Израильде парламенттік сайлауда бюллетеньдердің 85,6%-ы есептелгеннен кейін елдің қазіргі премьер-министрі Биньямин Нетаньяхуды қолдайтын блок бұрынғы Бас штаб бастығы Гади Айзенкот бастаған оппозициялық блоктан көбірек дауыс жинап отыр. Алайда бұл нәтиже үкімет құруға жеткіліксіз, деп хабарлайды «Адырна» тілшісі BBC-ге сілтеме жасап.
Алдын ала мәлімет бойынша, Кнессеттегі араб партиялары рекордтық орынға ие болуы мүмкін. Олар коалиция құруда шешуші рөл атқара алар еді. Алайда Нетаньяху да, Айзенкот та олармен ынтымақтасуға дайын емес.
28 қазанда түске қарай Израильдің Орталық сайлау комиссиясы бюллетеньдердің шамамен 93%-ы, яғни жалпы дауыс санының 85,6%-ы саналғанын хабарлады. Әзірге «қос конверттегі дауыстар» деп аталатын қашықтан берілген бюллетеньдер есептелмеген. Олар алдағы бірнеше күнде жалпы дауыс санына қосылады деп күтілуде.
Қашықтан дауыс беруге тек ерекше жағдайларда рұқсат етіледі. Бұл шетелде жұмыс істейтін дипломаттарға, сондай-ақ сотталғандарға, медицина қызметкерлеріне және созылмалы ауруы бар адамдарға қатысты. Дегенмен, мұндай тәсілмен дауыс беретіндердің басым бөлігі – әскери қызметкерлер.
Орталық сайлау комиссиясының бағалауынша, биылғы сайлауда қашықтан дауыс беруге арналған 430 мыңнан 480 мыңға дейін бюллетень тапсырылған.
Соңғы мәліметтер бойынша Нетаньяху блогы Кнессеттен 53 орынға, оның ішінде «Ликуд» партиясына 26 мандатқа үміт арта алады. Ал оппозициялық блок 48 орын иеленуі мүмкін. Екі араб партиясы өз тарихындағы ең жоғары нәтижеге қол жеткізіп, 19 орын алуы ықтимал.
Дауыстарды санау тағы бірнеше күнге, болжам бойынша, 30 қазанға дейін жалғасады.
Сайлаудың ресми қорытындысы дауыс беруден бір апта өткен соң, 4 қарашада жарияланады.
Ресми нәтижелер жарияланған соң Израиль президенті Ицхак Герцог партия жетекшілерімен кеңесіп, үкімет құруға мүмкіндігі жоғары деп санайтын үміткерді таңдайды. Таңдалған саясаткерге коалиция құру жөнінде келіссөз жүргізу үшін 28 күн беріледі. Қажет болған жағдайда президент бұл мерзімді 42 күнге дейін ұзартуы мүмкін.
