Фото: ЕРА
Австралияда қалу үшін гуманитарлық визалар берілген Иран әйелдер футбол құрамасының тағы үш ойыншысы өз шешімдерін өзгертіп, елдеріне қайтатын болды.
Австралияда өткен Азия кубогына келіп, сол жерде баспана сұраған жеті ойыншының тек үшеуі ғана елде қалды. Өткен сәрсенбіде тағы бір футболшы да Иранға қайту туралы шешім қабылдаған еді.
Иран диаспорасындағы құқық қорғаушылардың айтуынша, Австралиядан баспана сұрау өтініштерін футболшылар Захра Солтан Мешкехкар, Мона Хамуди және Захра Сарбали қайтарып алған.
Жағдайға пікір білдірген Австралияның ішкі істер министрі оның үкіметі бұл әйелдерге елде қауіпсіз болашаққа мүмкіндік беру үшін қолдан келгеннің бәрін жасағанын айтты.
«Австралия үкіметі тек мүмкіндіктерге қол жеткізуге жағдай жасап, оларды түсіндіре алады, бірақ спортшылар осындай ауыр шешімдер қабылдауға мәжбүр болатын жағдайларды өзгерту біздің қолымыздан келмейді», — деді Тони Берк мәлімдемесінде.
Бұған дейін бұл ақпаратты Иранның Спорт министрлігі де растаған болатын.
«Иран әйелдер футбол құрамасының ұлттық рухы мен патриотизмі жаулардың жоспарларын жоққа шығарды», — делінген министрліктің мәлімдемесінде.
Сондай-ақ онда Австралия үкіметі «Трампқа қолдау көрсетіп отыр» деп айыпталған.
Ислам революциясы сақшылар корпусымен байланысты Tasnim ақпарат агенттігі үш ойыншының да Куала-Лумпурға (Малайзия) ұшып бара жатқанын хабарлады. Олар сол жерде команданың басқа мүшелеріне қосылып, баспана туралы өтініштерін қайтарып алғаннан кейін «отбасыларының жылы құшағына және отанына оралады» деп айтылған.
