋعا تىرىسامىن. مەكتەپ كەزىندە سپورتپەن اينالىسقام. سپورت تاماشالاعاندى جاقسى كورەم. ەسەپكە، جاراتىلىستانۋ باعىتىنا جاقسى بولدىم.

- وقىرماندارىڭىزدىڭ اراسىندا موتيۆاتسياڭىز ءوتىمدى بوپ جۇرگەنىن جوعارىدا بايان ەتتىك. ال دەپرەسسياعا ءتۇسىپ، ءوز ومىرلەرىن كورسەتۋدەن تاساعا جاسىرىنىپ، كولەڭكەدە جۇرگەن ءسىز سەكىلدى ەرەكشە جاندارعا قانداي موتيۆاتسيا بەرەر ەدىڭىز؟

- ەرەكشە جاندار ءوزىن قوعامعا قاجەت ەكەنىن سەزىنۋى كەرەك. قانداي جاعداي بولسا دا مىنا ومىردە ءوز ورنى بار ەكەنىن ۇعىنۋ ءتيىس. باسقالارعا ماڭىزى بارىن تۇسىنگەنى ابزال. ول - ەرەكشە ادام.

ال ەرەكشە ادامداردىڭ ءومىرى - دەنى ساۋ ادامدارعا قاشان دا قىزىق. ونىڭ جاعدايى، ءومىر ءسۇرۋى قالاي ەكەنىن ويلارىمەن ءبولىسۋ كەرەك. ادامدار - قىزىقسۇيگىش. ولارعا ىشىڭدەگىنى شىعارىپ، ويلارىڭمەن ءبولىسۋ كەرەك.

ادامدارعا ەموتسيا بەرگەن سايىن، ولار سەنى ماتەريالدىق جاعىنان جانە كەز-كەلگەن شاقتا قولداۋعا دايىن تۇرادى. بۇل جاعدايىڭا وزىڭنەن باسقا ەشكىم كومەكتەسە المايدى. سول ءۇشىن ورتاعا شىعۋ كەرەك.

ءوزىڭدى كورسەتىپ، بلوك جۇرگىزۋدەن باستاۋدى كەڭەس ەتەر ەدىم. سىرقات ارقىلى اللا تاعالا ونىڭ دارەجەسىن باسقالاردان بىرنەشە ەسە ۇستەم ەتىپ كوتەرىپ قويعان بولۋى مۇمكىن عوي. مەن دەپرەسسيانىڭ تۇبىنە ءتۇسىپ كورگەم. وندا ەشتەڭە جوق ەكەن.

وزىڭمەن قوسا، وزگەلەردى دە شارشاتاسىڭ. ءتىپتى وتباسىڭدى شاراسىزدىققا اپاراسىڭ. كەيبىر وتباسىلار ونداي جاعدايدا مۇگەدەك تۋىسىن ەلدىڭ سوزىنەن ۇيالىپ، امالسىز باعۋى مۇمكىن. بۇل تەك وزىڭە ءوزىڭ قازعان ور. وداندا ىشىڭدەگىنى شىعارۋ كەرەك. ايت نە جاز. دوستارىڭدى شاقىرىپ ءبولىسۋ ارقىلى تىڭداۋشىلارعا موتيۆاتسيا بەرەسىڭ. اڭگىمەڭدى ايتساڭ، ولار قولداۋدىڭ كەز-كەلگەن ءتۇرىن جاساۋعا دايىن.

- شالقار اعا، سۇقباتتاسۋعا كەلىسىم بەرگەنىڭىزگە راقمەت! ىزگىلىكتىڭ ءىزىن، مەيىرىمنىڭ مايەگىن، تاۋبەلىكتىڭ ءتالىمىن، شىن باقىتتىڭ تاعىلىمدى قۇندىلىقتارىن ۇقتىرىپ جاتقانىڭىزعا العىسىم شەكسىز!

ءيا، قازىرگى تاڭدا تىرشىلىكتىڭ ءسانىن قۋام دەپ، ءمانىن كەتىرىپ العاندار از ەمەس. كەيىپكەرىمىز قانشا تۇيىققا تىرەلسە دە، تىعىرىقتان شىعاتىن جارقىن ءارى داڭعىل جولىن سالا ءبىلدى. ونىڭ ەكپىن سەنىمى وزىنە عانا ەمەس، وزگەلەردىڭ دە سونگەن شىراعىن جاقتى. تاعدىرى تاعىلىم مەن تاعزىمعا تولى شالقار قۋانىشباەۆتىڭ ءومىرى كوپتىڭ كوڭىلىنەن شىعىپ، ويلى ورامدار قالدىرارىنا كۇمانىمىز جوق.

ءىنجۋ ومىرزاق،

”ادىرنا” ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket