Home » ايدارلار » قوعام » ەندى «اۋعانداردىڭ» قولىمەن وت كوسەمەك پە؟

ەندى «اۋعانداردىڭ» قولىمەن وت كوسەمەك پە؟

اقتوبە، تۇركىستان وبلىستارىنىڭ اكىمدىكتەرى بيىلعى جىلعى 9 مامىر كۇنگى مەرەكەلىك شارالار تىزىمىنە «بەسسمەرتنىي پولك» شەرۋىن ەنگىزبەدى، ءسويتىپ، وتە ونەگەلى باستاما كوتەرىپ، باتىل شەشىم قابىلدادى! ايتسە دە، وكىنىشكە قاراي، وزگە وبلىستار اتالمىش اكتسيانى وتكىزۋگە دايىندىق شارالارىن الدەقاشان باستاپ كەتتى.
قاسيەتتى ورازا كەزىندە يسلام دىنىنە جات ءىس-ارەكەت: و دۇنيەلىك ادامداردىڭ فوتوسۋرەتتەرىن كوشەلەردە كوتەرىپ جۇرۋگە جۇمىلدىرۋ مۇسىلمانداردىڭ ءدىني سەنىمىن قورلاۋ بولىپ تابىلادى. ونىڭ ۇستىنە ۇلتتىق دىلىمىزبەن دە سايكەسپەيدى.
مورالدىق-ەتيكالىق تۇرعىدان قاراستىرعاندا، مۋزەيلەر مەن وتباسىلىق البومداردا قۇرمەتپەن ساقتالۋعا ءتيىستى قۇندى جادىگەرلەر: مايدانگەرلەردىڭ فوتوسۋرەتتەرىن ءبىر مەزگىلدىك اكتسيالاردا قولدانىلاتىن ساياسي پلاكاتتارعا اينالدىرۋ ونەگەلى ءىس ەمەس. سونداي-اق «بەسسمەرتنىي پولك» شەرۋىنىڭ ارداگەرلەرگە ەش پايداسى جوق. ودان گورى سوعىس باھادۇرلەرىنىڭ كوزى تىرىلەرىنە جانە قازا تاپقاندارىنىڭ جەسىرلەرىنە ماتەريالدىق-قارجىلاي قولداۋ كورسەتۋ، و دۇنيەلىك بولعاندارىن بۇقارالىق اقپارات قۇرالدارى ارقىلى ەسكە الۋ، ارنايى اس بەرىپ، رۋحىنا قۇران باعىشتاۋ الدەقايدا ابزال ءىس.
سول ارداگەرلەر حالقىمىزدىڭ ەركىن باقىتتى ءومىر ءسۇرۋى ءۇشىن، كەيىنگى بۋىننىڭ زورلىق-زومبىلىق تاۋقىمەتىن باستان وتكەرمەۋى ءۇشىن جان اياماي جاۋمەن سوعىستى عوي. ولار بۇگىنگى ۇرپاقتارى وزدەرىنىڭ كونستيتۋتسيالىق قۇقىقتارىن تالاپ ەتىپ پلاكات ۇستاپ كوپشىلىك ورىنداردا بوي كورسەتسە قولما-قول پوليتسيا بولىمشەلەرىنە كۇشپەن جەتكىزىلىپ، ىلە سوتتىڭ ۇكىمىمەن جازالاۋ شارالارىنا ۇشىرايتىنىن بولجادى دەيسىزدەر مە؟
ەستە ۇستارلىق جايت، نار تاۋەكەلگە بەل بايلايتىن جۇرەكجۇتقان ازاماتتار جۇمىس كۇندەرى دە، ءى مامىر مەرەكەسىندە دە ءوز ويلارىن جۇرتشىلىققا جاريا ەتۋدەن تانبادى. كۇنى ەرتەڭ، 9 مامىر مەرەكەسىندە دە كونستيتۋتسيالىق قۇقىقتارىن تالاپ ەتەتۋشىلەردىڭ شىعاتىنى كۇمانسىز. وندايلاردى بيلىك «اۋعانداردىڭ» كۇشىمەن باسىپ-جانىشتاۋدى كوزدەگەن سياقتى. اۋعان سوعىسىنا قاتىسۋشىلاردىڭ مالىمدەمەسىنەن https://www.zakon.kz/4968588-gotovy-reagirovat-zhestko-afga… وسىنداي وي تۋىندايدى.
