Калифорния штатының сенаторы, Демократиялық партияның өкілі Айша Вахаб АҚШ конгресінің өкілдер палатасына өткен арнайы сайлауда жеңіске жетті, деп хабарлайды “Адырна” ұлттық порталы.
Ферғана мәліметінше, ол АҚШ тарихында конгреске сайланған алғашқы ауған текті саясаткер атанды.
Вахаб Калифорнияның 14-ші сайлау округінде Демократиялық партия атынан Мелисса Эрнандеспен бәсекеге түсті. Дауыс берудің 95 пайызы есептелгеннен кейін Айша Вахаб 53 пайыздан астам дауыс жинап, қарсыласын басып озды.
Ол 2026 жылғы сәуірде қызметінен кеткен бұрынғы конгрессмен Эрик Суолуэллдің орнын иеленеді. Вахабтың қазіргі өкілеттік мерзімі 2027 жылғы қаңтарға дейін жалғасады. Ал 2026 жылғы қарашада ол Мелисса Эрнандеспен конгресстегі толық екі жылдық мерзім үшін қайта сайлауға түседі.
Айша Вахаб 1987 жылы Нью-Йоркте Ауғанстаннан АҚШ-қа қоныс аударған отбасында дүниеге келген. Ата-анасынан ерте айырылғандықтан Вахаб пен оның әпкесі қамқорлық отбасында тәрбиеленіп, кейін Фримонт қаласында тұратын ауған текті америкалық отбасы оларды асырап алған.
Саясаткер 2018 жылы Хейуорд қалалық кеңесіне сайланып, АҚШ-та мемлекеттік қызметке сайланған алғашқы ауған текті америкалық әйел атанды. Ал 2022 жылы Калифорния сенатына сайланған алғашқы ауған текті америкалық және алғашқы мұсылман әйел ретінде тарихта қалды.
Вахаб бұған дейін технология саласында және коммерциялық емес ұйымдарда жұмыс істеген. Ол Сан-Хосе мемлекеттік университетінде саясаттану бойынша білім алып, Калифорния мемлекеттік университетінің Ист-Бэй кампусында іскерлік басқару магистрі дәрежесін, Оңтүстік Калифорния университетінде әлеуметтік жұмыс бойынша докторлық дәрежесін алған.
