Ішкі істер министрлігі Кентау қаласында «Хизб-ут-Тахрир» діни-экстремистік ұйымының жасырылған тобын анықтады, деп хабарлайды «Адырна» тілшісі
Ресми мәліметтерге сүйенсек, бұл ұйымның идеологиясы елде зайырлы конституциялық құрылымды құлатып, «шариғат» нормаларын енгізуге бағытталған.
«Жедел-іздестіру іс-шаралары барысында топ мүшелерінің терроризм идеяларын насихаттауға, сондай-ақ діни көзқарасты қорлауға қатысты фактілер анықталды. Топ мүшелері "Хизб ут-тахрир" шетелдік радикалды уағызшыларының дәрістерін алу және тарату үшін интернет-ресурстарды пайдаланған. Топ жетекшісі бұған дейін тыйым салынған діни-экстремистік ұйымның қызметіне қатысқаны үшін сотты болған. Жүргізілген шаралар нәтижесінде 10 күдікті ұсталды»,—делінген хабарламада.
Олардың тұрғылықты жерлерін тінту кезінде діни-экстремистік әдебиеттер мен басқа да заттай дәлелдемелер тәркіленді.
Қазіргі уақытта терроризмді насихаттау және діни алауыздықты қоздыру белгілері бойынша сотқа дейінгі тергеу жүргізіліп жатыр.
