Қазақ қызы Қытайдағы халықаралық төрелік соттың судьясы болып тағайындалды, деп хабарлайды «Адырна» тілшісі «Хабар 24»-ке сілтеме жасап.
Отандасымыз Гүлнұрдың Қытай астанасында жұмыс істеп жатқанына 10 жылдай болды. 3 жыл бұрын ол осында компаниясын ашқан. Қазір ТМД елдерімен әріптестік орнатқысы келетін жергілікті бизнесмендерге ақыл-кеңес береді. Төрелік сот судьясы болып тағайындалу Гүлнұр үшін тосын жаңалық болды. Ол бұл шешімді «Бір белбеу – бір жол» стратегиясын іске асыру аясында сұраныстың артуымен байланыстырады.
«Төрелік туралы заң бойынша тек Қытай азаматтары ғана төрелік соты бола алады. Бірақ төрелік ісі шетелмен байланысты болғанда рұқсат етіледі. Осы тұрғыда Халықаралық сауда палатасы шетелдік арбитрларды ұсынады. Бір тарап Орталық Азия немесе ТМД елдерінен болғанда, осы елдерге қатысы бар арбитрды таңдау қолайлы болады»,-дейді ол.
Гүлнұр қазақ елінде мемлекеттік қызметте, адвокаттар алқасында және квазимемлекеттік секторда жұмыс істеген. Қазақстанның тұңғыш Салық кодексін жасауға қатысқан. Кейін ол Бейжің университетінде қытай құқығын игерген. Бірақ жоғары оқу орнын бітірген соң жұмыс таба алмай біраз жүріп қалғанын жасырмайды. Заң бойынша Қытай құқығымен тек осы елдің азаматтары айналысуы тиіс. Гүлнұр жас отандастарына осыған назар аудару қажеттігін ескерткісі келеді.
«Ең маңыздысы, қытайлық серіктесті әбден тексеру қажет. Келісімнің нақты іске асатынын зерттеп, алдын ала біліп алған жөн. Бұл нарыққа кірмес бұрын құқықтық қорытындыны даярлап алу керек. Бұл кейін теріс келісімге ұрынып, шығынға батпас үшін өте маңызды»,-деп сөзін толықтырды отандасымыз.
Гүлнұр докторлық диссертациясын сәтті қорғаған соң қазақстандық заңгерлерге халықаралық деңгейге шығуға қолдан келгенше көмектесетінін айтады.
«Адырна» ұлттық порталы
