Университеттерде пәндерді оқытудың мазмұны мен әдісін айтарлықтай жаңарту қажет. Бұл туралы Мемлекет басшысы Digital Bridge форумында айтты, деп хабарлайды “Адырна” ұлттық порталы.
Мен жуырдағы Жолдауымда кемінде үш белгілі жоғары оқу орны жасанды интеллект бағытына қажетті кадр даярлаумен және зерттеулер жүргізумен айналысуы керек деген міндет жүктедім. Назарбаев Университеті жанындағы Ақылды жүйелер және жасанды интеллект институтын толыққанды ғылыми-зерттеу институтына айналдыру тағы бір маңызды қадам болмақ, - деді ел басшысы.
Президенттің айтуынша, онда үздік мамандар мен сарапшылардың орталығына айналып, біртұтас экожүйе қалыптастыруы керек.
Институт құрамына IT индустриясының әлемдік және отандық көшбасшыларымен тығыз байланыста жұмыс істейтін ғылыми-зерттеу және тәжірибелік-конструкторлық жұмыстар орталығы кіреді. Осы ретте Институт әзірлемелерін коммерцияландыру және кеңейту маңызды, – деді Қасым-Жомарт Тоқаев.
