Литва билігі Қырғызстан, Өзбекстан және Қазақстандағы, сондай-ақ Босния және Герцеговинадағы визалық орталықтарды жабу туралы шешім қабылдады. Бұл туралы 23 қыркүйекте Литваның ішкі істер министрі Мартинас Кателинас хабарлады, деп жазады “Адырна”.
Министрдің айтуынша, жабылатын орталықтар сыртқы қызмет жеткізуші компаниялардың бөлімшелері ретінде жұмыс істеген. Олар шетел азаматтары мен Литва мемлекеттік органдары арасында делдалдық қызмет көрсетіп, елде тұруға рұқсат алу үшін құжат қабылдаған және көші-қон рәсімдерін бастаған.
Кателинастың мәлімдеуінше, визалық орталықтарды жабу туралы шешім қауіпсіздік тәуекелдері мен терроризм қаупін бағалау нәтижесінде қабылданған.
Литва ішкі істер министрі Мемлекеттік қауіпсіздік департаменті Орталық Азиядан келген кейбір адамдар арасында радикалды көзқарастар мен терроризммен байланыс болуы мүмкін екенін анықтап жатқанын айтты. Оның сөзінше, билік ықтимал қауіптің нақты оқиғаға айналуын күтпеуі керек.
Ол сондай-ақ сыртқы қызмет жеткізушілерінің жаңа бөлімшелерін ашу жоспарланбайтынын айтты.
Қазіргі уақытта елде сыртқы қызмет жеткізушілерінің 31 орталығы жұмыс істейді. Төрт орталық жабылғаннан кейін олардың саны 27-ге дейін қысқарады. Жабу рәсімін 2026 жылғы 1 қарашаға дейін аяқтау жоспарланған.
Кателинас визалық орталықтардың жабылуы Литваға баруға арналған визаларды беру процесі тоқтайды дегенді білдірмейтінін атап өтті.
Министр Шенген визаларын беру тоқтамайтынын атап өтті.
«Ештеңе де аяқсыз қалмайды. Бұған дейін де адамдар визаның әртүрлі түрлерін, соның ішінде C санатындағы Шенген визасын алу үшін елшіліктер мен консулдық мекемелерге жүгіне алатын. Бұдан былай да бұл мүмкін болады. Елшіліктер мен консулдықтар жабылмайды», – деді министр 24 қыркүйекте Литва парламентінде.
Визалық орталықтарды жабу туралы шешім Литваның көші-қон саясатын қатаңдатып жатқан кезеңде қабылданып отыр. 2026 жылдың қыркүйек айының басында Литваға жұмыс істеу үшін келетін шетел азаматтарына арналған осы жылға белгіленген 24,7 мың адамдық квота толық пайдаланылып қойды. Квота аяқталғаннан кейін жұмысқа орналасу негізінде уақытша тұруға рұқсат тек заңда қарастырылған жағдайларда ғана беріледі.
Көші-қон департаментінің мәліметінше, 2026 жылғы 1 қыркүйектегі жағдай бойынша Литвада шамамен 227 мың шетел азаматының қолданыстағы тұруға рұқсаты болған. Олардың 80 мыңы – Украина азаматтары, 48 мыңға жуығы – Беларусь азаматтары, 13 мыңы – Ресей азаматтары, шамамен 13 мыңы – Өзбекстан, 9,4 мыңы –Үндістан, 7,4 мыңы – Тәжікстан азаматтары.
2025 жылы Литва билігі Душанбедегі визалық орталықты жабатынын да жариялаған болатын. «Азаттық-Азия» мәліметінше, орталық екі жыл жұмыс істеген уақыт ішінде шамамен 6,5 мың адам Литвада тұруға рұқсат алу үшін құжаттарын рәсімдеген. Олардың басым бөлігі жүргізушілер мен құрылысшылар болған. Алайда олардың көпшілігі Литваны тек транзиттік ел ретінде пайдаланып, іс жүзінде Еуропалық Одақтың басқа мемлекеттерінде жұмыс істеген.
