Асқар Мырзахметов жамбылдық жастармен кездесті

558
Елбасы Нұрсұлтан Назарбаевтың Жарлығымен биыл жастар жылы деп жарияланғаны көпшілікке бегілі. Жастар жылы аясында елімізде нақты жоспарлар құрылып, ауқымды жұмыстар атқарылып жатыр.

Тараз мемлекеттік педогогикалық университетінде «Бәсекеге қабілетті жастар – еліміздің іргетасы» тақырыпта Жамбыл облысының әкімі Асқар Мырзахметов жастармен кездесті. Еркін форматта өркен шараға аталмыш оқу ордасының студенттері қатысып, өздерін толғандырып жүрген сұрақтарға жауап алды.

Студенттер негізінен өңірдің өркендеуі, білім саласындағы өзгерістер, Жастар жылына қатысты атқарылар шаралардың барысы, волонтер жастар, ел болашағы туралы ойларын ортаға салды.

Асқар Мырзахметовтың айтуынша, ата-аналар мен аға ұрпақ өкілдері жастар тәрбиесіне айрықша назар аудару керек. Өйткені  қоғамда жастардың жақсы болып қалыптасуы үлкендер берген тәрбиеге байланысты болмақ.

«Мұхтар Әуезов «Ел боламын десең – бесігіңді түзе» деп тектен тек айтпаған. Сондықтан да біз жастардың тәрибесіне ерекше назар аударуымыз керек. Менің ойымша, баланың мектепте, кейін келе жоғары оқу орында қалай оқитыны отбасында қалыптасатын сияқты. Ата-ананың тәлім-тәрбиесі арқылы бала білімге құштар болып өсетіні белгілі. Ал өзімнің жастық шағыма тоқталатын болсам, көбіне кітапхана еске түседі. Содан кейін спортқа бейім болып, әр түрлі жарыстарға қатыстым. Жалпы жалынды жастар тарихты танып, өткенді құрметтеуге және ата-баба дәстүрін ұлықтауға тырсуы керек. Өздеріңіз жақсы білесіздер 2020 жылды Мемлекет басшысы Қасым-Жомарт Тоқаев еріктілер жылы деп жариялап отыр. Сондықтан да жастар қайырымдылық шаралары мен табиғат тазалығына атсалысуы керек», – деді облыс басшысы.

Белсенді жастар облыс әкімінің өнегелі өткен өмірі туралы, бос уақытын неге арнайтындығын, қандай кітаптарды сүйіп оқитынын сұрап, жұмыс барысындағы ұстанымы хақында әңгімелеп беруін өтінді. Асқар Мырзахметов барлық сұрақтарға нақты әрі ашық жауап беріп, студенттерге білім жолында да, өмір жолында да сәттілік тіледі. Жүздесу соңында әкіммен естелік суретке түскен жастар әдемі әсерге бөленіп тарқасты.

«АДЫРНА»

ұлттық порталы

 

Пікірлер