• Қазақ
  •   
  • Qazaq
  •   
  • قازاق
  •   
    Home » ايدارلار » قوعام » كەرەكۋدە كامازدارعا قىرعيداي ءتيىپ جاتىر

    كەرەكۋدە كامازدارعا قىرعيداي ءتيىپ جاتىر

    پاۆلودار وبلىسىندا جولداردى جىل سايىن جوندەگەنىمەن، جىلعا جەتپەي مىلجا مىلجاسى شىعىپ بىت-شىت بولادى. اسىرەسە، تابيعاتى اسەم باياناۋىل وڭىرىنە دەمالۋعا كەلۋشىلەر جازدا جول ازابىن تارتادى. جاسىبايدان دەمالىپ جايناپ شىققان تۋريست، ۇيىنە تۇنەرىپ جەتەدى. بىلتىر جىل سوڭىندا وسى ماسەلە بويىنشا دۇركىن-دۇركىن جيىن وتكىزىپ، قول استىنداعىلاردىڭ ەكى اياعىن ءبىر ەتىككە تىققان ايماق باسشىسى بولات باقاۋوۆ، «جولداردى قۇرتاتىن اۋىر جۇك كولىكتەرى» دەپ كەسىم جاساعان بولاتىن. ويتكەنى، باياناۋىل اۋدانىنىڭ اۋماعىندا التىن، كومىر كەنىشتەرى مەن قيىرشىق تاستار وندىرەتىن كارەرلەر ورنالاسقان. ارتىق سالماقپەن جۇك تيەپ الاتىن اۋىر كولىكتەر قارا جولدىڭ ۇستىندە ارى بەرى جوڭكىلىپ، اسفالتتىڭ استىن ۇستىنە شىعارادى. «ارتىق سالماقپەن جۇرەتىن كامازداردىڭ بارلىعىنا ايىپپۇ سالىڭدار»،  دەپ اشۋعا مىنگەن باقاۋوۆ، كولىكتىك باقىلاۋ ينسپەكتسياسىنا تاپسىرمانى شەگەلەپ بەرگەن ەدى. جەرگىلىكتى بيۋدجەتتەن قاراجات ءبولىپ،  كولىكتىك باقىلاۋ ينسپەكتسياسىنا زاماناۋي ۇلگىدەگى جىلجىمالى سالماق ولشەۋىش قۇرىلعىلاردى دا ساتىپ اپەردى.

    البەتتە، اكىمدىكتە ايتىلعان اڭگىمە الىسقا بارماي ۇمىتىلىپ قالا بەرەتىن-ءدى. بۇل جولى كەرەكۋدىڭ اكىمدىگى ارتىق سالماقپەن جۇرگىش جۇرگىزۋشىلەرمەن مىقتاپ كۇرەسۋگە بەل بۋعان سىڭايلى. جاڭا جىلدان باستاپ كامازداردى اڭدۋعا كولىكتىك ينسپەكتسيا عانا ەمەس، جەرگىلىكتى پوليتسيا قىزمەتى مەن جول پوليتسياسى دا قىزۋ كىرىستى. مايكوبەگە كومىر ارتۋعا بارعان كاماز جۇرگىزۋشىلەرى كەزەكتە تۇرعاننان-اق قۇجاتتارىن سىپىرىپ الىپ، نومىرلەرىن شەشىپ الادى ەكەن. «سەندەر ءبارىبىر ارتىق سالماقپەن جۇرەسىڭدەر. قايتار جولدا «ازاليا» دەگەن دامحاناعا سوعاسىڭدار. ءبىز سول جەردە كۇتەمىز. سوندا كەپ، ايىپپۇلدارىڭدى تولەپ، قۇجات نومەرلەرىڭدى الاسىڭدار»، دەپتى پوليتسەيلەر. ايدار ەسىمدى كاماز جۇرگىزۋشىسىنىڭ ايتۋىنشا، بۇل جاعداي جاڭا جىلدان كەيىن بىرنەشە كۇن قاتارىنان بولعان. ەڭ قىزىعى، ايىپپۇل ارقالاپ زارداپ شەگىپ جاتقاندار ىلعي كومىر تاسىپ، ناپاقا تاۋىپ جۇرگەن قاراپايىم كاماز جۇرگىزۋشىلەرى. ال، سالماعىن اسىرىپ سىقيتىپ قيىرشىق تاس ارتىپ الىپ جۇيتكيتىن جۇك كولىكتەرىنە جولپول مەن كولىكتىك باقىلاۋ ينسپەكتسياسى كوز جۇما قارايدى. ءتىپتى،  كوز الدارىنان ءوتىپ بارا جاتسا دا، تەرىس اينالىپ،  كورمەگەن كەيىپ تانىتادى.

