АҚШ президенті Дональд Трамп жаһандық сауда соғысын бастағаннан кейін көптеген тараптарға, соның ішінде өзіне де зиян келтірді. Трамптың активтері 4,7 миллиард доллардан 4,2 миллиард долларға дейін қысқарды, деп хабарлайды "Адырна" ұлттық порталы Forbes-ке сілтеме жасап.
Трамптың ең ірі шығыны оның ең құнды активі — Trump Media and Technology Group компаниясымен байланысты. Соңғы үш сауда күнінде компания акциялары 8%-ға төмендеп, қазан айынан бергі ең төмен бағаға жеткен. Трамптың бұл компаниядағы үлесі 2,2 миллиард доллардан 2 миллиард долларға дейін азайып, шамамен 170 миллион доллар жоғалтты.
Трамптың коммерциялық жылжымайтын мүлкі шамамен 90 миллион долларға арзандаған. Трамппен серіктестік орнатқан Vornado Realty Trust компаниясының акциялары 14%-ға төмендеген. Нью-Йорктің ірі жылжымайтын мүлік компаниясы SL Green акциялары 15%-ға арзандаған. Vornado, Trump Tower және 40 Wall Street ғимараттарын қамтитын Трамптың портфелі қазір 570 миллион долларға бағаланып отыр. Бұл өткен аптадағы 660 миллион доллармен салыстырғанда едәуір аз.
Vail Resorts, Soho House және Topgolf Callaway Brands компанияларының акциялары, Трамптың гольф клубымен байланысы бар компаниялар ретінде, 15%-дан астам құлдырады. Бұл оның таза капиталынан тағы 70 миллион доллар жоғалуына себеп болды.
Егер Трамптың Майами, Чикаго және Лас-Вегастағы қонақүй активтерінің құны 16%-ға төмендесе, ол тағы 65 миллион доллар шығынға ұшырауы мүмкін.
Сонымен қатар, тұрғын үй нарығы 13%-ға төмендеп, Трамп иелік ететін ондаған пәтерді қамтитын портфель 20 миллион долларға дейін қысқарды. Элиталық жылжымайтын мүлік нарығында да шамамен 32 миллион доллар шығын күтілуде.
Трамптың соңғы қаржылық есебіне сәйкес, ол әртүрлі облигациялар мен аздаған акцияларға ие. Олардың ішінде жеке несиелеу саласында жұмыс істейтін Blue Owl Capital компаниясында 5-25 миллион доллар аралығындағы үлесі бар. Бұл компания акциялары 22%-ға төмендеген.
Трамп үшін ең үлкен қауіп — импорттық тарифтер емес, өйткені оның компаниялары ұзақ мерзімді тұтыну тауарларын көп өндірмейді. Негізгі қауіп — әлемдік инвесторлардың сенімін жоғалту. Трамп әлемдік экономикаға қаншалықты белгісіздік әкелсе, оның таза капиталы да соншалықты төмендей береді.
