Алматының бас санитар дәрігері Жандарбек Бекшин Алматыда локдаун енгізіле ме деген сұраққа жауап берді, - деп хабарлайды "Адырна" тілшісі.
«Барлығы қаладағы эпидемиологиялық ахуалға байланысты. Халыққа қауіпсіздік шараларын түсіндірудеміз. Сонда да заңбұзушылықтар болып жатыр. Егер маскалық режим сақталса, әлеуметтік қашықтық күшінде болса, адам көп шоғырланған жерлерге бармайтын болсақ, онда эпидахуал тұрақты болады. Қазір ауру көрсеткішін өсірмеу үшін барлық шара қабылданып жатыр. Алайда көп нысандар қауіп тобына жатады. Бұл караоке, бар, бильярд тағы басқа нысандар. Осындай нысандарға баруды доғара тұрсақ, локдаун енгізілмейді», - деді қаланың бас санитарлық дәрігері Жандарбек Бекшин.
Сонымен қатар қаланың бас санитар дәрігері топтасып жиналмауға, отбасылық іс-шара өткізбеуге шақырды, тұрғындарға шетелге шықпауға кеңес берді.
"Инфекция жұқтырған азаматтарымыздың басым бөлігі Түркия, БАӘ мен Мысырдан келіп жатқаны байқалады. Қазір Ресейде, Түркияда жағдайдың қаншалықты күрделене түскенін көріп отырмыз", – деді ол.
Соңғы мәліметтер бойынша, Алматыда коронавирус жұқтырғандар саны 14 539-ға жетті, оның ішінде 14 156 адам сауығып кеткен. 275 адам қайтыс болған.
"Адырна" ұлттық порталы
