АҚШ президенті Дональд Трамп Флоридадағы резиденциясында өткен баспасөз мәслихатында Украинада сайлау өткізу қажеттігін айтты, деп хабарлайды "Адырна" ұлттық порталы.
Оның айтуынша, егер Киев Ресеймен қақтығысты реттеу бойынша келіссөздерге қатысқысы келсе, бұл маңызды қадам болмақ.
Ақ үй басшысы қазіргі Украина президенті Владимир Зеленскийдің рейтингі 4%-ға дейін төмендегенін атап өтті. Республикашыл саясаткердің айтуынша, Украинада көптен бері сайлау өтпеген.
"Қазір Украинада ұзақ уақыттан бері сайлау өткен жоқ. Онда әскери жағдай енгізілген. Мұны мойындау мен үшін қаншалықты ауыр болса да, украин көшбасшысының қолдауы 4%-ды құрайды", – деді АҚШ президенті.
Трамптың түсіндіруінше, Украинада сайлау өткізу мәселесі Ресейдің талабы емес. Бірақ көптеген елдерді алаңдатып отыр.
Айта кетейік, Ресей президенті Владимир Путин Украина президенті Владимир Зеленскиймен келіссөздер жүргізуге дайын. Бұл туралы 18 ақпанда РФ президентінің баспасөз хатшысы Дмитрий Песков мәлімдеді.
“Жасалған келісімдерді заңды түрде бекіту Зеленскийдің легитимділігін даулауға болатынын ескере отырып, терең талқылауды қажет етеді”, – деп атап өткен Кремль өкілі. Мұндайда Путиннің Кремльде отырғанына 25 жыл болғанын айта кеткен абзал.
