Су тасқынынан зардап шеккен 700-ден астам отбасына жаңа үй мен пәтер берілді

768
Adyrna.kz Telegram

Елімізде су тасқынынан зардап шеккен 717 отбасыға жаңа үй мен пәтер берілді. Қазақстан Үкіметі су тасқыны салдарын жою және зардап шеккен азаматтарға жан-жақты көмек көрсету бойынша жұмысты әлі де жалғастыруда, деп хабарлайды “Адырна” ұлттық порталы Үкіметтің баспасөз қызметіне сілтеп.

”31 552 отбасы 100 АЕК мөлшерінде біржолғы төлем алды. 717 отбасы қираған баспанасының орнына жаңа үй мен пәтерге ие болды. Мәселен, Қостанай облысының тұрғындарына 298 үй/пәтер ұсынылса, Ақмола облысында — 85, Ақтөбе облысында — 121, Солтүстік Қазақстан облысында — 135, Батыс Қазақстан облысында — 70, Қарағанды облысында — 6, Павлодар облысында — 2 жаңа баспана берілді. Зардап шеккен тұрғындарға арнап шамамен 1 862 жаңа үй салынып жатыр” делінген хабарламада.

Сондай-ақ, 3 981 отбасы тұрғын үйін жөндеуге және қалпына келтіруге деп өтемақы алғаны айтылды.

5 066 отбасына жоғалған аса қажетті дүние-мүлкін сатып алу үшін 150 АЕК мөлшерінде қосымша көмек көрсетілді.

Бұдан басқа, зардап шеккен 34 ШОБ субъектісінің жалпы сомасы 377 млн теңгелік шығыны өтелді. Барлық облыста өңірлік және аудандық комиссиялар жұмыс істеп жатыр. Шығындарды өтеу және құжаттарды тапсыру тәртібін түсіндіру үшін 1432 нөмірі бойынша «Атамекен» ҚР ҰКП «жедел желісі» іске қосылған.

 

Пікірлер