Qaýipti shaqta shetel asqan Qadyrbaeva qyzmetine laıyq pa?!

5357

Ekibastuz ákimdiginde «jer astynan jik shyqty, eki qulaǵy tik shyqty». Bıliktegiler álemdi dúrliktirgen aty jaman derttiń aldyn qalaı alamyz dep, jalpaq jurtty úıde otyrýǵa úndep, chellendj joldap ábigerge túsip jatqanyn qaıteıik, shendilerdiń óz arasynda da sóz uqpaıtyndar bar kórinedi. Sondaılardyń biri Ekibastuz qalasy ákiminiń ekonomıka, kásipkerlik jáne saýda jónindegi orynbasary Gúljan Qadyrbaeva bolyp shyqty.

Qalyń qazaq eli, sonyń ishinde ekibastuzdyqtar da «tájdi» tajalǵa qarsy turýdyń amalymen biri tumsha tigip, endi biri muqtaj jandarǵa qaıyrymdylyq qoraptaryn úlestirip bezek qaǵyp jatqan almaǵaıyp ýaqytta Gúljan Shaıahmetqyzy Memleket basshysynyń sózine de, el saýlyǵyna da qolyn bir siltep, Mysyr eline demalysqa attanyp kete bardy. Bilýimizshe, Gúljan Qadyrbaeva alys saparǵa jalǵyz ketpegen, janyna Pavlodar oblysynda týra ózi sııaqty laýazymda otyrǵan bir qurbysyn erte ketken.
Qadyrbaeva hanym tipti qala ákimi Erjan Imanzaıypovqa óz sapary jaıly eskertýdi qajet dep sanamapty. Osydan-aq onyń basshysyna degen syı-qurmetin bile berińiz.
Jalpy, elge dertti juqtyryp jatqandardyń deni – osy Qadyrbaeva sııaqty qydyrympazdar. Basqanikin bilmestik der edik, al bildeı bir qalanyń ekonomıkasynyń aınasy, halyqqa úlgi bolýǵa tıisti laýazymdy tulǵanyń munysyn ne desek eken?!


Aıta keterligi, Gúljan Qadyrbaeva qazirgi laýazymyna 2018 jylǵy 19 qyrkúıekte taǵaıyndalǵan. Bir kezderi Pavlodar mektepteriniń birinde dırektordyń oqý-tárbıe isi jónindegi orynbasary bolyp ta qyzmet etip, shákirtterge jón siltegen adamnyń búgingi áreketin «tárbıeli» deýge áste aýyz barmaıdy.
Jurt ár qadamyn shektep, baıqap basyp júrgende alshań basyp shekara asqan Qadyrbaeva jalpy óziniń laýazymdyq qyzmetin de durys atqaryp júrgeni shamaly. Olaı deıtinimiz, byltyr jyl sońynda Pavlodar oblysy boıynsha tekserý komıssııasy Ekibastuz qalasynyń orta bilim berý uıymdaryna bólingen bıýdjet qarajatynyń jáne memlekettik aktıvterdiń paıdalanylýyna júrgizilgen memlekettik aýdıt qorytyndylaryn jarııa etti. Aýdıt jasaýshylar kóptegen mektepterdiń býhgalterııa jumysy zańǵa qaıshy júrgizilgenin anyqtap berdi. Bilim bólimine bólingen ár tıynnyń tıimdi jumsalýyn qadaǵalap, qazyna qarjysyn qyzǵyshtaı qorýǵa mindetti birden-bir tulǵa osy Qadyrbaeva bolatyn. Biraq Gúljan Shaıahmetqyzynyń osy bylyqqa beti búlk etkeni baıqalmady. Endigisi – mynaý...
Negizi, Ekibastuzda shahar basshysy Erjan Imanzaıypovtyń bas bolýymen sheshimin taýyp jatqan másele, oń ózgeris az emes. Átteń, talapty basshynyń qadirin mańaıyndaǵy osy Qadyrbaeva sııaqty jaýapsyz jandar ketiredi-aq. «Jaǵdaı qalaı bolar eken?» - dep alań-eleń kúı keshken shaqta jurtyn tastaı qashqan adamnan halyqqa ne úmit, ne qaıyr?! Qara basynyń bir kúndik qyzyǵyna el taǵdyryn aıyrbastaǵan mundaı tulǵalar, bizdińshe, óz oryntaǵyna laıyq emes.

Asýan Taıjan, Pavlodar oblysy

Pikirler