Áýlıeata azamattary «Eńbek» baǵdarlamasy boıynsha óz kásibin ashýda

585

Elimizde «Eńbek» baǵdarlamasy arqyly halyqty jumyspen qamtý maqsatynda aýqymdy jumys jasalyp jatyr. Atalǵan baǵdarlamanyń ıgiligin Jambyl oblysynyń turǵyndary da paıdalanyp, ıgi isti bastaýda.

Bıyl Jambyl oblysynda barlyǵy 1300-den astam adamǵa jalpy 6147,6 mıllıon teńgeniń shaǵyn nesıesi beriledi dep josparlanyp otyr. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Tımýrjan Nurymbetovtyń aıtýynsha, bul respýblıka boıynsha basqa óńirlermen salystyrǵanda aldyńǵy qatarly kórsetkish. Sondaı-aq, ol aǵymdaǵy jyldyń qarasha aıynan oblys turǵyndaryna shaǵyn nesıe berýge qosymsha respýblıkalyq bıýdjetten taǵy 2 mıllıard teńge bólinip otyrǵanyn tilge tıek etti.

Eseptik jıynda oblys ákimi Asqar Myrzahmetovke Tımýrjan Nurymbetov alǵashqy úsh toqsandaǵy atqarylǵan jumystardy baıandady. Basqarma basshysy bıylǵy toǵyz aıda aýyl boıynsha 885 adam 3797,3 mıllıon teńgeniń, qala boıynsha 24 adam 1070,3 mıllıon teńgeniń shaǵyn nesıesine qol jetkizgenin aıtyp, jyl sońyna deıin kózdelgen meje tolyǵymen oryndalatynyna sendirdi.

«Aıta keteıik, búgingi tańda jalpy halyqty jumyspen qamtý sharalary búgingi tańda «Eńbek» baǵdarlamasy aıasynda júzege asyrylýda. Aǵymdaǵy jyly bul baǵdarlama boıynsha respýblıkalyq bıýdjetten 7,4 mıllıard teńge, jergilikti bıýdjetten 4,2 mıllıard teńge qarastyrylǵan. Nátıjesinde toǵyz aıda jumyspen qamtýdyń belsendi sharalaryna 30 504 adam tartylyp, jyldyq jospar ázirge 86 paıyzǵa oryndalyp otyr. Sonymen qatar, esepti kezeńde jumyspen qamtý ortalyqtarynyń joldamasymen 20 640 adam jumyspen qamtylsa, onyń ishinde 14210 adam turaqty negizde ornalasqan»,- dedi Tımýrjan Nurymbetov

Asqar Myrzahmetov shaǵyn nesıelerdi shyn mánindegi qajetti jobalarǵa jumsaýdyń mańyzdylyǵyn eskertip, ol boıynsha jaýapty tulǵalarǵa árbir aýdannyń áleýeti men suranysyn barlap, karta ázirlep, arnaıy bazany qalyptastyrýdy tapsyrdy. Sondaı-aq, bul baǵytta aýyldaǵy qarapaıym halyqty barynsha habardar etý jumystary áli de álsiz ekenin ashyp aıtyp, turǵyndardyń turmysyn arttyrý jolynda bar sharalardy qolǵa alýdy júktedi. Óńir basshysy qysqa merzimdi kásiptik oqytý kýrstaryn ońtaılandyrýdy, ásirese, suranysqa saı mamandyqtarǵa basymdyq berý kerektigine kóńil bólip, tıisti tulǵalarǵa bul turǵydaǵy baqylaý sharalaryn qatańdatýdy mindettedi.

«ADYRNA»

ulttyq portaly

 

Pikirler
Redakııa tańdaýy