Ресейдің мұнай тасымалдайтын көлеңкелі флотына қатысты Батыс санкциялық тізімдеріне қосылған кемелердің жалпы саны 79-ға жетті. Ұлыбритания 20 кемеге санкция енгізді, олар ресейлік мұнай саудасына қарсы санкциялардан жалтару үшін пайдаланылады. Бұл туралы британ үкіметі мәлімдеді, деп хабарлайды “Адырна” ұлттық порталы.
«Ресей президенті Владимир Путиннің мұнай табыстары... (олар) оның заңсыз соғысын жүргізуге отын болып отыр, ал украин отбасылары суық, қараңғы түндерде жиі жылу, жарық пен электрсіз қалып, Ресейдің үздіксіз зымыран соққыларына ұшырап жатыр», – деді Ұлыбританияның премьер-министрі Кир Стармер.
Санкциялық тізімге Ocean Faye, Andaman Skies және Mianzimu кемелері қосылды, олар биыл 4 миллионнан астам баррель ресейлік мұнай тасымалдаған, деп хабарлады Ұлыбритания үкіметі.
Бұл шаралар олардың қозғалысын шектеуге немесе Ұлыбритания порттарына кіру мүмкіндігін толық жоюға бағытталған.
Дүйсенбі күні Ұлыбритания мен тағы 11 батыс елдері Ресейдің көлеңкелі флотының әрекеттеріне қарсы шараларды келісіп қабылдады.
Стармер сонымен қатар Украинаға энергетикалық жүйелерін жөндеу үшін 35 миллион фунт стерлинг (44 миллион доллар) көлемінде шұғыл көмек бөлінгенін жариялады.
Ұлыбританияның санкциялары Украина президенті Владимир Зеленскийдің Ресейдің көлеңкелі флотының кемелеріне қарсы санкциялар енгізуді сұраған мәлімдемелерімен тұспа-тұс келіп отыр. Зеленский жексенбіде Қара теңізде Ресей танкерінің мұнай төгілуін «экологиялық апат» деп атады.
«Бірақ теңіздеріңізде одан да үлкен және қауіпті ресейлік танкерлер жұмыс істейді. Бұл флотты тоқтату - бұл Ресейдің әскери операцияларды қаржыландыруын тоқтату ғана емес, бұл табиғатты қорғау», - деді Украина президенті X медиа платформасында.
Зеленский ресейлік көлеңкелі флоттың әрекеттеріне шектеулер «санкциялар арқылы ғана емес, басқа да әдістермен» жүзеге асырылуы тиіс екенін атап өтті.
«Бұл флот - ең үлкен қауіптердің бірі. Путин бұл танкерлерді соғысты қаржыландыру үшін пайдалануда. Бұл кемелердің көпшілігі ескі, нашар күтімде және ешқандай бақылаусыз жұмыс істейді», - деді Украина президенті.
Айта кету керек, дүйсенбі күні Еуроодақ Ресейдің көлеңкелі флотының тағы 52 кемесіне санкция енгізді. Осылайша, Ресейдің көлеңкелі флотының санкциялық тізімге қосылған кемелерінің жалпы саны 79-ға жетті.
