Ресейге визасыз кіретін шетел азаматтарының уақытша болу ережелеріне бірқатар өзгеріс енгізілді, деп хабарлайды “Адырна” ұлттық порталы.
Қазақстанның Ресейдегі елшілігі елге келуді жоспарлаған қазақстандықтарға жаңа ережелер туралы ескерту жасады.
«2025 жылдың 1 қаңтарынан бастап Ресейге визасыз кіретін шетел азаматтарының уақытша болу ережелеріне өзгерістер енгізіледі. 2024 жылғы 8 тамызда қабылданған №260-ФЗ Федералдық заңы бойынша, шетел азаматтарының Ресей аумағында болу мерзімі жыл ішінде 90 күнмен шектеледі», — делінген елшіліктің хабарламасында.
Ресей аумағында шетел азаматтарының болу мерзімі бір жылдың ішінде жиынтық түрде 90 күнмен шектелген. Ал бұған дейін 180 күн ішінде 90 күн болуы мүмкін еді.
Одан бөлек, білім алу, жұмыс істеу, уақытша тұру немесе баспана алу мақсатында келген азаматтар ғана Ресейде 90 күннен артық бола алады.
