Nan baǵasy dollar izimen..

428

«Kesapat osy kúngi bolyp jatqan
Qarǵysym qalyń eldi meniń atqan,
Qashanda urmas tegin kepıetim,-
Áý bastan beker elge senim artqam?!»,- dep Ǵafý Qaıyrbekovtiń bir óleńinde qazaqtyń qasıetti qara nanyna til bitip, renishin bildirgen.
Iá, nan qoldy-aıaqty bolǵanda baıaǵyda-aq, astyqty el Qazaqstannan aldy-artyna qaramaı zytar edi.  Nege deısiz be?! Demeseńizde aıtaıyn. As atasynyń qazaqqa degen ókpesi qara qazandaı.
Osyǵan oraı, jýyrda ǵana memleket basshysy Qasym Jomart Toqaev: «Nan men kómir baǵasy baqylaýymda bolady» dep málimdegen edi.  Biraq sol málimdemeden keıin-aq, kómir baǵasyn qaıdam,  nan baǵasy qymbattaı jóneldi. Tipten Toqaevtyń málimdemesinen keıin "bázbireýler"  qymbatshylyqty ádeıi engizdi me dep te oılanyp qalasyń.

Buǵan QR Aýyl sharýashylyǵy mınıstri Saparhan Omarov: «Óńirlik turaqtandyrý qorlaryn qalyptastyrý tetigi belsendi qoldanylyp keledi. Qazirgi ýaqytta 3,1 mlrd. kóleminde qarjy bar, bul qarajatty ákimdikter nan baǵasyn turaqtandyrýǵa da baǵyttaı alady», - dep nan baǵasy bolashaqta qalypqa kelýi múmkin ekenin alǵa tartqan edi. Biraq Toqaevtyń tapsyrmasyna 10 shaqty kún bolyp qalsa da, QR Aýyl sharýashylyǵy mınıstriniń sózi áli nátıje bergen joq. Baıaǵy sol ýdaı baǵa, zar eńiregen halyq...

"Ýdaı baǵa" demekshi, qymbatshylyq Qazaqstannyń bas qalalaryna ǵana áser etpegen sekildi.  Qalǵan óńirlerde as atasy aspandap tur. "Turaqty túrde 70 teńgeni ustap turady" degen nan baǵasy Pavlodarda 110 teńge, Taldyqorǵanda 95 teńge, Shyǵysta- 92 teńge, Aqtóbede - 87 teńge, Jambyl oblysynda - 85 teńgege kóterildi de qaldy. Dúkendegi satýshylar nan baǵasy "140-qa deıin barady" dep boljaýda. Bári birdeı baqsynyń qumalaǵyndaı bytyrap, nan baǵasyn sharyqtatqanda Toqaev buny "Baǵany deldaldar qoldan ósirip otyr»,- dep túsindirgendeı boldy. Al ekonomıka mınıstrliginiń básekelestikti qorǵaý jáne damytý komıteti: «Nan óndirýshiler men taýar ótkizýshilerge 20 ret eskertý de jasaldy», - dedi.
Hosh delik, bir nannyń baǵasy 100 teńgeniń ar jaq, ber jaǵynda aınalyp júrgende bir qap unnyń kóterme saýdadaǵy baǵasy 6500 - den 8700- teńgege deıin ósken. Al byltyrǵy jeltoqsan aıynyń kórsetkishi 3800 teńgeden ári aspaıtyn edi. Sonda bir jylda 3 ese qymbatshylyqqa urynyp otyrmyz.  Nan qymbattaǵan soń sáıkesinshe makaron, toqash, bálish sekildi un ónimderiniń de baǵasy da arta túsken. Oǵan dálel statıstıka komıtetiniń habarlaýy.  Bir aıda arpa jarmasy – 2,2%-ǵa, un – 2,1%-ǵa, untaq jarmasy — 1,6%-ǵa, makaron — 1,2%-ǵa ósken.

Mars Seıdimbaev: "Nan baǵasy dúkenderde 75 teńge bolǵanymen, turaqtandyrý qorynyń kómegimen áleýmettik dúńgirshekter, kommýnaldyq bazarlar men iri saýda oryndary arqyly tómen baǵamen satylatyn bolady", dep qalǵan óńirlerdi qaıdam, Tarazda baǵa turaqtalatynyn málimdegen.

Qysqasy, 200 teńgeniń tıynǵa aınalýymen bastalǵan bul quldyraý, nan  baǵasynyń qymbattaýyna ákep soqtyrdy. Ary qaraı azyq-túlik pen et baǵasy da aspandaı jóneldi. Álemdik astyq naryǵynda jetekshi orynda ekenimizdi eskersek, nandy tegin-aq alýǵa ábden bolar edi. Alaıda...

 

Aqgúl AIDARBEKQYZY,

"Adyrna" ulttyq portaly

Pikirler