Home » ايدارلار » ونەر » ەركىن شۇكىمانوۆ: جاقسى ءانشى بولعانىڭمەن، جاقسى ۇستاز بولا الماۋىڭ مۇمكىن

ەركىن شۇكىمانوۆ: جاقسى ءانشى بولعانىڭمەن، جاقسى ۇستاز بولا الماۋىڭ مۇمكىن

– «اتاق تا جوق، جاتاق تا جوق» دەگەن ءبىر سۇحباتىڭىزدى وقىپ ەدىم. ءتاۋ ەتكەن تاۋەل­سىزدىگ­ى­مىز­دىڭ 20 جىل­دىق تويىندا «قا­زاق­ستاننىڭ ەڭبەك سىڭىرگەن قاي­­رات­كەرى» اتان­دىڭىز. اتاق ال­­عان­نان كەيىنگى كوڭىل كۇيىڭىز، كۇن كورىسىڭىز قالاي بولىپ جا­تىر؟

– جالپى، ول سۇحباتتا اتاق پەن جاتاقتى جەكە ءوز باسىما سۇراعان جوق ەدىم. اينالامداعى اتى دارداي قىز-جىگىتتەردى ايت­پاعاندا، ونەردە ەسكەرۋسىز جۇرگەن مەنىڭ اكەمدەي كiسiلەر كوپ. ماسەلەن، تۇرسىنعازى راحيموۆ اعام ءالى ءتيىستى ورىنداردان ءوز باعاسىن العان ەمەس. شاكارىمنىڭ ءانىن ناسيحاتتاعان جالعىز قازاق كەلدەنباي ولمەسەكوۆ ۇكىمەتتەن ءبىر جاقسىلىق كورمەي، ومىردەن ءوتىپ كەتتى. «قازاقكونتسەرت» ءبىر­لەستىگىندە بىرگە جۇمىس جاسايتىن الپىستى القىمداعان سەمبەك جۇماعاليەۆ پەن ەردىڭ جاسى — ەلۋدەن اسقان جولامان قۇجي­مانوۆ­تىڭ قولىن قاشان «قۇتتى بولسىن» ايتىپ قىسادى ەكەنبىز؟! قۇرمانعازى اتىنداعى قازاق ۇلتتىق كونسەرۆاتوريانىڭ سى­بىز­عى سىنىبىنىڭ اعا وقىتۋ­شىسى، قا­زاقتان شىققان تۇڭعىش كاسىبي سى­بىزعىشى، ەلباسىنىڭ تاپ­سىر­ماسىمەن مادەنيەت مي­نيس­تر­لىگى شىعارعان «قازاقتىڭ ءداس­تۇرلى 1000 كۇيى» اياسىندا 100 سى­بىزعى كۇيىن حالىققا جەتكىز­گەن تالعات مۇقىشەۆتiڭ، قۇر­مان­عازى اتىنداعى قازاق ۇلتتىق كونسەرۆاتورياسىنىڭ پروفەس­سورى، تاتتىمبەت اتىنداعى شەرت­پە كۇي سىنىبىنىڭ جەتەكشىسى ءبىلال ىسقاقوۆتىڭ، شەرتپە كۇيدىڭ شەبەرى سۇگىردىڭ مۇراسىن كوزىنىڭ قاراشىعىنداي قورعاپ، ساقتاپ كەلە جاتقان قازاق ۇلتتىق ونەر ۋنيۆەرسيتەتىنىڭ دوتسەنتى جانعالي جۇزباەۆتىڭ ەڭبەگى دە جوعارى اتاققا تۇرارلىق. كەيىنگى بۋىننىڭ ىشىندە دە جاس تا بولسا باس بولىپ، قىرۋار شارۋا تىندىرعان ازاماتتار بار. ەلگە تالانتىمەن تانىلىپ ءجۇر­سە دە جۇمساق جەرگە جايعاسقاندار ولاردى توپقا قوسقىسى كەلمەيدى. سىي-قۇرمەتتەرىن ايايتىن ءتارىزدى.

