Фото: Sfera
Қазақстан 2026 жылы Ресейден табиғи газ сатып алу көлемін шамамен үш есеге арттыруы мүмкін. Болжам бойынша, биыл Ресейден Қазақстанға жеткізілетін газ көлемі 11 млрд текше метрге жуықтайды. Көрсеткіш 2025 жылы шамамен 4 млрд текше метр болған. Бұл туралы OilPrice.com ресейлік ТАСС агенттігінің деректері мен ҚР Энергетика вице-министрі Қайырхан Тұтқышбаевтың мәлімдемесіне сілтеме жасап хабарлады, деп жазады “Адырна”.
OilPrice.com мәліметінше, Қазақстан мен ресейлік «Газпром» компаниясы биыл газ жеткізуге қатысты қосымша келісімге қол қойған. Сонымен қатар тараптар 2027 жылы Қазақстанға шамамен 9 млрд текше метр ресейлік газ жеткізу мәселесін талқылап жатыр.
Қазақстан соңғы жылдары табиғи газдың таза экспорттаушысы болып келді. 2025 жылы елдегі газ өндіру көлемі рекордтық 68,1 млрд текше метрге жеткен.
Алайда ішкі тұтынудың өсуі газ импортын арттыру қажеттілігін туындатып отыр. Ресейден келетін газ елдің ішкі нарығындағы өсіп келе жатқан сұранысты қамтамасыз етуге бағытталмақ.
OilPrice.com келісімнің қаржылық шарттары жарияланбағанын атап өтті. Басылым ресейлік газдың Қазақстанға салыстырмалы түрде төмен бағамен жеткізілуі мүмкін екенін жазады. Бұған Ресейдің Еуропа нарығына газ экспортын қысқартқаннан кейін жаңа өткізу нарықтарын іздеуі себеп болуы мүмкін.
Ресейден газ сатып алу көлемінің ұлғаюы Қазақстан үшін экономикалық қажеттілікпен қатар, сыртқы саудаға қатысты жаңа тәуекелдер де туындатуы мүмкін.
OilPrice.com Ресейдің энергетикалық ресурстарын сатып алатын елдерге қатысты АҚШ-тың ықтимал санкциялық және тарифтік шараларын атап өтті. Басылым бұл фактор Орталық Азия елдерінің энергетикалық саудасына әсер етуі мүмкін екенін жазады.
Осылайша, Ресейден газ импортын арттыру Қазақстанның ішкі нарығын тұрақты отынмен қамтамасыз етуге мүмкіндік берсе, екінші жағынан, елдің энергетикалық саудасына қатысты геосаяси және санкциялық тәуекелдерді күшейтуі ықтимал.
