"Еш нәрсе есімде жоқ": ірі жол апатына ұшыраған Айзада Сатыбалды

454

Жан түршігерлік жол апатынан аман қалған актриса Айзада Сатыбалды әлі бұрынғы қалпына келе алмады, деп хабарлайды adyrna.kz ұлттық порталы Tengrinews басылымына сілтеме жасап. 

2018 жылдың  желтоқсан айында  Абай мен Сейфуллин көшелерінің қиылысында ірі жол апаты болып, үш адам қаза тапқан. Тек Айзада Сатыбалды аман қалған.  Көлікте елімізге еңбегі сіңген актрисалар Шолпан Елгезекова, Айзада Сатыбалды және олардың құрбысы Дина Хамитова болған. Өлім аузынан аман қалған актриса әлі күнге дейін ем алу үстінде екен.

Актриса жол апатына қалай ұшырағанын өзі де түсінбейді.

"Қазіргі жағдайыма шүкір деймін. Барлығына уақыт емші. Дәрігерлер де соны айтып жатыр. Баяғыдай қалпыма әлі келе алған жоқпын. Ашық және жабық жарақаттар алғанмын. Төрт рет ауруханада ем алып, екі рет шипажайда жатып емделдім. Әлі жылдың соңына дейін емделемін. Еш нәрсе есімде жоқ. Дәрігерлер есіме түсуі де, түспеуі де мүмкін деді. Не болғанын жолдасымнан 4-5 айдан кейін сұрастырдым. Қайраткерлікті 2018 жылы 15 желтоқсанда астанадан алып келдім. Сол қуанышты кішігірім түрде бас қосып, атап өткенбіз деп ойлаймын. Сосын көктемге таман отырып жақсылығымызды көпшілікпен бөлісеміз деп шешкенбіз. Менің ойымша, дәл сол күні біз соған байланысты бас қосқанбыз. Нақты есімде жоқ. Артынан марқұм Динараның ұлы мені астанадан іздеп келіп, оқиғаның мән-жайын айтып берді. Динараның ұлының айтуынша, біз Шолпан екеуміз оның үйіне келген екенбіз. Содан кейін үйден шығып кетіп, мейрамханаға барғанбыз. Неге екенін білмеймін, барлығымыз көлігімізді қалдырып кеткенбіз. Сөйтіп таксиге мініп, келе жатқанда осы оқиға болса керек", - дейді Айзада Сатыбалды.

"Адырна" ұлттық порталы

Пікірлер