اتاپ ايتقاندا، «قازاقتىڭ ءداس­تۇرلى 1000 كۇيى» مەن «قازاقتىڭ ءداستۇرلى 1000 ءانىن»، «قازاقتىڭ وركەسترمەن ورىندالاتىن 100 ءان-كۇيىن» جيىستىرعان سايان اق­مولدانىڭ ماڭداي تەرىن نەگە باعالاماسقا؟! كون­سەرۆا­توريا­نىڭ فولكلورلىق كابينەتىندەگى ۇزىلەيىن دەپ تۇرعان بۇكىل ەسكى تاسپالاردى ساندىق فورماتقا كوشىرىپ، قىرىق جىل جاڭار­تىل­ماعان مۇراعاتتى تۇگەل اۋديو ديسكىگە اسقان شىدامدىلىقپەن كوشىرىپ شىقتى. ايىنا سەگىز مىڭ تەڭگە جالاقىمەن قانشاما ۋاقى­تىن كۇن تۇسپەيتىن كولەڭ­كەدە، شاڭ باسقان مۇراعات قويما­لارى مەن جەرتولەسىندە سارپ ەتتى. بۇل ونەرگە تانىتقان ادالدىق، حا­لىققا ءسىڭىر­گەن ەڭبەك ەمەي نە­مەنە؟! ەكىنىڭ ءبىرىنىڭ قولىنان كەلەتىن ءىس ەمەس. «ماڭگىلىك سارىن» انتولوگياسىن شىعارعان دا سايان بولاتىن. ودان بولەك، بۇكىل تەح­نيكالىق قۇرال-جابدىقتارىن كو­تەرىپ، اۋىل-اۋىل­دى ارالاپ، كونە كۇيلەردى حات­قا ءتۇسىردى. سونىڭ ءبارى بيلىكتىڭ ءبىر اۋىز راقمەتىنسىز ەش كەتۋى كە­رەك پە؟

