Magnum сауда желісінде болған дау аяқталды. Курьер мен тұтынушы халыққа арнайы видео үндеу жолдап, түсініспеушіліктің шешілгенін мәлімдеді, деп хабарлайды "Адырна" ұлттық порталы.
Видеода тапсырыс жеткізуші (ред. курьер) жұмысқа қайта орналасқанын айтып, тұтынушымен татуласқанын көрсетті. Екеуі де болған жағдайға қатысты халықтан мәселеге нүкте қоюды сұрап, барша қолдау білдіргендерге алғыс айтты.
"Соңғы күндері әлеуметтік желіде маған және Магнумға қатысты әңгіме болып жатыр. Сол туралы түсіндіріп кетсем деймін. Алдымен баршаңызға қолдау көрсетіп жатқаныңызға үлкен рақмет айтамын. Өмір болған соң түсініспеушілік болып тұрады. Бірақ бәріміз қазақпыз. Елімізге татулық керек. Біз кездесіп, қол алысып, татуластық. Қазір Магнумға жұмысымды жалғастырып жатырмын. Жұмыс берушіге еш шағымым жоқ. Бәріміз бір қазақпыз. Үлкен рақмет!" - деді тапсырыс жеткізуші.
Желіде жазба жариялап, резонанс тудырған Асылхан есімді азамат та пікір білдірді.
"Қадірлі ағайын! Мұндай жағдайдың болғаны өкінішті. Бір-бірімізді түсіндік. Ал екеуміз бір-бірімізге ешқандай өкпе-ренішіміз жоқ", - деді ол.
Айта кетейік, әлеуметтік желіде тарап кеткен оқиға қоғамда үлкен резонанс тудырған болатын. Енді тараптар татуласқандарын ашық білдіріп, өзара өкпе-реніштің қалмағанын жеткізді.
