Home » جاڭالىقتار » بالالار ءۇيىنىڭ تۇلەگى تاكسيدەن تاۋىپ العان 6 ملن تەڭگەنى يەسىنە قايتارىپ بەردى

بالالار ءۇيىنىڭ تۇلەگى تاكسيدەن تاۋىپ العان 6 ملن تەڭگەنى يەسىنە قايتارىپ بەردى

وڭتۇستىك قازاقستان وبلىسىندا 6 ملن تەڭگەنى تاۋىپ العان جىگىت ونى يەسىنە قايتارعان. ءوزى بالالار ۇيىندە وسكەن سامات بەكەباەۆ وسىلايشا جالعىزباستى اناعا قايىرىم تانىتقان. بۇل تۋرالى قازاقپارات سايتىنا اقشاسىن جوعالتقان ايگەرىم ەسىمدى اجەي حابارلاسىپ، العىسىن جەتكىزدى. 

«مەن قۇجاتىم مەن اقشامدى جوعالتتىم. ونى سامات بەكەباي ەسىمدى جىگىت اكەپ بەردى. 6 ملن تەڭگەگە ءۇيىمدى ساتىپ ەدىم. كەيىن اقشامدى اۋىلعا الىپ بارا جاتقان جەرىمنەن جوعالتتىم. بۇل بالا مەنىڭ قۇجاتىمدى تاۋىپ العان، ىشىندە مەنىڭ اپكەمنىڭ نومەرى بولاتىن. سوعان xابارلاسىپ، مەنى تاۋىپ الدى. اقشامدى قايتاردى. ءوزى جاقىندا بالالار ۇيىنەن شىققان ەكەن»، – دەدى ايگەرىم اجەي.

بەلگىلى بولعانداي، جاس جىگىت سول كۇنى شاردارا اۋدانىنان قايتىپ كەلە جاتقان ەكەن. تاكسيگە مىنگەندە ايگەرىم ەسىمدى ايەل وتىرعان. ەكەۋى جول بويىندا اڭگىمەلەسىپ كەلگەن. شىمكەنتكە جەتكەندە اجەي ءتۇسىپ قالىپتى.

«شىمكەنتكە كەلگەندە اپا زاتتارىن الىپ، ءتۇسىپ كەتتى. ارتىنان مەن ءتۇسىپ، كولىكتىڭ جۇك سالعىشىنان زاتتارىمدى الدىم. قاراسام وندا ءبىر قارا سومكە قالىپ قويىپتى. مەنىڭ زاتىمنىڭ جانىندا ءبىر قارا سومكە تۇر ەكەن. تاكسي جۇرگىزۋشىسىنەن سۇراسام، ول مەنىكى ەمەس دەدى. سول كەزدە اپانىڭ زاتى ەكەنىن انىق ءبىلدىم. ويتكەنى ول كولىكتە تەك ۇشەۋمىز وتىرعان ەدىك. قارا سومكەنى الىپ، ۇيگە اپارىپ قويدىم. ءىشىن اشىپ قاراسام، داپتەر مەن ورامالعا ورالعان كوپ اقشا تۇر ەكەن. ءوز كوزىمە ءوزىم سەنبەدىم. سەبەبى، ومىرىمدە ونداي اقشا ۇستاعان ەمەسپىن. قايتا وراپ قويدىم دا داپتەردى اقتاردىم. سوسىن ىشىندەگى نومىرلەرگە حابارلاسىپ، اپانىڭ مەكەنجايىن سۇرادىم. اراعا 4-5 كۇن سالىپ، شاردارا اۋدانىنا قايتا باردىم. اپاعا قارا سومكەسىن تاپسىرىپ قايتتىم. سوڭىنان ريزا بولىپ ماعان راحمەت رەتىندە 56 مىڭ تەڭگە بەرىپ جىبەرىپتى»، – دەدى سامات بەكەباەۆ.

جاس جىگىت كوپ اقشانى كورگەندە ءار ءتۇرلى وي كەلگەنىن دە جاسىرمادى. بىراق ادامگەرشىلىكتەن اتتاپ كەتە الماعانىن ايتادى.

«اقشاسىن اپارىپ بەرگەنىم دە جاقسى بولعان ەكەن. سەبەبى زەينەت جاسىنداعى اجەيدىڭ اسىراپ العان مۇگەدەك قىزى بار ەكەن. سونى ەمدەتەمىن دەپ ءۇيىن بانككە كەپىلگە قويىپ، قوماقتى نەسيە الىپتى. الايدا ول قارىزىن تولەي الماعان. بولماعان سوڭ، اۋىلداعى جالعىز ءۇيىن ساتىپ، جارتى اقشاسىنا بانكتىڭ قارىزىن جاۋىپتى. قالعان اقشاسى سول قارا سومكەدە بولعان ەكەن. وعان وسى قالادان ءبىر بولمەلى پاتەر الامىن دەپ جوسپارلاپ جۇرگەنىن ايتتى. قالاي بولعاندا دا جاقسىلىق جاساپ، جامان بولمادىم. سول اقشانى اپارىپ بەرگەن كۇننىڭ ەرتەسىنە ءبىر كىسى حابارلاسىپ، پاتەر كەزەگىندە تۇرعان ماعان ءۇي بەرىلەتىنىن ايتتى. قۋانىپ كەتتىم. قازىر سول ءبىر بولمەلى ءۇيىمدى الىپ، وسىندا تۇرىپ جاتىرمىن»، – دەيدى جاس جىگىت.


اينۇر اقباەۆ

matritca.kz

پىكىر جازۋ

پوچتا جاريالانبايدى. تاڭداۋلى ءورىستى تولتىرىڭىز *

*

x

Check Also

سەمەي كونسەرۆىلەنگەن ونىمدەردى ماسكەۋگە ەكسپورتتاۋدا

سەمەي قالاسى رەسەي فەدەراتسياسىنا 60 مىڭ توننا ەت ونىمدەرىن ەكسپورتتادى. بۇل تۋرالى ءباسپاسوز ءماسليحاتىندا قالالىق ...