Қазақстанда негізгі Ұлттық бірыңғай тестілеу (ҰБТ) 16 мамырдан басталып, 7 шілдеге дейін жалғасады. Бұл туралы Ғылым және жоғары білім министрлігі мәлімдеді, деп хабарлайды “Адырна”.
Бұл жылы талапкерлер тесті екі рет тапсырып, ең жақсы нәтижесін гранттар байқауына қатысу үшін таңдай алады.
Тестілеуге 216 мыңға жуық талапкер өтініш берді, бұл өткен жылмен салыстырғанда 30 мың адамға көп. Екі мүмкіндікті ескерсек, өтініштер саны 399 мыңға жетті. Қатысушылардың басым бөлігі – 75%-ы тестілеуді қазақ тілінде тапсырса, 25%-ы орыс тілінде, 266 адам ағылшын тілінде тапсырған.
Ең танымал профильді пәндер комбинациясы – "математика – физика", оны 16,5% бітіруші таңдап отыр. Үштікте тағы "биология – химия" (15,6%) және "математика – информатика" (9,7%) пәндері бар.
Тестілеу еліміздің 46 пунктінде өтеді. Алғашқы күні 4589 адам тест тапсырады, оның 323-і Астана қаласында. Экзамен 120 сұрақтан тұрады және төрт сағатқа созылады. Арнайы білім беру қажеттіліктері бар қатысушыларға қосымша 40 минут беріледі.
Ережелердің бұзылуына жол бермеу үшін кіреберістерге металл іздегіштер орнатылды, аудиторияларда мобильді байланыс блоктайтын құрылғылар мен бейнебақылау камералары орнатылды. Тестілеу аяқталғаннан кейін 31 қазанға дейін бейнемазмұн талданып, ережелер бұзылған жағдайда нәтижелер жойылады.
ҰБТ нәтижелері бар сертификаттар қатысушылардың жеке кабинеттерінде апелляцияларды қарау аяқталғаннан кейін қолжетімді болады. Тест мазмұнына қатысты апелляцияны емтихан аяқталғаннан кейін 30 минут ішінде беруге болады.