شىعىس كۇيلەرىن زەرتتەپ، نو­تاسىن تۇگەندەپ، وننان استام مۋ­زىكا­لىق كىتاپتار شىعارعان كۇيشى مۇ­رات ابۋعازى مەن قۇرمانعازى اتىنداعى قازاق ۇلتتىق كون­سەرۆاتورياسىنىڭ اعا وقىتۋشىسى، ءداستۇرلى ءانشى ارداق يساتاەۆانىڭ، اتى ۇمىتىلىپ كەتكەن كومپو­زيتورلاردىڭ ءانىن قايتا ءتىرىلتىپ، ورىنداپ جۇرگەن تىلەۋلەس قۇرمان­عاليەۆتىڭ، ءانشى-جىرشى، فيلو­لوگيا عىلىمدارىنىڭ كانديداتى ۇلجان بايبوسىنوۆانىڭ ساحنادا تەر توككەنىنە قانشاما جىل بول­دى. مەن «اتاق جوق» دەگەنىمدە، ءمى­نە، وسىنداي ازاماتتاردىڭ ەڭ­بە­­گىنىڭ جانباي جۇرگەنىن ايتقان ەدىم.
– ارىپتەستەرىڭىز ءۇشىن جانىڭىز اۋىرىپ وتىرعانى بايقالادى. ال اينالاڭىزداعىلار ءسىزدىڭ جۇلدى­زىڭىز جانعان ساتتە ءبىراۋىزدان قۇت­تىقتاپ، قۋانىشىڭىزدى شىن جۇرەكتەن بولىسە الدى ما؟
– ارينە. الدىمەن رامازان ستامعازيەۆ اعامىز حابارلاسىپ، اق تىلەگىن بىلدىرگەندە، از ۋاقىت بۇرىن ومىرگە كەلگەن سابيىمە قۇتتى بولسىن ايتىپ جاتىر ەكەن دەپ ويلاپ قالدىم. وعان دەيىن ءوزىم دە بىلمەگەن ەدىم. ماسەلەنىڭ ءمانىسىن ۇققاننان كەيىن قۋانعا­نىمدى جاسىرمايمىن. سەبەبى بۇل اتاققا جەتكەن دە، جەتپەگەن دە بار. بۇل ماعان قۇدايدىڭ بەرگەن ءبىر نەسىبەسى شىعار. ءبىر قاراسام، ەر­تە العان سياقتىمىن. ەرەن ەڭ­بەك­تەرىن جوعارىدا اتاپ كەتكەن اعالارىمىزدىڭ الدىندا ءوزىمدى ىڭعايسىز سەزىنىپ تە ءجۇرمىن. سول كى­سىلەردىڭ الدىنا ءتۇسىپ كەتكەن سەكىلدىمىن. ەندى ءبىر قاراسام، ۋا­قىتىندا بۇيىرعان ءتارىزدى. اللا ءناسىپ ەتسە، ءبىر جىلدان كەيىن قى­رىققا تولامىن. قىرىققا كەلگەن­شە قاشانعى جاس ءانشى اتانىپ ءجۇ­رەمىز، ساقا ءانشى بوپ قالدىق قوي.
– «ءبىرجان سال» فيلمىندە ءانشى-كومپوزيتوردىڭ اندەرىن ورىن­داعاننان كەيىن دوسحان جولجاقسى­نوۆ ماراپات الۋعا كومەكتەسىپتى» دەگەن اڭگىمەلەر ەستىپ قالدىم. ءسىز بۇعان نە دەيسىز؟
– الىسقا بارماي-اق، ءوز ور­تامداعى كەي زامانداستارىم «جى­لاپ ءجۇرىپ، سۇراپ العان اتاعى عوي» دەپ سىرتىمنان كۇڭكىلدەپ جاتقان كورىنەدى.
