Ustaz bolý – abyroıly is

157

Týǵan topyraqty súıý – tek ispen dáleldenedi. Adam balasynyń oıynda árqashan týǵan jerine kómek qolyn sozsam degen maqsat bolatyny anyq. Jastar arasynda osy maqsatyn oryndap, týǵan jerine qyzmet kórsetip júrgen zamandastarymyz da bar. Osy oraıda ál-Farabı atyndaǵy QazUÝ túlegi Toǵambaı Aıaýlym Qanatqyzymen suhbat júrgizgen edik.
– Aıaýlym, týǵan jerińizge jas maman retinde jumysqa ornalasypsyz. Qaı óńirge, qashan, qandaı mamandyq boıynsha jumysqa turdyńyz? Jáne bul siz úshin qanshalyqty tıimdi?
– Almaty oblysy, Eńbekshiqazaq aýdany, «Rahat aýyldyq okrýgi №1» orta mektebine 2019 jyldyń qyrkúıek aıynan bastap jumysqa turdym. Mamandyǵym – qazaq tili men ádebıeti pániniń muǵalimi. Memlekettik grantty aýyldyq kvota boıynsha jeńip alǵannan soń, aýyldyq jerde jumys istep jatyrmyn.
– Jas maman retinde óz mamandyǵyńyz týraly ne aıtar edińiz? Artyqshylyǵy men kemshilikteri jaıynda?
– Muǵalim mamandyǵy ár zamanda syıly orynǵa ıe. Balalardy bilim nárimen sýsyndatamyn dep sheshim qabyldaǵan ustaz ár oqýshynyń júreginde iz qaldyryp, sapaly bilim alýyna negiz bolýy tıis. Árqashan da ár mamandyqtyń artyqshylyǵy men kemshil tustary birdeı júredi. Máselen, artyqshylyǵy, balalarmen jumys jasap otyryp shynaıy kóńil-kúı men sezimge bólenesiń. Mundaı qýanyshtar ómirińdi ajarlandyra túsedi. Oqýshylar eseıe kele balalyq shaǵynyń, baqytty kezeńiniń bir bóligi retinde muǵalimderin ómir boıy eske alyp júredi. Munyń ózi eren eńbektiń eń úzdik aqysy ári muǵalim úshin úlken mártebe. Sonymen qatar, turaqty eńbekaqy. Memleket tarapynan usynatyn túrli baǵdarlamalar da ustazdyq joldaǵy tájirıbeni molaıta túsedi. Al kemshil tusy, basqa mamandyqtardyń qyzmetkerleri úıge kelgen soń demalyp, erkin bolsa, al muǵalim jumysynyń jartysyn úıine alyp kelip jasaıdy. Iaǵnı, qaǵazbastylyq jumysy kóp ýaqytyńdy alady. Kóptegen mektepterde mektepshilik sharalarǵa qarajat shyǵaratyn da – muǵalim. Sonymen qatar, kóp ýaqytymyz qaǵazdarmen jumys jasaýǵa ketetin bolǵandyqtan, keı kezderi oqýshylarmen tikeleı baılanys jasaýǵa da múmkindik bolmaıdy.
– Bolashaq jas mamandarǵa tilegińiz?
– Qazirgi tańda kóp stýdentter muǵalim mamandyǵyn oqyp shyǵyp, qolyna dıplomyn alǵannan keıin basqa ortaǵa ketip qalyp jatady. Olarǵa aıtarym, ustaz bolý – abyroıly is. Jas mamandarǵa aıtarym, osy mamandyqty tańdaı otyryp, balany adam qylyp tárbıeleıtin, bolashaqqa maqsat qoıa bilýge senim uıalatatyn zor tulǵa – sensiń! Sondyqtan, osy joldan taıqymaı, bıik belesterden kórinýlerińe tilektespin!
– Suhbatyńyz úshin kóp raqmet, Aıaýlym. Eńbek jolyńyz jemisti bolsyn. Bilim beretin, tárbıeleıtin shákirtterińiz úmitińizdi aqtaýyna tilektespiz!

Suhbattasqan: Jansaıa SMAN
(Azamattyq bastamalardy qoldaý ortalyǵynyń tapsyrysymen "Týǵan jer" jobasynyń aıasynda jazyldy)

Pikirler