Иран мен Израиль қақтығысы. Соққының салдары қандай?

13 маусым күні кешке Ираннан Израильге жүздеген зымыран атылды, деп хабарлайды “Адырна” ұлттық порталы. Иран тарапының мәліметінше, шабуылдың басты нысандары – әскери аэродромдар, ұшқышсыз ұшу аппараттары орналасқан базалар мен қорғаныс министрліктерінің ғимараттары. Ирандық БАҚ Тель-Авивтегі қорғаныс министрлігі екі мәрте зымыранмен атқыланғанын хабарлады. Сонымен қатар, ұлттық қауіпсіздік министрлігінің ғимаратына да зақым келгені айтылды. Fox News телеарнасы Израильдегі «Кирья» әскери кешеніне жасалған шабуыл нәтижесінде айтарлықтай шығын болғанын жазды. Бұл кешен Пентагонға ұқсас маңызды нысан саналады. Израиль Қорғаныс армиясының (ЦАХАЛ) деректеріне сүйенсек, шабуыл кезінде Иран жүзден аз баллистикалық зымыран қолданған. Олардың көбі әуеде жойылған. Дегенмен, кейбір ракеталар ғимараттарға түсіп, жарақат алғандар тіркелді. Түркиялық ақпарат көздері жараланғандар саны 90-нан асқанын мәлімдеді. The Jerusalem Post дерегінше, төрт адам қаза тапқан. Тель-Авив, Иерусалим, Беэр-Шева – қираған ғимараттар мен зардап шеккен аудандар бар. Құтқарушылар қирандылар астынан адамдарды іздеуде. CNN хабарлауынша, жоғары шенді әскери қызметкерлер мен министрлер қауіпсіздік кеңесіне жиналған. Сарапшылар шабуылдың мақсаты туралы әртүрлі пікірде. Саяси шолушы Анатолий Несмиянның айтуынша, Израиль Иранның ядролық бағдарламасын тоқтатуды көздеген. Ал Иранның соққысы қарымта шабуыл ретінде бағаланады – нақты әскери стратегиясыз, тек жауап ретінде жасалған әрекет. Иран тарапы алдағы уақытта тағы 2 000 зымыранмен соққы беретінін мәлімдеді. Бұл жағдай халықаралық алаңдаушылық тудырды. Америкалық сарапшы Джеффри Сакс пен Польша премьері Дональд Туск Таяу Шығыстағы бұл қақтығыстың үшінші дүниежүзілік соғысқа ұласу қаупі бар екенін ескертті.