Бүгін Алматының «Жастар орталығы» алаңында мектеп оқушылары арасында шағын футболдан қалалық жарыс өтті. Спорттық шара – жеткіншектерді салауатты өмір салтына баулу мақсатында Алматы қаласы Қоғамдық даму басқармасының қолдауымен қолға алынып отыр. «Жастар жылы» аясындағы игі бастаманы “Азаматтық борыш” жобасы негізінде “Адырна” ұлттық-этнографиялық бірлестігі өткізуде. Спорттық жарыс Ауған соғысы ардагерлерінің құрметіне арналғандықтан – Мұса Жұмағалиев (Ауған соғысының ардагері) мырза қонақ ретінде арнайы шақырылып, жастарды жігерлендіретін рухты сөздерімен жарыс шымылдығын түріп берді.
Ал, финалға шыққан 4 команданың ішінде 1-орынды «FC KFC» командасы иемденсе, «FC Almaty» ұжымы екінші орынға жайғасты. Ал, «FC Junior» командасы үздік үштікті қорытындылады. Жарыс жеңімпаздары арнайы кубоктар мен ұялы телефон, фотоаппарат, қол сағат сынды бағалы сыйлықтармен марапатталды.
"Адырна" ұлттық порталы