    وسى الالاۋشىلىققا نارازى بولعان كومىرتاسىمالداۋشىلار ءبىر كۇن كولىكتەرىن قاڭتارىپ قويىپ، ەرەۋىلگە شىقتى. تالاپتارى، ايىپپۇلدى الالاماي بارىنە بىردەي سالسىن. نەمەسە، بارلىعىندا تىنىش جايلەرىنە قالدىرسىن. جۇرگىزۋشىلەردىڭ ايتۋىنشا، «اكسۋسكي ترانسپورتنىي لوگيستيك» دەگەن فيرماعا تيەسىلى جۇك كولىكتەرى قانشا ارتىق سالماق ارتسا دا ولارعا «جاسىل جارىق». ويتكەنى، ول كاسىپورىن مىقتى ءبىر «دوكەيگە» تيەسىلى. جول سالۋمەن اينالىساتىن فيرمالار وزدەرى جوندەپ، وزدەرى تاس تاسىپ،  جولدى بۇلدىرەدى. ال، پاۆلودار وبلىسىندا جولدارعا كۇردەلى جوندەۋ جۇرگىزۋمەن اينالىساتىن بىردەن-ءبىر كومپانيا ارمياندارعا تيەسىلى. «جىلدا تەندەر ۇتىپ الۋ ءۇشىن جولدى قاساقانا ساپاسىز سالادى نەمەسە وزدەرى ءبۇلدىرىپ، كەلەر جىلى قايتا جوندەيدى»، دەيدى نارازىلىق تانىتقان جۇرگىزۋشىلەر. ايتپاقشى، بىلتىر جازدا وبلىس اكىمىنىڭ تۋعان اۋدانى جەلەزينگە وسى ارميانداردىڭ كومپانياسى اۋىل ىشىلىك جول سالدى. ەكى كولىك قاتار وتە المايتىن قۋىقتاي  جولدىڭ ساپاسىنا اۋىل تۇرعىندارىنىڭ كوڭىلى تولمايدى. كوكتەمدە اسفالتى قوپارىلىپ قالماسا يگى ەدى دەيدى. جالپى، جەرگىلىكتى اكىمدىكتىڭ مەجەدەن ارتىق سالماقپەن جۇرەتىن كولىكتەردىڭ بارلىعىنا ايىپپۇل سالدىرتپاي، قارا حالىققا كومىر تاسىمالداپ كۇن كورىپ جۇرگەن كاماز جۇرگىزۋشىلەرىنە قىرعيداي تيگەنى تۇسىنىكسىز.  ال، قوجاسى مىقتى كومپانيالاردىڭ اۋىر كولىكتەرى ەشتەڭەگە پىسقىرماي جول ۇستىندە جوڭكىلىپ ءجۇر.

    “ادىرنا” ۇلتتىق پورتالى

    پىكىر جازۋ

    پوچتا جاريالانبايدى. تاڭداۋلى ءورىستى تولتىرىڭىز *

    *

    x

    Check Also

    جىن شىعارامىن دەپ، ءولتىرىپ الدى

    وردا بۇزار وتىزىنا تاياعان ازامات ەمشىنىڭ قولىنان قازا تاپتى. ونىڭ ولىمىنە كۇدىكتى رەتىندە حالىق ەمشىسى ...