شىندىعىندا، بيىل «قازاق­كون­تسەرت» ونەر بىرلەستىگىنىڭ باي­ىر­عى قىزمەتكەرى رەتىندە التىن­بەك اعامنىڭ الدىنا بارىپ، نۇر­جان جانپەيىسوۆ ەكەۋمىز «قۇ­جاتتارىمىزدى ۇسىنىپ كو­رەيىك» دەگەنىم راس. ءارى قاراي «اعا-كوكە، وسىلاي بولىپ جاتىر ەدى، ءبىر دە­مەپ جىبەرسەڭىز» دەپ باسقا ەشكىم­نىڭ مازاسىن الىپ، تەلەفون سوق­تىرمادىم. اراعا ادام سال­عانىم جوق. كەرەك دەسەڭ­ىز، قول قويىلادى دەپ كۇتپەگەنمىن. «بيىل ىلىنبەسەم، كەلەسى جىلى تاعى كو­رەر­مىز» دەپ ىشتەي ءوزىمدى جۇباتىپ جۇرگەنمىن. ناق فيلمدە ورىندالعان ءان ءۇشىن بەرىپتى دەيتىن بولسا، وندا وسىدان ءۇش جىل بۇرىن بەرۋ كەرەك ەدى. بۇل مەنىڭ تۇتاس شىعارما­شى­لىعىما بەرىلگەن باعا دەپ قا­بىل­داعانىمىز ءجون بولار. وز باسىم اسا اتاققۇمار جان ەمەس ەدىم. بىراق بۇل سەنىڭ شى­عار­ماشىلىق وسۋىڭە، ءارى قارايعى ىزدەنىسىڭە، شاكىرتتەرىڭنىڭ الدىن­دا كەرەك ەكەن. ونى مەنىڭ قاتار­لاس­تارىم جاقسى بىلەدى. قۇدايعا شۇكىر، اتاقتىمىن دەپ اياقاستىنان وزگەرىپ شىعا كە­لىپ، اقىلدى كوزبەن الىسقا قاراپ قالعان جايىم جوق. باياعى سول قالپىم. ەندى الماعاندار السا ەكەن دەپ تىلەيمىن.
– اتاق ماسەلەسى تۇسىنىكتى بول­دى، جاتاققا كەلەيىكشى…
– بۇل دا ونەردە، ادەبيەتتە، تەا­تردا جۇرگەن دارىندى، جالىن­دى جاستارعا قاتىستى. الماتى قالاسىن يمانعالي تاسماعامبەتوۆ باسقارىپ تۇرعان كەزدە جان-جاق­تان كەلىپ، وسىندا جۇمىس جاساپ جاتقان تالانتتى قىز-جىگىتتەرگە جاپپاي باسپانا بەرىلدى. ەلدىڭ ءبارى قارق بولىپ قالدى.
سول جولى ىلىكپەگەن جاستاردا «كەلەسى جولى ءبىز دە قونىس تويىن تويلاپ قالارمىز» دەگەن ءبىر ءۇمىت پايدا بولعان. سول تىزىمدە ءوزىمىز دە بار ەدىك. قازىر ءۇيسىز-كۇيسىز ءجۇر­­گەندەردىڭ بارلىعىنا سول باع­دارلاما، سول جاقسىلىق ارمان بو­لىپ قالدى. جاقسى ءۇردىس جال­عاسىن تاپپادى.
قىستا سالىنىپ، جازدا ەرىپ كە­تەتىن مۇز قالاشىققا جۇمسالعان قارجىعا قاراپ، كەيدە ءىشىم كۇيىپ كەتەدى. سۋ بوپ اققان اقشاعا ودان دا جىلىنا 20-30 بولسا دا پاتەر سالىنسا عوي. ءبىر قۋانارلىعى، ەل­باسىنىڭ بيىلعى حالىققا جول­داۋىندا قولجەتىمدى باسپانا ءما­سە­لەسىن شەشۋ ءتيىستى ورىندارعا تاپسىرىلدى. وسىعان قۋانىپ، جا­تاق ماسەلەسى دە كوپ ۇزاماي شەشى­لەتىن شىعار دەپ سەنىپ وتىرمىز.
– جاقىندا ىقىلاس اتىنداعى مۋ­زىكالىق حالىق اسپاپتار مۇرا­جايىنىڭ جانىنان قۇرىلعان «ءون­ەر» حالىقتىق-قوعامدىق ۋنيۆەر­سي­تەتىنىڭ باستاماسى تۋرالى نە ايتار ەدىڭىز؟
