Алматыда мопед пен самокат салдарынан жол-көлік апаттары орын алған. Қала бойынша 1,5 мыңнан астам мопед мамандандырылған айыппұл тұрағына қойылды, деп хабарлайды "Адырна" ұлттық порталы Polisia.kz-ке сілтеп.
"Алматыда мопедтер, самокаттар, скутерлер кеңінен пайдаланылады. Бірақ, өкінішке орай көліктің бұл түрін жүргізген кезде жүргізушілердің көбі қарапайым жол қозғалысы ережелерін сақтамайды немесе оларды елемейді. Осылайша, олар жолдарда апатты жағдайларды тудырады, бұл көбінесе қайғылы салдарға немесе адамдардың жарақат алуына әкеледі. Өткен күнгі осындай апаттардың бірі мопед тізгіндеген 19 жастағы жасөспірімнің өліміне әкеліп соқты", – деді Алматы қаласы ПД ЖПҚБ патрульдік полиция полкінің командирі Оралбек Ахимов.
Спикердің айтуынша, биыл жыл басынан бері Алматыда мопедтердің қатысуымен 523 жол-көлік оқиғасы болып, нәтижесінде 535 адам жарақат алып, 11 адам көз жұмған.
