Қазақстанның әйелдер арасындағы жекелей сындағы бірінші ракеткасы Елена Рыбакина Цинциннатиде өтіп жатқан WTA 1000 санатындағы хард турнирінде кезекті жеңісіне қол жеткізді. Бұл туралы Қазақстан теннис федерациясы жазды, деп хабарлайды «Адырна» тілшісі.
Әлемдік рейтингте екінші орында тұрған қазақстандық теннисші төртінші айналымда дүниежүзілік рейтингтің 14-сатысындағы ресейлік Диана Шнайдермен кездесті.
Ауа райы жағдайына байланысты матчтың басталуы кейінге шегерілді. Нәтижесінде кездесу екі сетке созылып, Рыбакинаның 6:4, 6:4 есебімен жеңісімен аяқталды.
Теннисшілер кортта 1 сағат 27 минут өткізді. Осы уақыт ішінде қазақстандық спортшы сегіз эйс жасап, төрт қос қателікке жол берді және үш брейк-пойнттың екеуін сәтті пайдаланды. Сонымен қатар Рыбакина матч барысында өз геймін бірде-бір рет қарсыласына бермеді.
Ширек финалда Рыбакина әлемнің бесінші ракеткасы, польшалық Ига Швёнтекпен кездеседі. Өткен аптада теннисшілер Канададағы Торонто қаласында өткен алдыңғы WTA 1000 турнирінің финалында өзара ойнаған болатын. Ол кездесуде қазақстандық теннисші 2:6, 3:6 есебімен жеңіліс тапты.