– ۇلتتىق كلاسسيكالىق ونەردى ناسيحاتتاپ جۇرگەن ازامات رەتىندە بۇل باستامانى قولدايمىز. قازىرگى كەزدە ءداستۇرلى ورتالىق تۇگىلى، وبلىس ورتالىقتارىندا، ۇلكەندى-كىشىلى قالالارداعى مۋزىكالىق وقۋ ورىندارىندا ءداستۇرلى ءان كلاستارىن اشۋ مۇڭعا اينالىپ با­را جاتقان سياقتى. جاقىندا وڭ­تۇستىك وڭىردە جۇمىس ىستەيتىن ءبىر ءىنىمىز مۋزىكالىق كوللەدج قابىر­عاسىنان ءداستۇرلى ءان سىنىبىن اشاي­ىن دەسە، جەرگىلىكتى باسشىلار «ارقا، جەتىسۋiڭ كەرەك جوق. تەك قازىعۇرتتىڭ ءان مەكتەبىن اش» دەيتىن كورىنەدى. و زامان دا، بۇ زامان «قازىعۇرتتىڭ ءان مەكتەبى» دەگەن تاريحتا قالىپتاسپاعان. سون­دا ارقادا تۋعان ءبىرجان ءوڭتۇس­تىككە جات پا ەكەن؟ رۋ-رۋعا، جەر-جەرگە ءبولىنۋ ءان-جىرعا دا كەلىپ جەتكەنىن، قارامايسىز با؟ وسىن­داي ادام ساناسىنا سىيمايتىن الاۋ­ىز­دىق بوي كوتەرىپ تۇرعان ۋا­قىتتا ءداستۇرلى ونەر ورتالىقتارى بىزگە اۋاداي قاجەت. بىراق سيىرقۇيىمشاقتانىپ، بولماسا جەكە ءبىر ادامنىڭ ءمۇد­دەسىن كۇيتتەپ كەتىپ قالماسا ەكەن دەپ ويلايمىن. جىگىتتەر «باسىن باستاپ كورەيىك» دەپ جاتىر عوي. دەگەنمەن بۇعان مىندەتتى تۇردە مەملەكەتتەن قولداۋ بولسا ەكەن دەيمىن. اتانىڭ ءسوزى مەن انانىڭ ونەرىن جالعاستىرۋ ءۇشىن قازىنا­دان ارنايى قارجى ءبولىنۋى ءتيىس. ءتۇرلى باسىلىم بەتتەرى مەن تەلە­ارنالار ءان-كۇيىمىزگە جاناشىر­لىق تانىتىپ، ناسيحاتتاۋعا ىنتا­لى بولۋعا مىندەتتى. جان-جاقتان دەمەۋ بولسا، شىعارماشىلىق ۇجىم ءوزارا اقىلداسىپ، حالىق يگىلى­گىنە لايىقتى قىزمەت ەتەتىنى ءسوز­سىز.
– قازاقستان ارناسىنداعى «كەش جارىق» باعدارلاماسى تۋرا­لى ويىڭ­ىزدى بىلسەك…
– شىنىمدى ايتسام، يدەيا اۆ­تور­لارىنىڭ ماقساتىن اسا ءتۇ­سىنىڭ­كىرەمەدىم. مەنىڭشە، ءالى دە ءوزىنىڭ كونتسەپتسياسىن ايقىن­دا­ماعان، ءبىر قايناۋى ىشىندە جاتقان باعدارلاما. ولقى تۇستارى كوپ. اسىرەسە، انشىلەر ساحناعا شىعىپ كەلە جاتقاندا جۇرگىزۋشىنىڭ «داي­ىندىعىڭىز قالاي؟ وزىڭىزگە سە­نىم­دىسىز بە؟» دەگەن سياقتى سۇراق­تار قويىپ تۇرىپ الاتىنى ۇنا­­­ماي­دى. سوعان كەتكەن قايران 4-5 مينۋت ۋاقىت. ونىڭ ورنىنا جاقسى-جاقسى پىكىرلەرگە جول بە­رىلسە عوي.

