Қазақстанда тоғыз банк таратылады. Бұл туралы Қаржы нарығын реттеу және дамыту агенттігі мәлімдеді деп хабарлайды "Адырна" ұлттық порталы.
Агенттік лицензиялары кері қайтарып алынған банктерді тарату өндірісінің тәртібі, процесі және қазіргі жай-күйі туралы мәлімет берді.
"Қазіргі уақытта 9 банк – Валют-транзит банк, Қазинвестбанк, Delta Bank, Эксимбанк Қазақстан, Астана Банкі, Qazaq Banki, Tengri Bank, AsiaCredit Bank және Capital Bank Kazakhstan таратылу сатысында", - делінген хабарламада.
Банк қызметін тоқтату кезіндегі негізгі мақсат – кредиторлардың талаптарын қанағаттандыру, олармен есеп айырысуды қамтамасыз ету және банктің барлық операциясын аяқтау.
Банк кредиторларының талаптары банктер туралы заңда белгіленген кезекпен қанағаттандырылады:
- бірінші кезекте, еңбекақы төлеу мен жеке тұлғалар бойынша талаптар қанағаттандырылады.
- екінші кезекте, жеке тұлғалардың депозиттері бойынша кепілдік берілген сома шегінде "Қазақстанның депозиттерге кепілдік беру қоры" АҚ алдында есеп айырысу.
- үшінші кезекте, банк мүлкінің кепілімен қамтамасыз етілген міндеттемелер бойынша есеп айырысу.
- төртінші кезекте, үлестес тұлғалар болып табылмайтын жеке тұлғалардың ҚДКҚ кепілдік берілген сомасынан асатын депозиттері бойынша, сондай-ақ зейнетақы активтерінің есебінен жүзеге асырылған депозиттер бойынша және "өмірді сақтандыру" саласы бойынша жүзеге асырылған сақтандыру ұйымдарының депозиттері бойынша есеп айырысуы.
- бесінші кезекте, коммерциялық емес ұйымдардың жекелеген санаттар (қайырымдылық ұйымдары, соғыс ардагерлері, мүгедектер қоғамдары) алдында есеп айырысуы.
- алтыншы кезекте, үлестес емес заңды тұлғалардың депозиттері бойынша есеп айырысу.
- жетінші кезекте, салықтар, алымдар және бюджетке төленетін басқа да міндетті төлемдер бойынша есеп айырысу, республикалық бюджет қаражаты және Ұлттық қордың қаражаты есебінен берілген қарыздар.
- сегізінші кезекте, қалған кезектерге кірмеген басқа кредиторлар алдында есеп айырысу.
- тоғызыншы кезекте, үлестес жеке және заңды тұлғалардың депозиттері бойынша есеп айырысу.
- оныншы кезекте, реттелген борыш және мерзімсіз қаржы құралдары бойынша есеп айырысу.
"Адырна" ұлттық порталы.
