Djon Holt – brıtandyq jýrnalıst, jazýshy, pedagog. «Bala sátsizdiginiń sebepteri» kitabynyń avtory.
«Jetistikke jetkiń kelse sabaǵyńdy beske oqy». Ata-anamyz ben muǵalimderden kúnde estıtin sózimiz osy. Biraq synypta úshke oqyǵan dosyńyz qazir tabysty bıznesmen. Bes pen úshtiń sonda aıyrmashylyǵy bar ma? Kóptiń kókeıinde júrgen suraq osy. Mektepte qoıylǵan baǵalar baqytty bolýyńa sebepker bola ala ma?
Djon Holt «Bala sátsizdiginiń sebepteri» kitabynda bul suraqtarǵa mysaldarmen jaýap bergen.
Baǵa baǵyńdy baılaı almaıdy
AQSh-tyń burynǵy prezıdenti Djordj Býsh qadirli qonaq retinde túlekterdiń oqý bitirý keshine barǵanda: «Úzdik bitirgen stýdentterdi shyn júregimmen quttyqtaımyn! Jaraısyzdar! Úshke oqyǵan stýdentterge aıtarym: Sizder prezıdent te bola alasyzdar! Mektep pen ýnıversıtettegi alǵan baǵalaryńyz mańyzdy emes. Ómir sheksiz múmkindikterge toly» dep stýdentterge erekshe jiger bergen.
Shyn máninde, AQSh-ty basqarǵan prezıdentterdiń kóbi qanaǵattanarlyq baǵaǵa oqyǵan. Olardyń ishinde Djon Kennedı men Lındon Djonson da bar. Saıası kóshbasshylardan basqa akademııalyq bilimi joq bilikti kásipkerler Stıv Djobbs, Bıl Geıts jáne álemdegi eń jas mıllıarder áıel Elızabet Holms.
Olar armandary úshin biri Garvord ýnıversıtetin, biri Stenford ýnıversıtetindegi oqýyn tastady. Hıppı mıllıoner Rıchard Brenson da dıslekııadan (oqý men jazý qıyndyqtary) zardap shegip, 15 jasynda mektepke barýyn doǵardy.
Bilimińdi baǵaǵa táýeldi etpe
Áıgili amerıkalyq astrofızık Nıl Degrass Taıson stýdentterge arnaǵan joldaýynda: «Mansap satysyna kóterilgende sizden ýnıversıtette qandaı ball alǵanynyńyzdy eshkim suramaıdy».
Ómir ózen sııaqty. Onyń aǵysy adamdardyń minezin, tájirıbesin, qadamyn shyńdaıdy. Tabysqa jetý úshin sizge keregi qumarlyq, joǵary emoıonaldy ıntellekt jáne jeńilisterdi qabyldaı alatyn qasıet.
Ádette nashar baǵaǵa oqyǵan stýdentterdiń kóbi óz ortasynda kóshbasshy. Olar basqarýdyń qupııalaryn jetik biledi. Eshqashan bir jaqty pikirdi qoldamaıdy. Osy qasıetteri úshin úshtik alyp jatady.
Bilim ordasy qatań erejelerge toly. Ásirese muǵalimderdiń: «Bul osylaı bolýy kerek, basqasy múmkin emes» degen pikirine qarsylyq bildirgenderi úshin opyq jeıdi.
Degenmen nashar baǵalar mıllıarder bolýymyzǵa kepildik bermeıdi, jaqsy baǵalardyń da sebepker bolýy ekitalaı. Baǵa – qaǵazdaǵy sımvol. Bastysy sheshim men nátıje.
Bilimińizdi qalaýyńyzben úılestirińiz, tabysqa jetesiz!
Injý ÓMIRZAQ,
"Adyrna" ulttyq portaly
