«Орталық Азия – Еуропа Одағы» саммиті аясында Қазақстан Президенті Қасым-Жомарт Тоқаев пен Еуропалық комиссия президенті Урсула фон дер Ляйен кездесу өткізді. Бұл туралы Ақорда жазды, деп хабарлайды “Адырна” ұлттық порталы.
Кездесу барысында Қазақстан мен Еуропа Одағының экономиканың түрлі секторындағы, цифрландыру және инновация салаларындағы ынтымақтастығын дамыту перспективасы талқыланды. Тараптар Қазақстан мен Еуропалық комиссия арасында виза беру тәртібін жеңілдету жөніндегі келісімге келу үдерісі басталғанын оң бағалады.
“Қасым-Жомарт Тоқаев Кеңейтілген серіктестік және ынтымақтастық жөніндегі келісім Қазақстан мен Еуропа Одағының сан қырлы ықпалдастығына негіз болып отырғанын жеткізді.
Мемлекет басшысы Қазақстанның Еуропамен ынтымақтастығын одан әрі тереңдететін төрт басым бағытты атады. Бұл – энергетика, ірі инфрақұрылым және өнеркәсіп жобаларын жүзеге асыру, көлік-логистика желілерін кеңейту, сондай-ақ цифрлық инновация, озық технологиялар мен жасанды интеллект бағытындағы серіктестік”, делінген Ақорда хабарламасында.
Сондай-ақ, Урсула фон дер Ляйен көлік-логистика саласындағы, соның ішінде Транскаспий халықаралық көлік дәлізі секілді жобаларды іске асырудың маңызына тоқталды. Ол Қасым-Жомарт Тоқаевты Қазақстанда сирек кездесетін металдардың ірі кен орнының табылуымен құттықтады.
Тараптар С5+ЕО аясындағы жұмысты жалғастыруға уағдаласты. Сонымен қатар өңірлік және халықаралық күн тәртібіндегі өзекті мәселелер жөнінде пікір алмасты.
