Túrkistan oblysyna qarasty Qazyǵurt aýdanynyń Ishki saıasat bólimi "Elbasy joldaýyn" Jaıdarman arqyly oqýshylarǵa nasıhattamaq, - dep habarlaıdy "Adyrna" ulttyq portaly goszakup.gov.kz caıtyna silteme jasap.
Qazyǵurt aýdanynyń Ishki saıasat bólimi 2023 jyldyń 30 mamyry kúni quny 4 500 000 teńge bolatyn "Elbasy joldaýyn" nasıhattaýǵa baǵyttalǵan tender jarııalaǵan. Ishki saıasat bólimi Elbasynyń joldaýyn bylaı qoıyp, Elbasy statýsynyń da birjola alynyp tastalǵanyn umytyp ketse kerek. Tórt lottan turatyn tenderdiń biriniń ǵana jeńimpazy anyqtalyp, jobany júzege asyrý isi jergilikti ardagerler uıymyna berilgen.
4 shilde kúni qalǵan lottar qaıtadan 2 800 000 teńgege baǵalanyp, goszakup.gov.kz caıtyna qoıylǵan. Qazir jeńimpazdyń kim bolatyny anyqtalýda.
"Qazyǵurt aýdany kóleminde dinı turaqtylyqty qamtamasyz etý baǵytynda is-sharalar uıymdastyrý, Elbasy joldaýyn nasıhattaý, "Sybaılas jemqorlyqtyń aldyn alý" boıynsha sharalaryn uıymdastyrý" degen uzaq taqyryppen jarııalanǵan eki tenderdiń de tehnıkalyq sıpattamasynda eski Qazaqstanda qalǵan Elbasynyń joldaýyna qatysty eshteńe aıtylmaǵan. Onyń ornyna qazirgi Prezıdentimiz Qasym-Jomart Toqaevtiń bıylǵy jyly jarııalaǵan joldaýyna arnalǵan arnaıy 500 dana kitapsha jasatý, aqparattyq kitapshany kezdesýler barysynda taratý, bılbord jasatý, "Memlekettik til - táýelsizdigimiz" taqyrybynda aýdandyq gazetke kem degende 2 maqala jarııalaý, t.b birneshe usaq-túıek jumystardyń atqarylý kerektigi kórsetilipti.
Eń qyzyǵy sol, ishki saıasat bólimi Joldaýdy mektep oqýshylaryna nasıhattamaq nıetteri bar kórinedi. Eski Qazaqstanda qalyp ketken "Elbasy" ataýyn Jańa Qazaqstannyń tenderine taqyryp etkender "Prezıdent joldaýyn qoldaý, memlekettik til tuǵyrymyz" taqyrybynda mektep oqýshylary arasynda «Jaıdarman» oıynyn ótkizýdi de josparlap otyr eken.
Tehnıkalyq sıpattamada Prezıdent Joldaýyn nasıhattaıtyn Jaıdarman oıyndaryna kemi 10 komanda qatysýy kerektigi taıǵa tańba basqandaı kórsetilgen.
Bizdiń kókeıimizde "Mektep oqýshylary arasynda ótetin Jaıdarmannyń joldaýǵa qandaı qatysy bar?" degen suraq tur. Bul suraqty resmı hatpen Qazyǵurt aýdanynyń ishki saıasat bólimine joldadyq. Biz joldaǵan suraqqa Qazyǵurttyqtar jaýap berip jatsa, ony da portalymyzǵa jarııalaıtyn bolamyz.
Qanat BIRLIKULY,
"Adyrna" ulttyq portaly
