Бүгін жазушы Мұхтар Әуезовтың ұлы, қоғам қайраткері, мәдениеттанушы, ғалым Мұрат Әуезовтың туған күні. Ол 80 жасқа толды, деп хабарлайды “Адырна” ұлттық порталы.
Мұрат Әуезов 1943 жылы 1 қаңтарда Жамбыл облысында дүниеге келген. Қазақтың заңғар жазушысы Мұхтар Әуезов пен Фатима Ғабитованың ұлы. М.В.Ломоносов атындағы Мәскеу мемлекеттік университетінің Шығыс тілдері институтын "Қытай филологиясы" мамандығы бойынша бітірген. Қызметтік жолында басшы да, депутат та, елші де болған.
Сондай-ақ, ол Қазақстан Жазушылар одағының мүшесі, Қазақстан Республикасының Еңбек сіңірген қайраткері, "Алтын асық", "Тарлан" сыйлығының лауреаты. "Времен связущая нит", "Иппокрен", "Уйти, чтобы вернуть" еңбектерінің авторы.
Еліміздің ғылымын, көркем әдебиетін, кино өнері мен телевизиясын дамытуға елеулі үлес қосты. "Жас тұлпар" бейресми жастар қозғалысы мен "Невада-Семей" қоғамдық қозғалысын ұйымдастырушылардың бірі. Ұлы Жібек жолын зерттеу мен дамытуға қосқан үлесі үшін ЮНЕСКО-ның қола медалімен марапатталды.
