UTC+5 уақыт белдеуіне көшу – ел үшін тарихи негізделген уақытқа оралу. Бұл туралы үкімет отырысында Сауда және интеграция министрі Арман Шаққалиев айтты, деп хабарлайды “Адырна” ұлттық порталы.
«UTC+5 уақыт белдеуі ел халқының 76%-дан астамын қамтитын Астана, Алматы, Петропавл, Өскемен, Шымкент, Семей және Павлодар қалаларын қоса алғанда, 67,5-тен 82,5 градусқа дейінгі бойлықтарды қамтиды (15,24 млн адам). Қазақстан аумағының көп бөлігі іс жүзінде бесінші сағаттық белдеуде болды.
Бұрынғы кеңейтілген уақыт белдеуі UTC+6 алғаш рет 1930-1931 жылдары жазғы уақытты («стандартты уақыт + бір сағат») пайдалану арқылы енгізілген. Осылайша, UTC+5 – еліміз үшін жаңа аймақ емес, тарихи негізделген уақытқа оралу», - деді сейсенбі күні үкімет отырысында Сауда және интеграция министрі Арман Шаққалиев.
Оның айтуынша, бүгінде әлемдегі 195 елдің 117-сі стандартты уақыт белдеуіне барынша жақын географиялық уақытты таңдаған.
Ол табиғи уақытты қолдаушылардың халықаралық альянсы (IANT) үкіметтің Қазақстанның орталық және шығыс аймақтары үшін географиялық бойлыққа сәйкес келетін UTC+5 сағаттық белдеуін белгілеу туралы шешіміне оң пікір бергенін айтты.
«Әлемнің көптеген елдері табиғи циклге барынша жақын уақыт белдеуін таңдап қойған. Сондықтан табиғи күн циклдарына сәйкес келетін UTC+5 уақыт белдеуіне көшу жаңалық емес, табиғи уақытқа оралуды білдіреді. Уақыт белдеулерін өзгерту туралы қабылданған шешім ғылыми негізделген, экономикалық тұрғыдан орынды және елдің тиімді қызмет ету мүдделеріне сай келеді. Өтінішті қарау нәтижесінде стандартты уақыт белдеуіне барынша бейімделу үшін жағдай жасауға бағытталған нақты ұсыныстар берілді», - деді Шаққалиев.
Премьер-министр Олжас Бектенов Сауда және интеграция министрі қазіргі уақыт белдеуінің пайдасына барлық жан-жақты дәлелдер келтірді деп санайды.
«Үкімет бұл шешімді қолдайды. Бесінші сағаттық белдеу географиялық тұрғыдан ел аумағының көп бөлігін алып жатыр. Сауда және ақпарат министрліктеріне барынша түсінікті ақпараттық-түсіндіру жұмыстарын жүргізуді тапсырамын», - деді Бектенов.
Естеріңізге сала кетейік, биыл 1 наурызға қараған түні Қазақстан бірыңғай уақыт белдеуіне (UTC+5) ауысты. Бүгінде 7 ай өтті. Сауда және интеграция министрлігі бұл мәселе бойынша «қазақстандықтар оларға бірнеше рет жүгінгендіктен» уақытты ауыстыру туралы шешім қабылдағанын айтады. Сонымен қатар, қазақстандықтар ел билігінің Қазақстан азаматтарының келісімінсіз уақытты өзгертуін сынай беруде.
11 қарашада Қазақстандағы уақыт біртұтас уақыт белдеуіне көшкеннен кейін Ресейден электр энергиясын сатып алу көлемі күрт өскенін хабарланды, бірақ елдің Энергетика министрлігі қазақстандықтарды сағат белдеуінің өзгеруі энергия тұтынуға әсер етпейтініне сендіруге тырысуда.
Қарашаның 15-і күні Өңдеу өнеркәсібі одағының басқарма төрағасы, Алматы желдеткіш зауытының бас директоры Марат Баққұлов Қазақстандағы уақыт өзгерісінің келеңсіз салдары туралы шағымданған.