تاعى ءبىر تۇسىنبەيتىنىم، كون­سەر­ۆاتوريا قابىرعاسىندا ءداستۇر­لى ءان سىنىبىن ءبىتىرىپ، جۇرتشى­لىققا ەسترادامەن تانىلعان ءان­­­شىلەر­دى ءداستۇرلى ءانشى رەتىندە قايتادان ەسترادالىق تۋىندى ايت­قىزىپ جاتاتىندارى. ەسترادانىڭ ءدامىن تاتىپ كورگەن ادامداردان گورى، سوڭعى كۋرستىڭ ستۋدەنتتەرىن شاقىرعان الدەقايدا ۇتىمدىراق. «كەش جارىق» رەيتينگ كوتەرگىسى كەلسە، اۋىل-ايماقتاعى ونەرپاز­دار­دى شاقىرسىن.

سوندا باعدار­لاما ءارى قىزىقتى، ءارى جان-جاق­تاعى ءداستۇرلى ونەر يەلەرىنىڭ تا­­نىلۋىنا مۇرىندىق بولار ەدى. ەڭ قىزىعى، فونوگرامماعا سە­نىپ العان جۇلدىزداردىڭ جاعدايى بەلگىلى بولىپ قالدى. ەسترادا ءان­شىلەرىنىڭ بىرەن-سارانى عانا ءوز داۋىسىمەن ءان ايتا الاتىنىن باي­قادىق. ەگەر فونوگراممانى الىپ تاستاساق، ساحنادان الىس­تاتىن انشىلەردىڭ كوپ ەكەنىنە تاعى ءبىر كوز جەتكىزدىك.
– ءسىزدى شاقىرسا قالاي قاراي­سىز؟
– ماعان قاتىسۋعا ۇسىنىس جا­سالدى، بىردەن باس تارتتىم. ايجان نۇرماعامبەتوۆا اپامىز مەنىڭ اندەرىمدى تاڭداعان ەكەن. ول كى­سى­نىڭ رەپەرتۋارى مەنىڭ بولمىسىما مۇلدە كەلمەيدى. ءوزىم سانالى ءتۇر­دە ەسترادانىڭ ەسىگىن اشپاق تۇگىلى، قاقپاعان دا اداممىن. سوندىقتان ەل الدىنداعى ابىرويىمدى توك­كەن­شە، وسى قالپىمدا قالا بەر­گەنىم ءجون شىعار. بىراق ساراپشىلار القاسىندا پىكىر بىلدىرۋگە كەلىستىم.
– ءسىزدىڭ پىكىرىڭىزگە رەنجىگەن­دەر بولدى ما؟
– قايرات بايبوسىنوۆ اعامىز بىردە «قازىرگى جاستار ءبىر-بىرىمەن پىكىرلەرى كەرەعار بولىپ قالسا، ەندى قايتىپ كورمەستەي بولىپ ارازداسىپ كەتەدى. باياعىدا ءجانى­بەك ەكەۋمىز ءبىر شالدىڭ تاربيەسىن الساق تا ونەر جونىندەگى ويلارى­مىز كەلىسپەي، داۋلاسىپ قالاتىن-بىز. كەشكە جاقىن ايتىسىپ-تار­تىسىپ، ءبىر-ءبىرىمىزدى كورمەيتىندەي بولىپ كەتەتىنبىز. ەرتەڭىنە تۇك بولماعانداي، قۇشاقتاسىپ-كورىسىپ جاتاتىنبىز» دەپ ايتقانى بار ەدى. سول سياقتى قازىر كەرەعار پىكىر بىلدىرگەنىممەن، ارتىندا ءزىلىم جوق. جالپى، ومىردە دە ەشكىممەن ات-تون كەسىسىپ كەتكەن ەمەسپىن. شامام كەلگەنشە ۇلكەنمەن دە، كىشىمەن دە سىيلاسۋعا تىرىسامىن. ادەبيەتكە، ونەرگە كەلگەن كەيىنگى جاستارمەن دە ارالاسىپ تۇرامىز.
– قۇرمانعازى اتىنداعى قازاق ۇلتتىق كونسەرۆاتورياسىندا وقى­تۋ­­شى­لىق قىزمەتتەسىز. جۇمىسىڭىز جايلى ما؟
– كونسەرۆاتورياعا حالىق مۋ­زى­كاسى فاكۋلتەتىنىڭ دەكانى كا­ريما ساحارباەۆا مەن حالىق ءانى كافەدراسىنىڭ مەڭگەرۋشىسى ساۋلە جانپەيىسوۆا شاقىردى. 2009 جىلدان بەرى شاكىرت تاربيەلەپ جاتقان جايىم بار. جالپى، 2004 جىلى كونسەرۆاتوريا بىتىرگەن ۋا­قىتتا ۇسىنىس تاستالعان. بىراق جاز سوڭىنداعى گاسترولدىك ساپار­دىڭ ۇزاققا سوزىلۋىنا بايلا­نىس­تى وقۋ جىلىنا كەشىگىپ قالدىم. قازىر ساباق بەرۋدىڭ دە وڭاي ەم­ەس ەكەنىن ەندى ءتۇسىنىپ كەلە جا­تىرمىن.