كەزىندە كەڭەس ۇكىمەتىنىڭ شەتەلدەگى باسقىنشىلىق ساياساتىن ەرىكسىز جۇزەگە اسىرۋعا اتسالىسقان «اۋعانداردىڭ» قازىرگى تاۋەلسىز، ەگەمەن ەلىمىزدە، قۇقىقتىق دەموكراتيالىق قوعامدا بەيبىت جولمەن كونستيتۋتسيالىق قۇقىقتارىن تالاپ ەتۋشى ازاماتتارعا كۇش قولدانۋى قازاقستاندىق، حالىقارالىق زاڭداردىڭ ەشبىرىنىڭ شەڭبەرىنە سىيمايدى! دەگەنمەن «اۋعاندار» وزدەرىنىڭ بالالارىنداي جاس قىزدار مەن جىگىتتەرگە قارسى قانداي دا ءبىر ارەكەتتەرگە بارا قويماس دەگەن ۇمىتتەمىن. كەرىسىنشە جاعدايدا جاپپاي حالىقتىق نارازىلىق تۋىنداپ، قازاقستان تاريحىنىڭ تاعى ءبىر قارالى بەتى جازىلۋى ىقتيمال.
ايتپاقشى، بالاباقشالاردىڭ بۇلدىرشىندەرىنە پارادتا كيۋ ءۇشىن اسكەري كيىم تىككىزۋدى اتا-انالاردى مىندەتتەپتى دەگەن اقپاراتتى دا قۇلاعىمىز شالدى. مۇنىڭ ءبارى كەڭەس يمپەرياسى ءداۋىرىن كوكسەپ دارىپتەۋشى، ءميليتاريزمدى ناسيحاتتاۋشى رەسەي ساياساتكەرلەرىنىڭ ىقپالى ەكەنى سەزىلەدى. جەڭىستىڭ 75 جىلدىعى اتالىپ وتىلەتىن كەلەسى جىلى بۇدان دا پارمەندى ىقپال ەتۋگە تىرىسادى! الگىلەردىڭ ايتقانىنا كونىپ، ايداعاندارىنا جۇرەتىندەر ەگەمەن ەلدىگىمىزدى تارك ەتىپ، وتارشىلدىق قامىتىنا قايتادان مويىن ۇسىنۋعا بەيىم تۇرادى.
ءسوز سوڭىندا ايتارىم، ەڭ دۇرىسى، اقتوبە، تۇركىستان وبلىستارىنىڭ باسشىلارى سياقتى 9 مامىر كۇنگى مەرەكەلىك شارالار تىزىمىنە «بەسسمەرتنىي پولك» شەرۋىن قوسپاۋ. اق ورداداعى اق جاعالى ۇلىقتارىمىز ايماقتارداعى شەنەۋنىكتەردى ناعىز مەملەكەتشىل اكىمدەردەن ونەگە الۋعا شاقىرسا ەكەن.

ارمان قاني،
پاۆلودار قالاسى.

پىكىر جازۋ

پوچتا جاريالانبايدى. تاڭداۋلى ءورىستى تولتىرىڭىز *

*

x

Check Also

عاريفوللا ەسىم: كەدەي پروفەسسورلار «كەدەي ءبىلىم» بەرەدى

عۇمىرىم ءبىلىم مەن عىلىمعا ارنالعان سوڭ، ايتارىم، بۇل سالادا يگىلىكتى وزگەرىستەر بولمادى دەۋگە بولمايدى. ءار ...