Премьер-министрдің жетінші орынбасары – Су тасқынына қарсы іс-шараларды үйлестіру және су тасқыны зардаптарын жою жөніндегі республикалық штаб басшысының орынбасары Қанат Бозымбаев пен Төтенше жағдай министрі Шыңғыс Әрінов су басқан Ақмола, Қостанай облыстарын аралады, деп хабарлайды "Адырна" ҚазАқпаратқа сілтеп.
Премьер-министрдің орынбасары, Төтенше жағдайлар министрі және облыс әкімі қала маңындағы аудандардағы Нұра және Есіл өзендері бассейндеріндегі жағдаймен танысты.
"Су тасқынының екінші кезеңінің басталуына байланысты облыстағы жағдай күрделі деп бағалануда. Нұра, Есіл, Жабай, Колутон өзендерінің су деңгейін бақылау үшін тәулік бойы жұмыс істейтін бақылау бекеттері құрылды. Мұз қатпарлары пайда болған кезде оларды жою үшін жару жұмыстары жүргізіледі. Облысқа Астанадан және басқа қалалардан арнайы техникалар жөнелтілді. Сондай-ақ ҚР Төтенше жағдайлар министрлігі мен Азаматтық қорғаныс академиясының күштері жұмылдырылды", делінген хабарламада.
Жібек жолы ауылында су тасқынына қарсы іс-шаралар белсенді жүргізілуде, онда инертті материалдан қап дайындалып, 2300 метр тереңдікке дейін қорғаныш жағалауы нығайтылды.
Қосшыдағы Тайтөбе ауылында ұзындығы 2400 метрлік жер қоршауын нығайту жұмыстары жүргізілуде. Целиноград ауданындағы Қараөткел, Қаражар және Талапкер ауылдарында да су тасқынына қарсы шаралар тексерілді.
Штаб басшысының орынбасары облыс әкімі мен Төтенше жағдайлар департаментінің басшысына су тасқыны кезінде қала маңындағы өңірлердегі жағдайды жеке бақылауға алуды тапсырып, қауіпті жою бойынша бірқатар тапсырмалар берді.
Ақмола облысы бойынша су тасқынына қарсы іс-шараларға барлығы 1500-ге жуық адам мен 350 техника жұмылдырылған.
Қанат Бозымбаев пен Шыңғыс Әрінов Қостанай облысының су тасқынынан зардап шеккен тұрғындарымен кездескен. Мал-мүлкінен айрылған тұрғындар шенеуніктерге тиісті сұрақтарын қойған. Жиында су тасқыннан келтірілген материалдық зарарға байланысты даулы жайлар да сөз болған.
Еске сала кетейік, Қанат Бозымбаев мемлекет басшысының жарлығымен 31 наурыз күні Премьер-министрдің жаңа орынбасары болып тағайындалған болатын.
