Жамбылдықтар 2023 жылы толық ауыз сумен қамтылады

1265

«Өңірлерді дамыту – 2020» бағдарламасы аясында елді мекендерді ауыз сумен қамтамасыз ету сәтті жүзеге асырылып жатыр. Аталған бағдарламаның арқасында 2025 жылға дейін қалалар 100 пайыз, елді мекендер 80 пайызға ауыз сумен қамтылмақ.  Жалпы «Өңірлерді дамыту» бағдарламасы аясында 400 жоба жүзеге асырылып, 23 мың шақырым су құбыры тартылды.

Ал Жамбыл облысындағы елді мекендердің барлығы алдағы үш жылда таза ауыз сумен қамтылады. Облыстық Энергетика және тұрғын-үй коммуналдық шаруашылығы басқармасының басшысы Нұрлан Алдамжаровтың айтуынша, бұл бағыттағы жұмыстар кезең-кезеңімен жүзеге аспақ. Сондай-ақ ол өңірдегі 377 елді мекеннің 55 пайызы орталықтандырылған ауыз сумен қамтылғанын тілге тиек етті.

«2023 жылға дейін тіршілік нәрімен облыс тұрғындарын 100 пайыз қамту жоспарланып отыр. Қазіргі таңда облыстағы 205 елді мекен орталықтандырылған ауыз суға қосылған. Дегенмен, тексеру барысында ондағы 129 мыңнан аса халықтың таза ауыз жүйесіне әлі күнге қосылмағаны анықталды. Осы орайда жүргізілген жұмыстар нәтижесінде бүгінге дейін 81 мыңнан аса халық ауыз суға қол жеткізсе, ағымдағы жыл соңына дейін бұл көрсеткіш 105 мыңға жетпек. Қазіргі таңда 10 елді мекенге жаңадан су құбырын тарту жұмыстары жүргізілуде. Келер жылы – 18, 2021 жылы – 41, 2022 жылы 47 елді мекенге су тарту шаралары жоспарланған. Сондай-ақ, халық саны 200-ге дейінгі 49 елді мекенді облыстық бюджет негізінде бірыңғай оператор құру арқылы ауыз сумен қамту шаралары ұйымдастырылатын болады», – дейді Н.Алдамжаров.

2021 жылы Тараз және Шу қалаларының тұрғындарын толықтай орталықтандырылған ауыз сумен қамту жоспарланған. Қала және аудан басшылары қамтылмаған алқабтарға жобалар әзірлеп, осы нәтижеге қол жеткізу үшін жұмыстарды ұйымдастырулары қажет.

Жалпы «Өңірлерді дамыту – 2020» бағдарламасы аясында Жамбыл облысының ауыл-аймақтарын ауызсумен қамтамасыз ету қарқынды түрде жүргізіліп келеді. Мысалы өткен жылы жоспарланған ауыз сумен қамтуға 10 нысан пайдалануға берілді. Нақтырақ айтсақ,  Жамбыл ауданы – Пригородное және Тоғызтарау ауылдары, Қордай ауданы – Аухатты ауылы, Талас ауданы – Қызыләуіт, Байзақ ауданы – Кенес, Абай, Мырзатай, Тегістік ауылдары. Т.Рысқұлов ауданы- Луговое, Шу ауданы – Қонаев ауылы.

«АДЫРНА»

ұлттық порталы

 

Пікірлер
Редакция таңдауы