Serikjan Mýrasılov: «Ǵashyqtyq oqytý» bastaldy

1288

Búgingi satıra

Shala kárister, shala amerıkalyqtar bolmasa shala syǵandar degendi estigenińiz bar ma? Joq.Joq.Joq. Shala degen tek bizge ǵana tán qasiretti qasıet. Sonaý zamandaǵy sózdi sorpasha sapyrǵan Abaılar, Mahambetter, Shákárimderde bolmaǵan qasiretti qasıet búgingi shala qazaqtardyń qanyna koronavırýstaı dendegen. Sol shala qazaqtardyń qasiretti qasıetiniń arqasynda sózdik qorymyz qı qosylǵan topyraqsha tyńaıdy. Al da qajetińe qaraı sandala ber.
Shala qazaq bıkeshtiń atyn onsha bilmeıdi ekem, áıteýir ózinen sózi hıt bop jatyr.
«Ǵashyqtyq oqytý» júıesi dep qaldy.Teledıdardyń daýysyn 100-ge aparyp, qulaǵymdy tige qoıdym. « Jáne dıe, eger dıe, karantın jalǵasqan kezdıe, jáne dıe» deı berdi. Aýzym tórt burysh ańyraıyp qappyn. Sóz saptasy sııardyń aıaq tastasyndaı ishke-syrtqa, ishke-syrtqa eken. Qasqyrdy kórgen qoıdaı qatyp, shala qazaqty shapalaq urmaı tyńdadym. «Jáne dıe, 5-shı sáýir dıe kanıkýl aıaqtalǵan kezdıe oqýshylar «ǵashyqtyq oqýǵa» aýysady»– deıdi. Qaqıyp qaldym. Qozǵalsam qazaq tilime koronavırýs juǵatyndaı. Qazaq tiliniń qarǵysy tıemesin dep ystyq sháıdi jutyp jiberdim. Keńirdegim kúıip, tilim tyrysty da qaldy. Qaıran ana tilim-aı! Ot tıse de, shoq tıse de «Qashyqtyq oqytýdy» táýir-aq aıtyp tur. Tilim tyrtyq bolsa bolsyn, shala qazaq bolmasam boldy dep, táý ettim Jaratqanǵa.

                                                   BÚGINGI MODADA...
–Búgingi modada – maska,– dedi áıeli.
– O, nesi eı, qaljyńynyń túrin,– dep jaqtyrmady kúıeýi.
– Ótirik pa? Qarasańshy teledıdardy. Bári betperde taǵynǵan – dedi áıeli.
– Jetiskennen taǵyp júr deısiń ba? Koronavırýs juqpasyn dep ta, – dedi kúıeýi.
– Iá, ıá, sol indet bolmasa maskanyń ádemiligin de, qadirin de túsinbeýishi edik. «Ittiń boǵy dári bolsa darııanyń ar jaǵynda» degen osy da, – dedi áıeli.
Aınanyń aldynda betimen emes, maskasymen alysqan bıkesh, kúıeýine kúlimdeı qarap qoıdy.
– Qarashy, shashymdy tóbeme túısem, medbıkege uqsaımyn. Al belime jibersem «Qarǵys atqyr» fılmindegi albastyǵa aınalyp ketem.
– Sonda da súıkimdisiń, – dedi kúıeýi.
– Ras pa?
–Ras,– dedi kúıeýi erkeletken bop ernin shoshaıtyp.
– «Ádemilik álemdi qutqarady»,– dedi bir ıyǵyn jalańashtap,– áıeli.
– Ony aıtqan Dostoevskıı ottapty, – dedi kúıeýi.
– Qazir kóshege keýde, bókseńdi jalańashtap shyǵý qyzyq emes. Betińde betperdeń bolmasa, – dedi áıeli.
Qyzyl koftasyna qyzyl, jasylǵa-jasyl, kúlginge-kúlgin jarasatyn betperdeni kezek aýystyrǵan áıeli aına aldynda «taptym» dedi.
–Neni,– dedi, kúıeýi.
– Sómke ornyna ne ustap júrýdi,– dedi áıeli.
– Meni ma?– dedi kúıeýi erkelegendeı ernin shoshaıtyp.
– Jyndysyń ba? Seni ertip júrý moda emes. Qazir moda – maskany taǵyp, qolyńa bir býket arsha alyp júrý,– dedi áıeli murnyn tyrjıtyp.

Serikjan Mýrasılov

Pikirler
Redakııa tańdaýy