جاپ-جاقسى دايىندىقپەن كەل­گەن بالالاردى بۇزىپ الامىن با دەپ قورقامىن. جاقسى ءانشى بولۋىڭ مۇمكىن، بىراق جاقسى ۇستاز بولا الماۋىڭ مۇمكىن ەكەن.
ۇلكەن تاجىريبە قاجەت كورىنە­دى. مۇعالىمنىڭ جۇمىسى ءبىز ويلا­عاننان دا اۋىر ەكەنىنە كوز جەتكىز­دىم. كەيبىر ماسەلەلەرگە قاتىستى اراسىندا قايرات اعامىزعا حابار­لاسىپ، كەڭەس الىپ تۇرامىن.
– ءوزىڭىز كىمدەرگە كەڭەس بەرىپ، اعالىق جول كورسە­تە الدىڭىز؟
– وزىمنەن كەيىنگى جاس ءانشى­لەر­دىڭ جارىققا شىعۋىنا قولىم­نان كەلگەنشە كومەكتەسۋگە دايىن­مىن. جەتەكتەۋگە تاتيتىندارىن سۇيرەۋدەن قاشپايمىز.
بىراق بەتتىڭ ارىن بەلبەۋگە ءتۇيىپ، قايتكەندە شىعارامىن دەپ جانتالاسىپ كورمەپپىن. «بىرەۋدى سۇيرەپ، تانىمال جاساۋ» — پرو­ديۋسەرلىك ورتالىقتاردىڭ جۇمىسى. ونداي قىزمەتپەن اينالىسىپ كورگەنىم جوق.
– جەتەككە ىلەسپەگەندەر دە بول­عان سياقتى…
– مەن وكىنەتىن ءبىر-ەكى جاعدايدىڭ بولعانى راس. ءبىرىن ءوزىمنىڭ تۋ­عان جەرىم — سەمەي وڭىرىنەن الما­تىعا شاقىرعانمىن. ەكىنشىسى — قىتاي ەلىنەن كەلدى.
بىرەۋىن ءۇش جىل، ەكىنشىسىن ەكى جىل سۇيرەگەن ەڭبەگىم دالاعا كەت­تى. اقىرى بولماعان سوڭ، ءوزىم شى­عارىپ سالدىم. مەنىڭ ءۇمىت ارت­قان ونەرپازدارىمنىڭ ىشىندە ۇيىمدە قونا جاتىپ، وقۋ ءبىتىرىپ كەتكەندەرى دە بار. ماسەلەن، قازىر ازدى-كوپتى اتى اتالىپ جۇرگەن سايات نۇرعازين وقۋعا تۇسكەنشە مە­نەن ءان ۇيرەندى. ءوزى دە ىزدەنىم­پاز، العىر بالا بولدى. جالىق­پايتىن. تۇرسىنعازى راحيموۆ، تولعانباي سەمباەۆ، مەدەت سالى­قوۆ، ەلدوس جاقسىلىق ۇلى سياقتى انشىلەردى كورىپ وسكەن جىگىت. اياكوز اۋدانىنىڭ تارباعاتاي اۋىلىنان. كەزىندە اكەسىنىڭ ءانىن جۇسىپبەك ەلەبەكوۆ تىڭداپ، «قالاعا الىپ كەتەمىز» دەگەندە اعاسى جىبەرمەي قالعان ەكەن. كونسەرۆاتورياعا قا­بىلدانعاننان كەيىن قايرات باي­بوسىنوۆ اعامىزدان ءدارىس الدى. ءالى كۇنگە تۇڭعىش بالام سياقتى.
قازىر قولىمدا تاربيەلەنىپ جاتقان شاكىرتتەرىم دە ەرتەڭگى كۇنى جاقسى اتتارىمەن قۋانتادى دەگەن سەنىمىم بار.
– اڭگىمەڭىزگە راقمەت.


سۇحباتتاسقان
قانشايىم بايداۋلەت، «ايقىن».

پىكىر جازۋ

پوچتا جاريالانبايدى. تاڭداۋلى ءورىستى تولتىرىڭىز *

*

x

Check Also

شقو-دا اۋقىمدى سپورت پەن ونەر فەستيۆالى باستالدى

ىرعىزباي دوسحانا ۇلىنىڭ تۋعان جەرىندە ءوتىپ جاتقان «تۇعىرى بيىك تارباعاتاي» حالىقارالىق فەستيۆالى الەمنىڭ ءار تۇكپىرىنەن كەلگەن ...