Home » ايدارلار » ادىرناما » جەلتوقسان – قازاقستان تاۋەلسىزدىگىنىڭ جالاۋى

جەلتوقسان – قازاقستان تاۋەلسىزدىگىنىڭ جالاۋى

الماتى قالاسىنداعى دوستىق ۇيىندە قازاقستان تاۋەلسىزدىك كۇنىنە ارنالعان دوڭگەلەك ۇستەل ءوتتى. بۇل ءىس-شارانى «ادىرنا» ۇلتتىق-ەتنوگرافيالىق بىرلەستىگى ۇيىمداستىردى. الماتى قالاسىنىڭ ىشكى ساياسات باسقارماسى قولداۋىمەن ىسكە اسقان شارانىڭ تاربيەلىك ءمانى وتە زور بولدى.

جيىندا قازاقتىڭ بەلگىلى تاريحشىلارى حانگەلدى ءابجانوۆ، تالاس وماربەكوۆ سىندى تاريحشىلار، حالىققا تانىمال ونەر يەسى تۇڭعىشباي جامانقۇلوۆ جانە 1986 جىلى كسرو ورتالىق كوميتەتىنىڭ قازاقستاننىڭ باسشىلىعىنا رەسەيدىڭ ءبىر وبلىسىنىڭ قاتارداعى  باسشىسىن قوناەۆتىڭ ورنىنا الىپ كەلگەنىنە قارسىلىق ءبىلدىرىپ الماتى قالاسىنىڭ باس الاڭىنا بەيبىت شەرۋگە شىققان سول كەزگى جاستاردىڭ بۇگىنگى وكىلدەرى مەن قوعام قايراتكەرلەرى جانە ستۋدەنتتەر، مەكتەپ وقۋشىلارى، ۇزىن سانى ءجۇز ادامنان اسا ازاماتتار قاتىستى.

جيىندى تاريح عىلىمدارىنىڭ دوكتورى حانگەلدى ءابجانوۆ جۇرگىزىپ وتىردى. العاشقى ءسوز سول ءبىر ساياساتتىڭ قىلىشىنان قان تامىپ تۇرعان كەزدە توتاليتارلىق جۇيەگە قارسى قامىقپاي الاڭعا شىققانداردىڭ ءبىرى تۇڭعىشباي جامانقۇلوۆقا بەرىلدى. قازاقتىڭ بەتكە ۇستار ازاماتتارىنىڭ ءبىرى سول كەز تۋرالى ەستەلىكتەرىن ورتاعا سالا وتىرىپ قازاقستاننىڭ بۇگىنگى كەزگى جاعدايى، جاستاردىڭ وتانشىلدىعى تۋرالى اڭگىمەلەدى.

تالاس وماربەكوۆ ءوز كەزەگىندە قىزىقتى تاريحي دەرەكتەردى كەلتىردى. سونىڭ ءبىرى تۇركى الەمىنىڭ بەلگىلى زيالىلارىنىڭ ءبىرى زاكي ءۋاليديدىڭ باشقۇر حالقىنا جازعان حاتى تۋرالى. ز.ءۋاليدي تۋعان حالقىنا سول ءبىر ۇندەۋىندە قازاق ۇلتىمەن بىرگە بولۋعا شاقىرىپتى. بولاشاقتا قازاقتار ءوز تاۋەلسىزدىگىن الاتىنىن، سوندىقتان قازاقتاردان اجىراماڭدار دەپ جازعان ەكەن. تاريحشى بۇدان باسقا دا ءتۇرلى دەرەكتەرمەن ءبولىستى.

تاريحقا اينالعان سول ءبىر ىزعارلى جەلتوقسان كۇندەرى جاس قىزدار مەن جىگىتتەر، بۇنگىنگى ساليقالى اعالار مەن اپالار كەزەگىمە ءسوز الىپ سول كۇندەرى كسرو قارۋلى كۇشتەرىنىڭ وزدەرىنە كورسەتكەن زورلىق-زومبلىقتارى اششى شىندىقتى جايىپ سالدى.

شەشەندەرگە كەزەگىمەن ءسوز بەرىپ وتىرعان ح.ءابجانوۆ ءار سوزگە جۇيەلى تولىقتىرۋلار مەن تۇيىندەمەلەر ايتىپ وتىردى.

سوزجارىسقا بۇگىنگى جاستاردىڭ وكىلدەرى – مەكتەپ وقۋشىلارى مەن ستۋدەنت جاستار دا قاتىستى.

«ادىرنا» ۇلتتىق-ەتنوگرافيالىق بىرلەستىگى بۇنداي جيىنداردى كەلەسى جىلى دا وتكىزۋدى جوسپارلاپ وتىر.

پىكىر جازۋ

پوچتا جاريالانبايدى. تاڭداۋلى ءورىستى تولتىرىڭىز *

*

x

Check Also

ءتول مادەنيەتىمىزدىڭ تامىرى تەرەڭدە

«ادىرنا» ۇلتتىق-ەتنوگرافيالىق بىرلەستىگى» قوعامدىق قورى قر اقپارات جانە قوعامدىق دامۋ مينيسترلىگى قولداۋىمەن «ازاماتتىق باستامالاردى قولداۋ ...