Qyzylorda qalasynda kópbalaly otbasylarǵa 100 baspana paıdalanýǵa berildi

591

Qyzylorda qalasynda turmysy tómen kópbalaly otbasylarǵa arnalǵan 100 baspana paıdalanýǵa berildi. 

Birer aı buryn oblys ortalyǵyndaǵy «Báıterek» shaǵyn aýdanynda turmysy tómen kópbalaly otbasylar úshin 150 baspananyń qurylysy bastalǵan bolatyn. Onyń ishinde 50 páter jergilikti qazynadan bólingen qarjyǵa salynýda. Al 100 baspananyń qurylysy «Bolat Ótemuratov» qaıyrymdylyq qorynyń qarjysy esebinen júrgizildi. Sol 100 páter qysqa merzimde salynyp, el ıgiligine paıdalanýǵa berilgeli otyr. Sondyqtan, búgin munda jınalǵan halyqtyń qarasy qalyń boldy. Jańa mekenniń alǵashqy qonystanýshylary – kópbalaly otbasylar, olardyń qýanyshyna ortaqtasýǵa kelgen el azamattary, qala turǵyndary keldi. Shańyraq shattyǵyna bólengeli otyrǵandarǵa óńir ónerpazdary da merekelik kóńil-kúı syılady.

Saltanatty jıynǵa oblys ákimi Qyrymbek Kósherbaev pen «Bolat Ótemuratov» qaıyrymdylyq qory Qamqorshylyq keńesiniń tóraǵasy Almas Sharman qatysyp, qonystoı ıelerin quttyqtady.

«Sońǵy jyldary Syr óńiri qarqyndy qurylys alańyna aınalyp kele jatyr. 2013 jyly 230 myń sharshy metr baspana salynsa, bıylǵy mejemiz 800 myń sharshy metrge jetip otyr. Tórt esege ósken. Qoǵam qaıratkeri Bolat Ótemuratovtyń qarjylyq demeýshiligimen «Balameken» jobasy aıasynda Qyzylorda qalasynda az qamtamasyz etilgen kóp balaly otbasylardy qoldaý maqsatynda jáne balalardy qorǵaý merekesi qarsańynda 100 páterdiń qurylysy rekordtyq eki aı merzimde salynyp, paıdalanýǵa berildi. Qosymsha oblystyq bıýdjetten 50 páterge qarjy bólinip, qurylysy júrýde. Olar da tolyqqandy maýsym aıynda iske qosylady. Aıta ketý kerek, turǵyn úı qurylysyn damytý maqsatynda sońǵy 6 jyl ishinde Qyzylorda qalasynyń ózinde 15 shaǵyn aýdan paıda boldy. Jańa aýdannyń qurylysyna kiristik. Qyzylorda tarıhynda mundaı qarqyndy qurylys bolǵan emes. 2019 jyldyń sońyna qaraı Qyzylordanyń sol jaǵalaýynda 2 628 páterlik 13 kópqabatty turǵyn úı salyp, oǵan 13 myń adamdy qonystandyrýdy josparlap otyrmyz. Elbasynyń 2018 jyldyń qańtaryndaǵy joldaýyna oraı, bolashaqta bir adamdy 30 sharshy metr baspanamen qamtamasyz etý josparymyzda bar», – dedi Qyrymbek Kósherbaev. 

«Báıterek» shaǵyn aýdanynda paıdalanýǵa berilgeli otyrǵan baspanalardyń jalpy aýdany – 6 500 sharshy metr.

Oblys ákiminiń aıtýynsha, salynyp jatqan 150 baspananyń 149-yna kópbalaly otbasylar qonystanady. 1-eýine shaǵyn halyq qyzmet kórsetý ortalyǵy ornalaspaq. Ol kópbalaly otbasylarǵa jáne osyndaǵy jeke úılerge qyzmet kórsetedi. Sonymen qatar, aımaq basshysy aldaǵy jyly «Báıterek» shaǵyn aýdanyna mektep pen balabaqsha qurylysyn salýdy josparǵa engizetinin aıtyp, turǵyndardy qýantyp qoıdy.

«Budan bólek, Qyzylorda oblysynda az qamtylǵan kópbalaly otbasylarǵa 431 páterdiń qurylysyna bıýdjetten qarjy bólinipti. Jyldyń sońyna deıin 588 páter kópbalaly otbasylarǵa beriletin bolady», – dedi oblys ákimi. 

«Bolat Ótemuratov» qory Qamqorshylyq keńesiniń tóraǵasy Almas Tóregeldiulynyń aıtýynsha, memleket tarapynan ǵana emes, bıznes ókilderi tarapynan da halyqtyń áljýaz toptaryna qoldaý kórsetilýde. Sonyń bir dáleli – «Bolat Ótemuratov» qorynyń eldiń ál-aýqatyn artyrý baǵytynda atqaryp otyrǵan jumystary.

«5 jyl buryn irgesi qalanǵannan beri osy baǵytta jumysyn úzdiksiz jalǵastyryp keledi. Qordyń quryltaıshysy Bolat Ótemuratov óz tarapynan kópbalaly otbasylardy baspanamen qamtamasyz etýge óz úlesin qosýdy uıǵardy. Bizdiń qorymyz 450 mıllıon teńge kóleminde qarajat bólip, Qyzylorda oblysy ákimdigimen birge naýryz aıynda «Balameken» jobasyn iske asyrýǵa kiristi. Búginde josparymyz tabysty bolǵanynyń kýási bolyp otyrmyz. Sol sebepti, kópbalaly analar, balalar jaıly baspananyń ıesi bolatynyn erekshe tebirenispen, úlken qýanyshpyn aıtqym keledi», – dedi Almas Sharman. 

Budan keıin el azamattary kópbalaly otbasylarǵa páter kiltterin saltanatty túrde tabystady. Baspanaǵa birinshi kezekte qol jetkizgender – 10, 9, 8, 7 balasy bar otbasylar. Depýtattar men qoǵam belsendilerinen quralǵan táýelsiz komıssııa osyndaı sheshim qabyldapty.

Máselen, jańa páter alǵan Aıgúl Abaıdýllaeva – 10 balanyń anasy. Baspanaly bolsam degen armany oryndalǵany sene alar emes. Tipti kóz jasyna erik berdi.

«Qatty qýanyp turmyn. Shıitteı bala-shaǵa bar. Solardyń nesibesi dep bilemin. Ramazan aıynda osyndaı syı násip etti», – deıdi ol.
Al 7 balanyń anasy Vera Júsipova páter jaldap, kóship-qonyp júretin kúnder artta qaldy dep otyr.

«Jaryq, sý, gaz, jol, telefon baılanys – bári bar mynda. Rızamyz. Jalpy, otbasymnyń turmys jaǵdaıymen ákimshiliktegi adamdar tanys. Baspanaǵa muqtaj ekenimizdi de biledi. Keshe úı beremiz dep habarlasqanda qýanyp kettim. Týystaryma aıtyp, súıinshi surap, máz bolystyq», – deıdi kópbalaly ana. 

7 balanyń anasy Izimkúl Tursanova da qýanyshynda shek joq ekenin aıtady.

«Balameken» degen jobanyń arqasynda kóp jyl kútken páterimizdi aldyq. Endi osy jer balalar mekenine aınalady dep oılaımyn. Elbasyna, oblys basshylyǵyna osyndaı qamqorlyq kórsetip jatqanyna alǵys aıtamyn», – dedi Izimkúl Tursanova.

"Adyrna" ulttyq portaly

Pikirler
Redakııa tańdaýy