Украина президенті елге ресми сапармен келген Әзербайжанның сыртқы істер министрімен кездесті, деп хабарлайды "Адырна" тілшісі.
Киевтің хабарлауынша, Әзербайжан мен Украина арасындағы стратегиялық серіктестіктің қазіргі жағдайы мен даму перспективалары талқыланды. Тараптар саяси диалог, энергетика, көлік және гуманитарлық салалардағы ынтымақтастықты, сондай-ақ өзара қызығушылық тудыратын өңірлік және халықаралық мәселелерді қарастырды.
Кездесу барысында екі ел арасындағы достық пен өзара құрметке негізделген қарым-қатынастарды одан әрі нығайтудың маңыздылығы атап өтілді. Келесі жылы Әзербайжан мен Украина дипломатиялық қатынастар орнатқанына 35 жыл толады.
Сондай-ақ Владимир Зеленскийдің биыл сәуір айында Әзербайжанға жасаған сапары және оның барысында қол жеткізілген келісімдердің екіжақты қатынастарды жаңа деңгейге көтерудегі маңызы сөз болды.
Тараптар өңірлік қауіпсіздік, Украинадағы жағдай және халықаралық күн тәртібіндегі өзге де өзекті мәселелер бойынша пікір алмасты.
Әзербайжан Украина егемендігі мен аумақтық тұтастығын халықаралық деңгейде мойындалған шекаралары аясында қолдайтынын тағы да растады.
