Фото: OVO by Cirque du Soleil баспасөз қызметі
11 маусым күні Алматыдағы Almaty Arena кешенінде әлемге әйгілі Cirque du Soleil компаниясының «OVO» атты қойылымының премьерасы өтті. Бұл шоу әлемнің 47-ден астам елін аралап, 17 жылдан бері сахналанып келе жатқан ең танымал жобалардың бірі.
Алматы – Қазақстандағы бұл қойылым көрсетілген екінші қала. Бұған дейін шоу Астанада өткен. Жалпы «OVO» гастрольдік туры барысында 10 миллионнан астам көрермен тамашалаған.
Шоудың мәні мен идеясы
«OVO» сөзі португал тілінен аударғанда «жұмыртқа» деген мағынаны білдіреді. Қойылымның негізгі сюжеті жәндіктер әлеміне түскен жұмбақ жұмыртқа төңірегінде өрбиді.
Сахнада өрмекші, көбелек, құмырсқа, қоңыз және басқа да жәндіктер бейнеленеді. Шоу тек визуалды әсер емес, терең символикалық мағынаға ие әлем ретінде ұсынылады.
Бұл қойылым сахнада 17 жылдан бері көрсетіліп келеді. Осы уақыт ішінде оны әлемнің 50-ге жуық елінде 10 миллионнан астам көрермен тамашалаған. Қазақстан – OVO гастрольдік сапары жеткен 47-ші мемлекет.
Жобада әлемнің 25 елінен келген 100-ден астам маман жұмыс істейді. Шоуда 53 кәсіби әртіс (акробаттар, гимнасттар, халықаралық жарыстардың чемпиондары) өнер көрсетеді. Қойылымды 7 музыкант пен 1 вокалист жанды дауыспен сүйемелдейді.
Бір қойылым үшін шамамен 800 костюм элементі пайдаланылады. Олардың барлығы Монреальдағы (Канада) штаб-пәтерде әр әртіске жеке тігілген.
Сахна артындағы дайындық
Премьера алдында журналистерге backstage аймағына кіруге мүмкіндік берілді. Ол жерде әртістер күрделі акробатикалық элементтерді пысықтап, костюмдер мұқият тексеріліп, техникалық команда жарық пен дыбыс жүйесін баптап жатты.
Бұл – көрермен көрмейтін, бірақ шоудың сапасын анықтайтын ең маңызды кезеңдердің бірі.
Әлемдік деңгейдегі әртістер
Cirque du Soleil әртістері ұзақ жылдар бойы арнайы дайындықтан өткен кәсіби акробаттар.
Бразилиялық әртіс Веллингтон Лима 28 жыл бойы компанияда жұмыс істеп, бірнеше шоуға қатысқан.
«Мен қорқыныш туралы ойламаймын. Күнделікті жаттығу мен тәжірибе сенімділік береді. Егер өміріңді осы іске арнасаң, қорқыныш өздігінен жоғалады», - дейді ол.
Ал бельгиялық акробат Йорн Де Лендар үшін бұл жұмыс – бала күнгі арманның орындалуы.
«Әр кеш сайын залдың энергиясын сезіну – мен үшін ең үлкен бақыт", деді Лендар.
Юмор және эмоция тілі
Шоудың ерекшелігі – тілсіз юмор. Барлық көріністер тек қимыл, мимика және пластика арқылы беріледі. Сол себепті шоу барлық жастағы және түрлі тілдегі көрерменге бірдей түсінікті.
Кешке келген көрермендер шоуға жоғары баға берді.
«Алғашында TikTok пікірлеріне қарап күмәндандым. Бірақ шоу басталған сәтте-ақ бәрі өзгерді. Бұл интернет айтқандай емес, одан әлдеқайда әсерлі екен» - көрермен пікірінен.
Күрделі акробатикалық нөмірлер
Қойылым барысында әуе акробатикасы, батут элементтері, қабырға бойымен секіру және топтық синхрондық нөмірлер көрсетілді.
Кей сәттерде залда толық тыныштық орнап, көрермен әр қозғалысты демін ішіне тартып бақылап отырды.
Көрермендер ең көп әсер алған нөмірлердің бірі – әуе дуэті. Ол тек акробатика емес, сенім мен үйлесімге құрылған көркем би ретінде қабылданды.
Сондай-ақ «өрмекші қыз» бейнесіндегі әртістің пластикасы ерекше әсер қалдырды. Оның қозғалысы адам денесінің мүмкіндіктерін қайта ойлауға мәжбүр етті.
Көрермендер мен журналистер ұйымдастыру жұмыстарына да жоғары баға берді.
Cirque du Soleil-дің «OVO» шоуы Алматы көрерменіне әлемдік деңгейдегі цирк өнерінің жаңа стандартын көрсетті. Күрделі акробатика, визуалды эстетика және эмоциялық әсер бір сахнада тоғысты.
Бұл тек шоу емес — адам мүмкіндігінің шексіздігін көрсететін өнер туындысы.
