2024 жылдың бірінші тоқсанында сұйытылған мұнай газының 1 литрі шамамен 5 теңгеге көтерілмек. Бұл туралы Энергетика вице-министрі Әлібек Жамауов айтты, деп хабарлайды “Адырна” ұлттық порталы.
«Энергетика министрлігі газ бағасын біртіндеп көтеруді көздейді. 2024 жылдың бірінші тоқсанында сұйытылған мұнай газының 1 литрі шамамен 5 теңгеге көтеріледі деп күтеміз. Одан кейін алдағы 3 жылдың ішінде газ бағасы әр 6 ай сайын қымбаттап отырмақ»,- деді Әлібек Жамауов.
Сондай-ақ, ол газ тапшылығы туындауы мүмкін екенін айтады.
«Бүгінде республикада айына 135 мың тонна сұйытылған мұнай газы өндіріледі. Тұтыну мұнан көп. Соған байланысты тапшылық туындайды. Автомобиль иелерінің көпшілігі сұйытылған мұнай газына ауысып жатқанын білеміз. Газ балонын орнату реттелмейді», - деді ол БАҚ өкілдеріне арналған брифингте.
Оның атап өтуінше, өндіріс тұтыну көлемін қамтамасыз ете алмай отыр.
«Сондықтан да бірқатар шара қабылдадық. Теңізшевройлмен ішкі нарыққа ай сайын 10 мың тонна газ жеткізуге уағдаластық. 13 қарашада сұйытылған мұнай газының экспортына толық шектеу енгіздік. Казросгаз компаниясымен Орынбор мұнай өңдеу зауытынан сұйытылған мұнай газының қосымша көлемін бағыттау туралы келістік. Қазіргі уақытта тапшылық байқалмайды», - деді вице-министр.
Айта кетейік, шілде айындағы дерек бойынша, Қазақстанда автогаздың бөлшек сауда бағасы литріне 80 теңгеден төмен, ал АИ-92/93 үшін шекті бөлшек сауда бағасы 205 теңге, ал дизель отыны жергілікті жүргізушілер үшін литріне 295 теңге (шетелдік жүргізушілер үшін - литрі 450 теңге) .
