Қостанай облысында 4 жұмысшы ұн сақтайтын шанақтан шыға алмай, қаза тапты, деп хабарлайды «Адырна» тілшісі.
Қайғылы оқиға 6 қазан күні Рудный қаласында болған. Төрт адам тереңдігі 5 метр шанаққа түсіп, қайта көтерілмеген.
Полиция жұмысшылардың өліміне байланысты еңбек қауіпсіздігі ережелерін бұзу бойынша тергеу бастады.
«Төтенше жағдайлар қызметі, полиция және жедел медициналық жәрдем қызметі дереу оқиға орнына жетті. Жедел жәрдем қызметкерлері жұмыскерлердің қаза тапқанын растады. Оқиғаның мән-жайы анықталып жатыр»,– деп түсіндірді Қостанай облысының Төтенше жағдайлар департаменті.
Бұған дейін Қарағанды облысындағы «Саяқ-3» шахтасында екі жұмысшы қаза тапқанын жазған едік.
